याकुप 2

नेवाड़ करनेन बारामां चेताव

1ए मारा लाटेक्‌ला भायस्‌यो ने बहणस्‌या! आपणु मालीक ईसु मसी सेक-सींगार भर्‌यु छे, तेरे पर भुरसु करनेन साहरे आपणु आखा एक छे, हेरेसी काहनान बी वगे वळीन, नानला मटाक नेवाड़नु नी चाहजे।1 2मान लेवु, कदी एक माणुस सनान मुंदी ने वारु-वारु पुथल्‌या पेहरीन ईसुन भक्‌तीन घर मां आवे, ने एक गरीब तेरे धड़े काय बी नी हय, चु बी मुयेळ वाळा, कुचळायला पुथल्‌या पेहरीन आवे; 3ने तुहुं तीना वारु-वारु पुथल्‌या पेहरीन आवण्‌यान मुंहडो देखीन कहुं की तु जां वारलु जागे बस ने तीना गरीब काजे कहुं की हय उबु रव, नीते मारा पायेन्‌चां बस, 4असु वेहवार करीन तुहुं ते एक जणान आव-भाव करीन नानला मटान छीट राख रया, असलु वीच्‌यार भुंडुत छे जी वात तुहुंक मालुम नी हय काय? असु वीच्‌यार करीन, तुहुं मंडळीन माणसे गरीब ने मालदारेन नेवाड़ु पाड़ र्‌या।

5ए मारा लाटेक्‌ला भायस्‌यो ने बहणस्‌या। सामळु। भगवान ईनी कळीन गरीब माणसे काजे भुरसा मां मालदार बणावे ने भगवानेन राजेन हकदार्‌या बणावणे करीन नेवाड़लु छे। जे भगवान काजे परम करे, तीनुक चु आपसा राजेन हकदार्‌या बणावणे करीन पेहलुत वायदु करलु हतलु। 6बाकुन तुहुं ते छीट राखीन ईनु गरीब माणसेन हासी उड़ाया। तुहुंक कुरुट-कचेरी मां घीसड़ी-घीसड़ीन ली जाण्‌या कुण छे? जे मालदार माणसेत छे, जे तुहुंक वेला पाड़ र्‌या। 7तुहुं तीना ईसुक भगवान मानीन, भक्‌ती कर र्‌या, तीना ईसुन नाव-बद्‌दी करन्‌या असला मालदार माणसेत छे।

8मुसान नेम मां असो लिखलो छे, तु तार साते वाळाक तारेन तसुत परम कर। जु नेम कायदु आखाम मटु छे करीन आपणु राजा ईसु सीकाड़लु छे। कदी तुहुं जु नेम कायदु पाळु ती तुहुं वारलुत कर र्‌या।2 9बाकुन कदी तुहुं गरीबेन नेवाड़ु करीन मालदार्‌याक अतरोत परम कर रया, ती तुहुं पाप कर रया, हेरेसी तुहुं भगवानेन कायदान अनसारे कायदु तुहुंक गुनाळु ठेहरावे।3 10जु काहनुक भगवानेन आखा कायदाक पाळे, ने कदी एक कायदु बी पाळनेम चुक जाय, ती चु आखा कायदा पाळनेन नेम चुक गुयु कह्‌वाये। 11काहाकी असो बी कहलो छे की छीनाळो घुण करजु, चु जु हुकुम बी आप्‌लु छे की खुन घुण करजु। काहाकी तुहुं छीनाळो ते नी कर्‌या बाकुन खुन अतरोत कर्‌या, तेबी तुहुं भगवानेन कायदान अनसारे गुनाळा रवसु।4 12तुहुं तीनु माणसे साय बुल कह्‌वु, ने काम बी करु, तींद्‌रो नीयाव हीना कायदान अनसारे हवसे। 13जु दयाळु नी हय, हेरे वाटे भगवानेन नीयाव बी दया पाखुर हवसे; काहाकी दया नीयाव पर बड़ीन रवे।

