भगवानेन छाचला बुल
ईब्रानी 7
पुजारान पुजारु मलीकीसीदक्यु
जु मलीकीसीदक्या सालेमन सहरेन राजा हतलु, ने जु आखाम ताकतवाळा भगवानेन पुजारु हतलु, जलम लग पुजारु बणीन रवसे। जत्यार अब्राहम राजा काजे मारीन पछु आवती रवे, ती मलीकीसीदक तीनाक भेळु हय्न संयबरकत आप्यु। ईनात मलीकीसीदक्या काजे अब्राहम आखी चीजेन 1दसवु वाटु आप्यु, ने मलीकीसीदक्या नावेन पेहलो मतलब छे, “धरमेन राजा।” हेरेसी ईना नावेन दुसरो मतलब छे “सालेमन राजु” नीते “सांती आपण्यु राजु।” मलीकीसीदक्यान नीते आयस ने नीते बास ने नीते खानदानी हय, तेरा जीवनेन नीते सुरुवात हय ने नी आकरी हय; बाकुन भगवानेन एक खुळ्या पुर्यान तसुत भगवानेन नींगाम जलम पुजारु बन्लु रयु।
हय जाराक वीच्यार ते करु! जु मलीकीसीदक्यु कतरु मटु हतलु, चु बेसकु मटु हतलु, हेरेसी तीना काजे आपणा 2डाहा-डाहान डाहलु बास अब्राहम लग जो लुटीन लावलु, तीनी चीजे मायन महंग्ली चीजेन लग दसवु हीस्सु दान कर्यु। भगवान जे हुकुम कायदा मुसा काजे आपलु, तीनु कायदान अनसारे लेव्या कुळीन माणसे काजे जु हक जड़लु की चे आपसा भाय-बेटा धड़े दसवु वाटु लेणु चाहजे, भले चे अब्राहमेन कुळी मां पयदा हया हय। बाकुन मलीकीसीदक्या ते लेव्या कुळीन बी नी हतलु, तेबी लेव्या कुळीन पुजारान डाहलु बास अब्राहम मलीकीसीदक्या काजे दसवु हीस्सु आप्यु। ने चु दसवु हीस्सु लीन अब्राहम काजे संयबरकत आप्यु, भले अब्राहम साते भगवान पेहलेन वायदु करलु। ईनी वातेम काय बी संका नी हय की, संयबरकत आपण्यु, चु संयबरकत देण्या सी मटु रवे। लेव्या कुळीन माणसे जे दसवु हीस्सु लेय, चे ते एक ने एक दाहड़ु मरन्यात छे। बाकुन तीना मलीकीसीदक्यान बारामां जां तेरी गवा दी छांडी, चु ते जलम लग जीवतेलु रवे। जां आपणु जो बी कय सकजे की लेव्यु जु दसवु वाटु लेण्या छे, चु लगुन जां तेरी अब्राहमेन साहरे दसवु वाटु आप्यु। काहाकी तीनी टेमे जत्यार मलीकीसीदक्यु अब्राहम काजे भेळु हवलु, तत्यार लेव्यु पयदा बी नी हयु ने पेहलेन अब्राहमेन डीलेम रय्न मलीकीसीदक्या काजे भेळु हवलु।
ईसु मलीकीसीदक्यान तसु छे
ईनु लेवी कुळीन साहरेत, माणसे काजे भगवानेन साहरे आपला कायदा जड़ला। कदी भगवान लेव्या कुळीन माणसे काजे पुजारान वाटु आपीन तींद्रे अनसारे आपणुक पुरा-पुरा पाक्का बणाय देतु, ती आपणुक दीसरु पुजारु मलीकीसीदक्या रीतीन अनसारे जलम लग पुजारान वाटु हात करीन, ने हारुनेन रीती नी कवाये। काहाकी जत्यार मलीकीसीदक्यान अनसारे पुजारान कामेन वाटु बदले, ती कायदा बी बदलनुत चाहजे। काहाकी तीना मलीकीसीदक्यान बारामां वात कह्ली छे, चु दीसरी कुळीन छे, ने तीनी कुळीन आज लग काहनु चुखली वेदी पर भगवानेन सेवा नी कर्यु। ईनी वात सी जी वात पाक्की हय की मालीक ईसु यहुदीयान कुळी मां पयदा हय्न आयु, बाकुन मुसु ईनी यहुदीया कुळीम सी एक पुजारु आवसे असु नी कह्यु।
