भगवानेन छाचला बुल
गलाती 4
मान लेवु की एक मालदारेन एकुत पुर्यु हय, ने चु तेरा आखा धनेन हकदार्यु हय। तेरा बंगला मां पुर्या राखवाळ्या ने पावर्या ने गुलाम पावर्या बी हय। तेबी जत्यार लग चु हकदार्यु पुर्यु हुस्यार नी हवे, चां लग आखी चीजेन मालीक हय्न बी चु आपसा घरेन गुलाम पावर्या सी मटु नी हय। तीना पुर्याक ते बासेन टाकली टेम लग, पुर्या राखवाळ्यान ने सामाळन्या पावर्यान कब्जाम रहणु पड़े, ने तीनाक आपसी मरजीन अनसारे नी जीवाये। ईसु मसी पर भुरसु करनेन पेहेले आपणु बी, ईना पुर्यान तसा रवता। आपणु ईनी कळीन रीती-भातीन ने नीयमेन कब्जाम रवीन गुलामी करतेला। बाकुन जत्यार भगवान बासेन टाकली टेम पुरी हय गुय, ती चु आपसा बेटा ईसु काजे ईनी धरती पर मकल्यु। चु एक बायर सी पयदा हयु, ने मुसा सी लिखला नीयमेन कब्जाम मां रवीन चे आखा नीयम फालतु जाय्न जीयु, तेरे सी चु ईसु, मुसा सी लिखला नीयमेन कब्जा मां रहणे वाळा आपणु आखा काजे छुड़ावे, ने आपणु काजे भगवानेन खुळे लेदला बेटा-बेटी बणावे।
हय हामु ने तुहुं आखा भगवानेन बेटा-बेटी बण गुयला छे, ने भगवान आपणा मन मां आपसा बेटासेन चुखली-आत्मा काजे मकेल्लु छे, जु चुखलु जीव-आत्मा आपणे भेळु भेसकायन भगवान काजे असु आयड़ीन बुलावे, “ए अब्बा, ए बास।” हय तुहुं नीयमेन गुलाम पावर्या नी हय, बाकुन भगवानेन बेटा-बेटी छे, ने हय तुहुं भगवानेन मरजी सी वारीस बण गुयला छे।
गलातीन मंडळी वाटे पोलुसेन फीकुर
पेहेल ते तुहुं भगवानेक नी उळख्या ने तेरु गुलाम हतला जु छाचलीन भगवान नी हय,1 बाकुन हय ते तुहुं खरला भगवान काजे उळखी लेदा, नीते असा कहणु चाहजे, की भगवान तुहुं काजे आपसान उळखाण कराड़्यु, ने हय तुहुं ईनी कळीन लुल्ली ने रीकामी रीती-भातीन ने नीयम भीणी काहा जाय र्या। तुहुं अळी ईनी सुरु वाळी वातेन गुलाम मां काहा हवणे हींडी र्या? ने आपसाक धरमी बणावणेन हर करीन, तुहुं खास दाहड़ान पाळनी ने खास महनान, ने खास तीहवारेन, ने खास सालेन पाळनी काहा पाळने बाजी गुया। तुंद्रे बारामां मे बीही र्यु, कांखुर मायन असो ते नी हय जाय, की जी मेहनत मे तुंद्रे वाटे करलु छे, ची फालतु हय जाय।
ए भायस्यो, मे तुंद्रे सी लीलघाय्न कहो, तुहुं मारेन तसा हय जावु, काहाकी मे बी तुंद्रेन तसु हय गुयु, तुहुं मारो काय बी नी बीगाड़्या। बाकुन तुहुं जाणु की पेहेलुत मे डीलेन कमजुरीन वजे सी तुहुंक खुस-खबर सामळायु। ने मारा डीलेन लुल्गाय वाटे तुहुंक एला करनु ते पड़्यो, तेबी तुहुं मेसेक हेटु समजीन फालतु नी जाण्या। बाकुन तुहुं मेसेक सरग काहवाळ्यु जु भगवानेन समजीन, एर सी बी जादा मेसेक ईसु मसी समजीन, मारी आव-भाव कर्या। ती ची तुंद्री खुसी कां गुई? मे तुंद्रु गवा छे, की तुंद्रु अतरु परम हतलु, की कदी मारे वाटे डुळा नीकाळीन आपणु पड़तो तेबी तुहुं डुळा लग नीकाळीन आप देदा। मे छाचली वात कय देदु करीन तुंद्रु दुस्मन