भुरसु ने भलायन काम

14ए भायस ने बहणस्‌या! कदी काहनुक, कह्‌वे की मे ईसु पर भुरसु करो। बाकुन चु भुरसान अनसारे भलायन काम नी करे, ती असु भुरसु करने सी काय बी फायदु नी हवे असु भुरसु करन्‌या माणसेक, भगवान छुटकारु नी आपे। 15मान लेवु की काहना भायस नीते बहणीस धड़े पेहरने वाटे पुथल्‌या नी हय, ने दाहड़ीन खाणे वाटे खाणो बी नी हय; 16ने कदी तुंद्‌रे मायन काहनुक तीनीक नीते तीनाक कह्‌वे, खुस हय्‌न जात रव, “ने वारु हुपवाळा पुथल्‌या पेहरजी ने पेट भरीन खाणो खाजी।” बाकुन चु कहण्‌यु तीनुक डीलो वाटे ज चाहजे च नी आपे, ती तेरा कवला बुले, तेरा ने सामळ‌न्‌यान काय बी फायदु नी करे। 17असु भुरसु बी भलायन कामे बीगुर मरलु छे।

18कदी काहनुक मेसेक असु पुछे की “भगवान पर तारु भुरसु छे काय?” ती मे तीनाक असु कयस “हव, मे ते भलायन कामेन साहरे भुरसान पुरावु दी रयु। मे ते तुसेक, मारु भुरसु मारी उठ-बस मां भगवानेन नावे करला भलायन कामेन साहरे देखाड़ीस।” बाकुन मे तीनाक ज बी पुछीस, “भगवानेन नावे भलायन काम करे बीगुर, तु कसु काय कय सके की, मे भगवान पर भुरसु करो।” 19ए माणसे एकुत भगवान छे, असु तारु भुरसु छे काय? हसे रे! बाकुन भुतड़ान आत्‌मा बी एकुत भगवान छे। करीन भुरसु करे, ने थर-थर कापे। असलु भुरसु काय कामकु? 20ए डेड़-अकल्‌या माणसे कदी तु ईसु पर भुरसु अतरुत करे, ने भुरसु करनेन साहरे देखाव पड़न्‌या भलायन काम नी करे ती तारु भुरसु फालतु छे, ईनी वातेन हुकारु भरने करीन तुसेक पुरावु चाहजे काय? 21जत्‌यार आपणु बास अब्‌राहम आपसा पुर्‌याक इसाक काजे वेदी पर चड़ायु, ती काय चु काम सी धरमी नी बण्‌यु काय?5 22अब्‌राहमेन ते भगवान पर अतरु जबर भुरसु हतलु, की चु भगवान ज काय बी कह्‌यु, तीनाक करने करीन तीयार हतलु। हेरेसी जे भलायन काम अबराहाम्‌यु कर्‌यु, तेरेसी आपणे अगळ जी वात उजेंती हय जाय की अब्‌राहमेन भुरसान काय बी कसर नी रय। 23चुखला सास्‌तुर मां असो लिखलो छे, अब्‌राहम ते भगवान पर भुरसु कर्‌यु, हेरेसी भगवान तीना भुरसान साहरे तीनाक धरमी बणायु। सास्‌तुरेन ज बुल अब्‌राहमेन जीवन मां पुरो हय गुयो। अतरोत नी बाकुन, चु भगवानेन दुस्‌तीदार कवायणे बाजी गुयु। 6 24हेरेसी अब्‌राहमेन जीवनेन साहरे आपणे अगळ जी वात उजेंती हय जाय की भगवान पर माणसेन पाक्‌कु भुरसु फालतु नी रवे; चु भुरसु तींद्‌रे जीवन मां भलायन कामेन साहरे देखाव पड़से ने असला माणसेत काजे भगवान धरमी समजु।

25तसोत राहाब बायरीन जात रंडी, जत्‌यार हयी आपसा खबर देण्‌या काजे आपसा घर राखी ने दीसरे वाट्‌ये सी मकली, ती काय ची काम सी धरमी नी बणी? 7

26मे असु काहा कय रयु? मेसेक पाक्‌को मालुम छे की, जु भगवान पर भुरसु करे, बाकुन भुरसान अनसारे तेरी जीवाय मां भलायन काम देखाव नी पड़े, ती तेरु भुरसु मरलु‌ छे। असलु भुरसु एक मरला माणसेन तसु छे, जु दम नी लेय। तेरो डील ते छे; बाकुन जीव नी हय।