भगवानेन छाचला बुल
गलाती 2
ईसुन दीसरा नेवताळा बी पोलुसेन साहरे परचार करली खुस-खबर मां राजी हवे
दस ने चार साल हय गुया, ने अळतेन मे अळी यरुसलेम मां गुयु। तत्यार बरनाबास बी मारे पुठ्ये हतलु, ने मे तीतुस काजे बी पुठ्ये ली गुयलु। भगवान मेसे काजे यरुसलेम जाणे करीन चुखो झण कह्लु, ने मे चां गुयलु। ने मे चां आड़जात्या माणसे काजे जी खुस-खबर सामळावो, तीनी खुस-खबरेन वात मे चां वाळी ईसुन मंडळीन मुख्याक बी समजाड़ीन कह्यु; बाकुन मंडळीवाळा दीसरा माणसे अगळ उजेंतु नी कह्यु, कांखुर मायन मारी खुस-खबर बमदीन परचार करनेन पेहली ने हय्न मेहनत, झुटी सीकापण सी फालतु नी हवणु चाहजे, करीन मे जी वात मंडळीन आखा मुख्या काजे कय देदु। बाकुन तीतुस काजे बी जु मारे साते हतलु, ने जु युनानी आड़जात्यु हतलु। तेरेमां तीनाक पेहेरवोटन अघली चामड़ी काट करीन नी कह्यु। असो तीनु लुच्चा भायसेन वजे सी हयो जे चुरी सी भराय गुयला, की तीना छुटला हवणे करीन जो मसी ईसु मां हामुक जड़ी, समज लीन हामुक सेवा करने वाळा बणावे। एक कावु बी तींद्रे हक मां हामु नी हया, काहाकी खुस-खबरेन छाचलो तुंद्रेम बन्लो रहे।
भगवान ते काहनान मुंहडो देखीन तेरे अगु वळन्यु नी हय, ने ईनी वातेन मारी फीकुर नी हय की माणसे मार सी यरुसलेम वाळी ईसुन मंडळीन तीनु मुख्यान अदु ईज्जत करता आय र्या, ने तीनुक अदु मटा समजे, बाकुन तेबी जी खुस-खबर तु सामळावे तेर साते थुड़ीक दीसरी वात भेसकीन सामळावणु चाहजे करीन चे मुख्या माणसे मेसेक नी कह्या।1 बाकुन तेरो उल्टो जत्यार चे देख्या, की फतरी काटण्या माणसे वाटे खुस-खबरेन काम पतरस काजे सुपायलो तसोत, नी फतरी काटण्या माणसे वाटे मेसेक खुस-खबर सामळावणे करीन सुपलो छे। काहाकी जु पतरस सी फतरी काटण्या करतेलु मां नेवताळान काम मटुत असर पड़े तसु कराड़्यु, ने हयुत मार सी बी आड़जात्या मां मटु असर सात मां काम कराड़्यु। ने मुख्यान डाहला मुख्या याकुप, केफा ने युहन्नु मारे पर भगवानेन गीण-दयान सी हवला तीना सेवान काम काजे खाम्बा मान लेदा, ने चे मेसेक ने बरनाबास काजे आपसा साजल्या समजीन सात संगात मां ली लेदा। ने चे असी बुली देदा की तुहुं नी-यहुदी मां खुस-खबर सामळावता रवजु, ने हामु फतरी काटड़न्या यहुदी माणसे मां सामळावता रवजु। चे हामुक अतरोत कहींन अगवाय कर्या की तुहुं गरीब माणसेन हेर करीन तींद्री मदत करु। ने असला कामेक करने करीन मे पेहलुत तीयार हतलु।
पोलुस पतरस काजे लड़े
बाकुन जत्यार केफा अन्ताकीया मां आयु, ती मेसेक तीनाक उजेंतु लड़नु पड़्यो, काहाकी चु वारु काम करनु छुड़ देदलु।2 अन्ताकीया मां थुड़ाक दाहड़ा लग ईसुक मान्या आड़जात्या माणसे भेळु बसीन खाया करतेलु, बाकुन एक दाहड़ु यरुसलेम सी थुड़ाक यहुदी माणसे डाहला मुख्या याकुपेन नाव लीन आय लाग्या। तत्यार चु तींद्री सामळीन असु वीच्यार करीन बीही गुयु की बाहरला फतरी काटाड़न्या यहुदी माणसे हय काय करसे? ने चु ईसुक मान्या आड़जात्या माणसेन सात संगात छुड़ीन एक धड़े हय गुयु।3 ने ज देखीन ईसुक मान्या चां वाळा यहुदी माणसे पतरसेन तसा ढंगड़ा करने बाजी गुया ने बरनाबास बी। बाकुन मे ज देख्यु की केफा ने दीसरा, खुस-खबरेन छाचली वात पर हय नी चालता, ती मे आखा अगळ पतरस काजे उजेंतु लड़ीन कह्यु, “तु यहुदी माणुस हय्न बी, यहुदी माणसेन नीयम तुड़ीन आड़जात्या माणसे भेळु खात्लु, ती हय तु आड़जात्या काजे यहुदी माणसेन तसा जीवु करीन कसु जुर कर सके?”