बण गुयु काय?2 मे जाणो की थुड़ाक माणसे ईनु दाहड़ाम तुहुंक दुस्तीदार बणावणेन हर कर र्या, बाकुन भला वीच्यार करीन दुस्तीदार बणावणे नी हींडता, तुहुं हींद्रीत हर करनु चाहजे करीन जे माणसे झुटी सीकापण आपीन तुहुं काजे मार सी आंग्ये कर र्या। भली वाते वाटे हर करनु, घणो वारु छे, ने च मे ईतरीक वार नी बाकुन जलम भली वाते वाटे हर करनु चाहजे। ए मारा पुर्या-पारी, हय लग तुहुं नानलात छे काय? मे तुंद्रे वाटे तीनी फवरी हवणेवाळी बायरीन तसु दुख सेण कर रयु, ने जत्यार लग तुहुं ईसु मसी मां पुरा पाक्का नी हवे, ती लग मारो मन दुख्या करे। नांबे रवीन तुहुंक कसु समजाड़ो, ज मेसेक समज मां नी आवतो। मारी हर ते जी छे, की मे तुंद्रेन्चां आवीन आंबु-सांबु धीरु रय्न वात करो, बाकुन हय ते लिखणुत पड़ रह्यो।
सारा ने हाजीरान दाखलु
तुंद्रे मायन थुड़ाक मुसान नीयमेन कब्जा मां ते रहणेन हर ते कर रया तीनु काजे मे एक वात पुछो, तुहुं मुसा सी लिखली नीयम मां जी वात नी सामळ्या काय? अब्राहमेन दुय पुर्या हतला, एक पुर्यु ते आपसी लाडी सारा सी पयदा हयु, ने दीसरु पुर्यु ते गुलाम पावरनी हाजीरा सी पयदा हयु।3 जु पुर्यु गुलाम पावरनी सी हयु, चु डीलेन मनेन अनसारे पयदा हयु। ने इसाक जु अब्राहमेन लाडी सी पयदा हयु, चु ते भगवानेन वायदान अनसारे पयदा हयु। ईनी वाते मां दाखलु छे, जे बायरा मानु की दुय वायदा छे, एक ते सीनाय उचु बयड़ान, तेरेमां सी गुलाम्यात पयदा हवे; ने ची हाजीरा छे। ने हाजीरा मानु अरबेन सीनाय उचु बयड़ु छे, ने हय्न यरुसलेम तेरेन तसों छे, काहाकी हयी आपसा पुर्या समोत गुलाम मां छे। बाकुन उपरनी यरुसलेम सहर बांदायली नी हय, ने ची आपणी माय छे। काहाकी लिखलो छे,
ए आंझी, तु भारीस हय्न फवरी नी हवे,
तेबी खुस हय जां, फवरी हवणे करीन,
तारा दुखेन पीड़ा नी हवती, तेबी आयड़ी आयड़ीन खुसीन गीत गांव,
काहाकी छुड़ली बायरीन अवल्यात सी जादा हवसे, तेरु धेणी छे।4
ए भायस्यो ने बहणस्या, आपणु इसाकेन तसा वायदान अवल्यात छे। जसु डीलेन मनेन अनसारे पयदा हवण्यु इसमायेल तीने टेमे, भगवानेन जीव-आत्मान जुरेन अनसारे पयदा हवण्या इसाक काजे एला पाड़तेलु, तसोत हय बी हवे।5 बाकुन वीच्यार करु, चुखला सास्तुर मां काय कहें? “गुलाम पावरनीन पुर्या काजे, खास बायरीन पुर्या भेळतु नी रहे ने गुलाम पावरनीक ने तेरा पुर्या काजे बाहर नीकाळ देवु।”6 ए भायस्यो ने बहणस्या, आपणु तीनी गुलाम पावरनीन अवल्यात नी हय, बाकुन तीनी खास बायरीन अवल्यात छे, जी गुलाम नी हवती, ने मुसान नीयमेन गुलामी मां सी आपणुक छुटकारु जड़लु छे।
Source notes (6)
- Footnote यसाया 37:19, यीरम्या 2:11
- Footnote आमोस 5:10
- Footnote कळ घड़ाय 16:5, कळ घड़ाय 21:2
- Footnote यसाया 54:1
- Footnote कळ घड़ाय 21:9
- Footnote कळ घड़ाय 21:10
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.