ईब्‌रानी 5

1हामु जाणजे की, भगवान एकेक मुखी पुजारा काजे हारुन्‌या पुजारान घराणाम सी नेवाड़े ने भगवानेन ने माणसेन ईचमां रय्‌न माणसे वाटे भगवानेन सेवा करने करीन तीनाक कामे लागाड़े। चु भगवान अगळ अळी-अळीन माणसेन पापेन माफी वाटे भगवान अगळ भाती-भातीन बादा चड़ावे। 2ने चु डाहलु पुजारु आपसुत लुल्‌गाय सी घेरवायलु रवे, हेरेसी चु 1डेड़-अकल्‌या ने भुल्‌या भटक्‌या माणसे साते नीचळु वेहवार कर सके। 3हेरेसी तीनाक ते आपसान पापेन माफी वाटे जनवार्‌या मारीन पापेन माफी वाटे बादा चड़ावणु पड़े। 4मुखी पुजारु बणनेन वाटु ईज्‌जतेन वात छे, बाकुन कुय बी जु वाटु आपणे आप नी लेय; बाकुन भगवानुत एकेक जणा काजे डाहलु पुजारु बणावणे करीन नेवाड़े। जसु भगवान आपसुत, हारुन्‌या काजे मुखी पुजारु बणावणे वाटे नेवाड़्‌यु।

5हेरेसी ईसु मसी बी आपसा मन सी डाहलु मुखी पुजारु बणीन ईज्‌जत हात नी कर्‌यु,

बाकुन भगवानुत तीना काजे पुजारु बणायु,

ने तीनाक कह्‌यु, “तु मारु पुर्‌यु छे, ने मे आज सी तारु बास बण गुयलु छे।”

6हेरेसी दीसरे जागे बी कहलो छे,

“तु मलीकीसीदेक्‌यान तसु,

जलम भगवानेन 2पुजारु बणीन रवसी।”

7ईसु मसी ईनी धरती पर डील मां रवणेन टेमे, आयड़ी-आयड़ीन ने रड़ी-रड़ीन ने आसा पाड़ी-पाड़ीन, मरने सी बचाड़न्‌या भगवान धड़े लीलघाय ने दुवा करतेलु। ने चु आपसा काजे भगवानेन मरजी पुरी करने करीन तेरा हातेम सुपीन, आपसी खरली भक्‌ती देखाड़्‌यु। हेरेसी भगवान तेरी दुवा सामळी लेदु। 8चु भगवानेन पुर्‌यु हतलु, तेबी चु दुख झेल्‌यु ने दुख झेलीन हुकुम मान्‌ने सीक्‌यु। 9ने चु हुकुम मानीन पाक्‌कु हय गुयु, असु करीन ईसु मसी हुकुम मान्‌ने वाळा वाटे जलमेन छुटकारान वजे बण गुयु। 10ने भगवान तीना काजे मलीकीसीदेक्‌यान तसु मुखी पुजारान वाटु आप्‌यु।

भुरसा सी अलग हय जाणेन फळ

11हेरे बारामां मेसेक बेसकी वात कह्‌णु छे। बाकुन ची वात समजणु काठो छे, काहाकी तुंद्‌रा कान्‌टा बेहरा हय गुया। 12हय लग ते, तुहुं सीकाड़न्‌या बण जाणु हतलो, बाकुन आज लग ते, तुहुं काजे भगवानेन बुलेन सुरु वाळी वातुत, अळी सीकाड़नु पड़ रयो। असो लागे की आज लग तुहुं काजे नानला पुर्‌यान तसों दुत चाहजे, बाकुन खाणु नी चाहतो। 13जो आज लग दुत पीया करे, च हाल पुर्‌योत छे, ने तीनाक धरमेन वचनेन बारामां कम समज मां आवे। 14बाकुन वारलु खाणो ते तीनु मटला माणसे वाटे छे, चे तींद्‌रा जीवन मां वारलु भुंडा काजे उळखणे सीक गुया।