भुरसु ने काम
“आपणु ते पयदावारी सीत यहुदी माणसे छे,” ने आड़जात्या माणसे मायन नी हय, तीनुक दीसरा यहुदी माणसे पापी कह्वे। तेबी आपणु जाण लेदा की मुसा सी लिखला नीयम पाळनेन वजे सी कुय बी माणुस धरमी नी बणे, बाकुन ईसु मसी पर भुरसु करने सी माणसे पापेन कब्जाम सी छुटीन भगवानेन नींगा मां धरमी बण जाय। ने आपणु बी पाप सी छुटकारु हात करने करीन मुसा सी लिखला नीयम काजे पाळने छुड़ीन ईसु मसी पर भुरसु कर्या। खरला कायदा पाळने सी कुय काजे पाप सी छुटकारु नी जड़े।4 आपणु ते ईसु मसी मां भुरसु करने सी धरमी गीणायणेन हेर कर र्या, बाकुन थुड़ाक माणसे आपणुक देखीन असु वीच्यार करे की जे ते मुसान नीयम कायदाक पाळनु छुड़ देदा ने चे पापी छे; असो हय ती ईसु मसी आपणुक पाप करान्यु गुनाळु चाकर्यु गीणाये काय? कदी नी। कदी मे ईनी वातेक छुड़ देदु तीनी वातेक हय अळी पछु पाळने बाजी जाम, असो हय ती ते मे आपसात काजे मे गुनाळु छे करीन गवा दी रयु। बाकुन मे ईनी वातेम गुनाळु नी हय। मे ते मुसा सी लिखला नीयम अनसारे नीयम वाटे मर गुयु, काहाकी भगवान वाटे जीवो ने समजो की मे भगवान भेळु जीवो करीन ईसु मसी पुठ्ये आपसा काजे कुरुस पर चड़ाय देदलु छे, ने मर गुयलु छे। ने हय मे जीवतेलु नी हय बाकुन ईसु मसी मारेम जीवतेलु छे। ने मे हय बी डीलेम जीवतेलु रय रयु, बाकुन मे भगवानेन बेटास ईसु पर भुरसु करने सी जीवतेलु रय रयु, जु मेसेक परम कर्यु, ने मारे वाटे आपसा जीव काजे कुरुस पर चड़ाय देदु। कदी मुसान लिखला नीयम पाळने सी धरमी बण जाता ती ईसु मसीन मरनु फालतु हय जातो; करीन मे मारे पर हवली भगवानेन ईनी गीण-दया काजे कदी बी फालतु हवणी नी दम।
Source notes (4)
- Footnote लेवयवेवस्था 10:17, 2 कुरी 11:5
- Footnote गला 2:14
- Footnote नेवता 10:28, नेवता 11:2-3
- Footnote रोमी 3:20-22, फीली 3:9
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.