ने मे जो कह्यु ची वात वारु चुखीझण उजेंती हय गुय, की मलीकीसीदक्यान तसु एक अळी पुजारु पयदा हय गुयु। भगवान ईना दीसरा पुजारा काजे मुसान साहरे लिखला नेम कायदान अनसारे नी, बाकुन खत्तम नी हवे तीना जीवनेन ताकुतेन अनसारे पुजारु बणायु। काहाकी तेरे बारामां भगवान जी गवाय देदु की “तु मलीकीसीदक्यान तसु जलम लग पुजारु बणीन रवसी।” ने तेर अनसारे कुय बी पाक्कु धरमी नी बणे। जे ते, लुल्ला ने फालतु छे। हेरेसी चे कायदा सर गुया। हेरेसी भगवान आपणु काजे एक असी बेसकु वारु आस आप्यु, तेरे साहरे आपणु भगवानेन्चां पुग सकजे।
भगवान पेहले सगुन खाये पाखुर दीसराक पुजारा बणायन कामे लागाड़तेलु। बाकुन ईसु मसी काजे सगुन खायलीन मुखी पुजारु बणायु। ईसु काजे पुजारु बणावणेन टेमे भगवान, सगुन खायलीन हेरे बारामां असु कह्यु,
“तु जलम लग मुख्यु पुजारु रवसी।
हव असु कय्न भगवान मालीक सगुन खादलु;
ने चु आपसु वीच्यार नी बदले।”
ईनी सगुनेन साहरे आपणु काजे जो मालुम पड़े की ईसु मसी भगवानेन ने माणसेन ईचमां एक वारलु ने पाक्का वायदान जामनी देण्यु बण गुयु।
तीना पुजारा काजे मुत झेलनेन दाहड़ा लग जीवणे नी देदली, हेरेसी तीने टेमे बेसका जणा काजे पुजारा बन्नु पड़तेलो। बाकुन जु ईसु मसी जलम लग जीवतेलु रवे; तेरेमां तेरु पुजारान वाटु, थुड़ाक दाहड़ान नी रवे बाकुन जलम लग रवसे। हेरे वजे सी जु पुजारु माणसे वाटे वीन्ती करने करीन जलम लग जीवतेलु छे। अळतेन जे बी माणसे ईना पुजारान साहरे भगवानेन्चां आवे, तीनु माणसेक जु पुजारु पुरु-पुरु छुटकारु आप सके।
जु डाहलु मुखी पुजारु चुखलु, ने खरलु, ने नी-गुनाळु हतलु, ने पापी माणसेन तसु नी हतलु, ने सरगे सी बी उचु हाकलायलु हतलु। ने असलुत डाहलु मुखी पुजारु आपणु काजे चाहजे। ने जु पुजारु आपसा डीलेन बादा चहड़ावीन एकुत कावा मां पापेन माफीन काम पुरो कर देदलु। हेरेसी ईना पुजाराक दाहड़ीन दीसरा डाहला पुजारान तसों आपसा पापेन माफी वाटे ने दीसरान पापेन माफी वाटे जनवार्या मारीन बादा नी चड़ावणु पड़े। मुसान कायदु ते, लुल्ला माणसे काजे डाहला पुजारान काम सुपे; बाकुन भगवान सगुन खाय्न जु वायदु कर्यु, चु वायदु तीना पुर्या काजे पुजारान काम सुपे, जु जलमसीत पुरु-पुरु पाक्कु बण गुयु हय।
Source notes (2)
- Footnote दसवु वाटु
- Footnote डाहा-डाहान डाहलु बास अब्राहम्यु
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.