भगवानेन छाचला बुल
नेवताळा 11
पतरस यरुसलेम मां नी-यहुदी माणसेन गवा देय
ईसुन नेवताळा ने आखा यहुदीया जीला मां रहण्या ईसु पर भुरसु करन्या भाय-बेटा असा सामळ्या, की नी-यहुदी माणसे बी भगवानेन बुल मान लेदा। जत्यार पतरस यरुसलेम मां आयु, ती फतरी काटणेन बारामां माणसे पतरसेन वात काटीन वाते-वातेम लड़ाय पड़्या। ने कह्या, “तु नी-यहुदी माणसेन घर मां भरायु, ने तींद्रे भेळतु खाणु खादलु छे।” ती पतरस, जो काय हयो चो आखो सुरु सी आकरी लग एकेक करीन समजाड़तु जाय्न कह्यु,
मे याफा सहर मां भगवान धड़े दुवा करने बाजी रवलु, ती मे चुखली जीव-आत्माम हय गुयु ने मारी चेत नी रयु ने मे जागतो-सपनो देख्यु, ने तत्यारुत सरग उघड़ी गुयो, ने चादरान तसों लांबो-चवड़ो काहनीक चीज काजे सरगे सी आथराय्न उतरीन मार भीणी आयो, ने तेरा च्यारु खुणा धरती पर मेकाय गुया। मे तीनी चीजेक धीयान सी देख्यु। धरतीम आखी भातीन च्यारपाया जनवार्या, जंगली जनवार्या, ने घीसाय्न चालन्या जनवार्या ने सरगेन चिरला हतला। ने मेसेक एक बुली सामळाय की ए पतरस! उठ, ने ईनुक मारीन खा। बाकुन मे कह्यु, ए मालीक! मे ईनुक कदी मारीन नी खाम। काहाकी मे, मुयळ्ळी वीटेळ्ळी चीज आज लग नी खादु। तेबी ची बुली दीसरी कावा अळी सरगे सी मेसेक सामळायी, भगवान तीनी चीजेक चुखली कवलु छे, तीनी चीजेक तु वीटेळ्ळी घुण कवे। असो तीन कावा हयो; ने अळी चो चादरा साय चीज सरगे मां पछी हाकलाय गुयो। ने अळी तीनु तीन अदमी काजे केसर्या सहरेम सी मारेन्चां मकल्यु, चे अदमी तीना घर मां हामु हतला, चां आय लाग्या। तत्यार आत्मा मेसेक हुकुम आप्यु की तु हींद्रे पुठ्ये बे फीकर्यु हय्न जां। ने जे छव भायस बी मारे पुठ्ये चाल पड़्या; ने हामु तींद्रे पुठ्ये केसर्या सहरेम तीना कुरनेलीयुसेन घर गुया। ने चु हामुक देखाड़्यु की मेसेक सरग वाळु भगवानेन अघली वात बताड़ने वाळु मार घरमां उबु हय रवलु देखाव पड़्यु, चु मेसेक कह्यु, तु याफा सहर मां तारा माणसेक मकलीन सीमोन काजे बुलाय ले, जु पतरस कवाये। चु असी वात कवसे, तेरे साहरे तु ने तारो घराणो छुटकारु हात करसे। ने जत्यार मे चां जाय्न तीनुक वात देखाड़ने बाजी गुयु, ती चुखली-आत्मा तींद्रे पर उतर्यु, जसु आपणे पर सुरु मां उतरलु। तीनी टेमे मेसेक मालीकेन जु बुल हेर आयो, युहन्नु ते पाणी मां बपतीस्मा आपतेलु, बाकुन थुड़ाक दाहड़ा वीत जासे, ने अळी तुहुं काजे चुखली-आत्मान बपतीस्मा आपसे। जत्यार भगवान तीनु नी-यहुदी काजे बी हयुत वाटु आप्यु जु आपणुक मालीक ईसु मसी पर भुरसु कर्या करीन आप्यु; ती हामु कुण कहवायजे, जे भगवानेन काम काजे रुक्जे? जी वात सामळीन चे खुड़ काडण्या माणसे धीरा पड़ गुया, ने चे भगवानेन बड़ाय करने बाजी गुया, “ती ते भगवान नी-यहुदी काजे बी अमर जीवाय आपणे करीन तीनुक पाप भीणी सी मन फेरवीन भगवान भीणी वळनेन वाटु आप्लु छे।”
अन्ताकीया मां मंडळी
स्तीफनुसेन बाहने माणसे यरुसलेम मां जबरान ईसुन माणसेक वेला पाड़नु सुरु कर देदा। ने ईसुन माणसे रावण्या-तीवण्या हय्न एराय गुया, फीरता-फीरता चे फीनीके ने कुपरुस ने अन्ताकीया, सहर मां पुग्या; बाकुन चे ईसुन माणसे ईसुन खुस-खबर यहुदी माणसेक अतरात सामळावतेला। बाकुन तीनु ईसुन चेला मायन थुड़ाक कुपरुस मां रवण्या, ने कुरेन मां रवण्या हतला, जे अन्ताकीया आवीन नी-यहुदी माणसे काजे बी मालीक ईसुन खुस-खबर सामळावणे बाजी गुया। ने मालीक ईसुन ताकत तींद्रे पुठ्ये हतली, ने बेसका माणसे मालीक ईसु पर भुरसु करीन मालीक ईसु भीणी वळ गुया।
यरुसलेम मां रवण्या ईसुन मंडळी मां बी जी वात पुग गुय, ने चे बरनाबास काजे अन्ताकीया सहर मां तींद्रेन्चां मकली देदा। ने बरनाबास चां जाय्न भगवानेन गीण-दया देखीन बेसकु खुस हयु; ने आखाक सीकाड़्यु, की तुहुं डील ने मन लागाड़ीन मालीक ईसु पर भुरसु करता रवु। काहाकी बरनाबास एक वारलु माणुस हतलु; ने चुखली-आत्मा तेरेमां उगेळ्तु भरायलु हतलु ने ईसु पर तेरु भुरसु बी पक्कु हतलु। ने असा बेसका माणसे मालीकेन चेला बणीन तींद्रे पुठ्ये भेसकाय गुया।
तत्यार बरनाबास सावुल काजे हेरने करीन तरसुस सहर जात रयु। ने चु तीना सावुल काजे हेरीन अन्ताकीया सहर मां ली आयु, ने चे एक साल लग ईसुन मंडळी काजे भेळा हवता रया, ने बेसका माणसेक सीकाड़ता रया, ने अन्ताकीया मां माणसे आखान पेहले ईसुन चेला काजे मसी कवणे बाजी गुया।
तीनु दाहड़ाम भगवानेन अघली वात बताड़ने वाळा माणसे यरुसलेम सी अन्ताकीया सहर मां आया। तींद्रेम अगबुस नावेन एक जणु उबु हय्न भगवानेन चुखली-आत्मान अगवाय मां कह्यु, आखी कळी मां काळ पड़ने वाळु छे। जु काळ राजान राज क्लोदीयुसेन टेमे पड़लु। तत्यार ईसुन चेला जु वीच्यार कर्या की एकेक जणु आपसा-आपसा रुप्या-टकान अनुसार यहुदीया जीलाम रवणेवाळा आपणा भाय-बेटान सेवा चाकरी वाटे ईतराक रुप्या-टका दी मकेलसु। ने चे तसा वीच्यार्या तसात कर्या; ने चे पुडार्यान्चां, बरनाबास ने सावुल काजे रुप्या-टका दी मकल्या।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.