भगवानेन छाचला बुल
ईब्रानी 3
ईसु मुसा सी मटु छे
अळतेन आपणु ईसु काजे भगवानेन वगे सी मकेल्लु नेवताळु ने 1मुखी पुजारु करीन मानजे ने हुकारजे। ए मारा भाय बहणस्या, भगवान तुहुंक सरगेन हकदार्या बणने करीन बुलावलु छे; ने तुहुं बी भगवानेन चुखला माणसे बण गुयला छे। हेरेसी ईना ईसु पर तुहुं पुरो मन लागाड़ु। आपणु जाणजे की, जसु भगवानेन अघली वात बताड़न्यु मुसु भगवानेन घरना आखा माणसेन नफा वाटे, भगवान अगळ ईमानवाळु रय्न काम कर्यु, तसुत ईसु बी जु भगवान तीनाक नेवाड़लु, तेरे वाटे ईमानवाळु रय्न आपणेन करता काम करने बाजी रयु। काहाकी ईसु मुसा सी अतरु बड़ीन सेक-सींगार लायक समजी गुयु की जतरु घर बणावणे वाळु घर सी बड़ीन ईज्जत राखे। काहाकी हरेक घर काजे बणावणे वाळु रवे, बाकुन चु आखो काय बणायु चु भगवानुत छे मुसु ते भगवानेन आखा घरना चाकर्यान तसु भुरसु करे असु रयु, की जीनी वात काजे समजाड़ने वाळु हतलु तीनी वातेन गवाय आप्यु। बाकुन ईसु मसी ते भगवानेन पुर्यान रुप मां भगवानेन घरनान हकदार्यु छे, ने कदी आपणु हिम्मत राखीन भगवानेन साहरे आपली आस पर टेकला रवसु, ती आपणुत भगवानेन घरना माणसे छे।
नी भुरसान वीरुद मां चेतावणी देणु
तेरेमां चुखली जीव-आत्मा कह्वे,
“कदी आज तुहुं भगवानेन बुल सामळु,
ती आपणा मन काजे काठो मां करु।
जसा तुंद्रा डाहा-डाहा उजाड़्या बयड़ा मां करला।
तीनी टेमे तुंद्रा डाहा-डाहा मेसेक पारेखला,
ने चे चाळीस साल लग मारा वारु कामेक देखला।
हेरेसी मे रीसवायन तीनी पीड़ीन माणसेन बारामां असु कह्लु,
जे ते मारी वाट काजे उळखीन बी,
मारे वाट्ये नी चाल्या, ‘ईनु माणसेन भटकायण्यो मन छे।’
तत्यार मे मारी रीस मां आय्न सगुन खाय्न कह्यु,
‘छाचलीन चे मारा आरामेन जागा मां नी भराय सके।’”
ए भायस्यो ने बहणस्या, तुहुं चेतीन रवु, नीते तुंद्रो मन कुहर्यो ने भुरसु नी करने वाळो हय जासे, ने तुहुं जीवतेला भगवान सी छेटा हय जासु। बाकुन तुहुं, जत्यार लग आजुन दाहड़ु छे, तत्यार लग एक दीसराक हिम्मत आपीन समजाड़ता रहु, नीते कांखुर तुंद्रे मायन काहनुक पाप मां पड़ीन डेड़ अकल्यु बण जासे। काहाकी हामु ईसु मसीन हकेन हीस्सु लेसु। ती हामु आपणा पेहला भुरसा पर जलम लग बणीन टेकला रवसु।
जसों लिखलो छे;
“कदी आज तुहुं भगवानेन बुल सामळु,
ती आपणा मन काजे काठो मां करु,
जसा तुंद्रा डाहा-डाहा उजाड़्या बयड़ा मां आपसान मन काठो करला।”
भगवानेन बुल सामळीन बी भगवानेन वीरुद करीन काहना माणसे तीना काजे रीसवाड़्या? हेर राख्जु की, तीनु माणसे काजे भगवान मुसान साहरे, मीसरे देस मां सी छुड़ायन लावलु चेत माणसे भगवानेन वीरुद करीन तीनाक रीसवाड़ला। हेरेसी तुहुं ईनी वात काजे कमजुर घुण समजु ने भगवान चाळीस साल लग कुणी पर रीसवायलु? चु तीनु माणसे पर अतरुत रीसवायलु, जे माणसे पाप करला, तींद्रे पर भगवानेन डंड आयु, ने चे मरीन उजाड़्या बयड़ा मां पड़ी रया। ने भगवान कुणीन 2सगुन खाय्न असु कह्लु की, जे मारा आरामेन जागा मां नी भराय सके? भगवान तींद्रेत बारामां असु कह्लु, जे तेरु हुकुम नी मान्या। हेरेसी आपणु ज देखजे की, जे भगवान पर भुरसु नी कर्या, चेत आरामेन जागा मां नी भराया सके।
Source notes (2)
- Footnote मुखी पुजारु
- Footnote सगुन
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.