भगवानेन छाचला बुल
नेवताळा 6
सात चाकरी करन्या काजे नेवाड़े
तीनु दाहड़ाम जत्यार माणसे जादात ईसुन चेला बणीन ईसु मां भेसकाया। ती युनानी बुली बुलन्या, ज कहीन कुर-कुर करने बाजी गुया, “दाहड़ीन खाणाम ने समान वाटे, ती हामरा रांडायला बायरा काजे टाळ देय ने तीनुक काय नी आपे।” तत्यार ईसुन बारे नेवताळा, चेलान बसक बुलावीन कह्या, ज वारु नी हय की हामु खाणु वाटणेन करता वारती बणीन भगवानेन बुल छुड़ देजे। तेरेसी ए भायस्यो, तुहुं आपसा मां सी वारलु गुण वाळा अदमी काजे नेवाड़ लेवु, तींद्रेम चुखली-आत्मा पुरु-पुरु भरायलु छे, ने चे अक्कल वाळा ने ईमानदार छे, ने हामु तीनुक खाणु ने समान वाटणेन हक आप देसु। बाकुन हामु भगवान धड़े दुवा करता रवसु ने भगवानेन बुलेक वाटणेन चाकरी करता रवसु।
जी वात सामळीन आखा माणसे खुस हय गुया। ने चे स्तीफनुस काजे नेवाड़ लेदा तेरेमां चुखली-आत्मा पुरु-पुरु भरायलु हतलु, ने चु ईसु पर पाक्कु भुरसु करन्यु हतलु। ने चे फीलीप्पुस काजे, ने पुरखुरुस काजे, ने नीकानोर काजे, ने तीमोन काजे, ने परमीनास काजे, ने अन्ताकीया वाळा नीकुलावुस काजे जु यहुदी धरम काजे मान्ने बाजी गुयलु हतलु, नेवाड़्या। ने चे तीनुक ईसुन नेवताळा अगळ उबा कर देदा ने ईसुन नेवताळा तीनु नेवाड़ला वाटे भगवान धड़े दुवा कर्या ने अळी तींद्रे पर आपसा हात मेल्या।
भगवानेन वात फेलायती गुय, ने यरुसलेम मां बेसका ईसु पर भुरसु करीन चेला बण गुया; ने भगवानेन डाहला पुजारान मट्लु टुळु ईना ईसुन भुरसा काजे मान लेदा।
स्तीफनुस काजे धरीन ली जाणु
स्तीफनुस भगवानेन गीण-दया ने भगवानेन जुरे सी भरायन माणसे मां सहलाणीन वारु काम देखाड़तेलु। तीनी टेमे छुट्ला-माणसे नावेन यहुदी माणसेन भक्तीन घरे मायन हतला, कुरेनी ने सीकेन्दर्या ने कीलक्या ने आसीयान माणसे मां सी एक-एक जणु उठीन बेसका जणा स्तीफनुस साते वातेम जखड़ी पड़ने बाजी गुयला बाकुन स्तीफनुस भगवानेन चुखली-आत्मान अगवाय मां ने भगवानेन अकलेन अगवाय मां बुलतेलु तेरेसी तीनुक स्तीफनुसेन वात काटायी नी सकी। तेरेसी चे पयस्या आपीन थुड़ाक अदमीक जी झुटी गवा देवाड़्या, “हामु ईना स्तीफनुस काजे मुसान ने भगवानेन नाव-बद्दी करतेलु सामेळला छे।” असा करीन चे माणसे काजे, ने पुडारी काजे ने यहुदी-धरम सीकाड़न्या मास्तर्या काजे भड़कावीन उचकाणुन स्तीफनुसन्चां आय लाग्या ने तीनाक धरीन मट्ली बसक अगळ ली गुया। ने चां चे झुटा गवा उबा कर्या, ने चे झुटा गवा देण्या कह्या “जु अदमी दाहड़ीत ईना चुखला मंदीरेन ने मुसान साहरे लिखली सास्तुरेन नाव-बद्दी करे।” काहाकी हामु ईनाक ज कवतेलु सामेळला छे, “ईसु नासरी ईना मंदीर काजे उदार देसे, ने मुसान साहरे आपली रीती-भातीक बद्ली देसे।” मट्ली बसक मां बसला आखा माणसे स्तीफनुस भीणी एक हेट्या देख रवला, ती तीनुक, स्तीफनुसन मुंहडान सीकु सरग काहवाळ्यान तसु देखाय देदु।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.