भगवानेन छाचला बुल
1 तीमुथी 4
लुच्चाय वात सीकाड़न्या सी चेतीन रवु
बाकुन भगवानेन चुखली-आत्मा चुखी झण असी कह्वे की, आवणे वाळा थुड़ाक दाहड़ा मां लुच्चा माणसे, चे भुतड़ान जमेन वाये लागीन मंडळीन माणसेक ढंगड़ा करीन भुतड़ान जमेन भोंगलाड़नी वात सीकणे बाजी जासे, तीनु सीकाड़न्यान वात सामळीन थुड़ाक माणसे तींद्रे वाये लाग जासे, ने ईसु पर सी भुरसु छुड़ीन भटकी जासे। ज तीनु लुच्चा माणसेन घमंडीन वजे सी हवसे जसों चामड़ो तात्ले लुहड़े डामणे सी बेहरो फट हय जाय। चे ईयाव करने सी रुकसे ने खाणो-खाणेन थुड़ीक चीजे सी छेटा रवणेन हुकुम आपसे तीनुक भगवान हेरेसी बणावलु की भगवान पर भुरसु करन्या ने छाचाय काजे उळखणे वाळा हीनाक तु बेसकु वारु करीन कय्न खाणो खासे।1 काहाकी भगवानेन बणावली आखी एकेक चीज वारु छे ने कुय चीज बेकार नी हय बाकुन ज की तु बेसकु वारु करीन कय्न खाणु चाहजे। काहाकी भगवानेन वायदु करला बुलेन अनसारे दुवा करने सी आखो काय चुखो हय जाय।
ईसु मसीन वारलु पावर्यु
कदी तु भायस्यो ने बहणस्या काजे हीनी वातेन हेर कराड़तु रवजी, ती ईसु मसीन वारलु पावर्यु बणसी, ने भुरसु ने तीनी वारलु सीकाड़ली वात सी च तु मान्तु आय रयु तारी चुखली-आत्मा मां वारु पुसायतु आय रयु। बाकुन वीटेळ्ळा ने डाहली बायरीन आस दाखला सी छेटे रहु, ने भगवानेन भक्ती करनेन वात पर मन लागाड़्या कर। एक दाखलान साहरे मे तुसेक जी वात समजाड़ो, डीलेक मेहनत करीन सीकाड़ने सी थुड़ुक नफु जड़े। बाकुन भगवानेक गमे असी जीवाय जीवणे करीन आपसाक सीकाड़ने सीत आखे भात्ये नफु हवे। असो करने सी, धरती पर वाळी जीवाय मां बी, ने सरगेम आवणे वाळी अमरकायान जीवाय मां बी नफु जड़से। भगवान असुत वायदु करलु छे; अतरे भगवानेक गमे असी जीवाय जीवणे करीन आपसाक सीकाड़तु रव। जी वात संय छे, ने तुहुं आखी भातीन वातेक मानीन जीवजु। काहाकी हामु मेहनत ने कुसीस हेरे वाटे करजे की हामरी आस हीना जीवतेला भगवान पर छे जु आखा माणसेन ने खास करीन भुरसु करन्यान छुटकारु छे।
तु ईनी आखी वातेन हुकुम आप ने सीकाड़तु रव। काहनाक तु जुवान्यु छे करीन तुसेक2 हेटु नी समजणु चाहजे। बाकुन बुल ने वेहवार ने परम, ने भुरसु ने चुखली जीवाय जीवणे मां बी दाखलु बण जां। जत्यार लग मे नी आवो; तत्यार लग नी माणसे काजे खरली सास्तुर भणीन सामळावतु रव, ने तेरेत अनसारे तीनुक समजाड़तु रव, ने सीकाड़तु रव। जत्यार मुख्या भेळा हय्न तारे पर हात मेकला ती जड़ला, भगवान सी दुवा करला, तीने टेमे भगवानेन अघी सी आवणे वाळी वात बताड़न्या माणुस, भगवान पुठ्ये हय्न तारे बारामां वात कह्लु; तीने टेमे भगवान जु खास वाटु तुसेक आपलु तीना वाटाक रीकामु घुण रहणी देय। हीनी वात काजे हेर करतु रव ने हेरेत मां तारो मन लागाड़तु रव, तत्यार ते तारी चुखली-आत्मा ताकत ने सेवान हर ने हुनर आखा अगळ उजेंती हय जासे। तु भगवानेन कह्याम जापताये जीवजी ने जापताये सीकाड़जी असुत कर्या करजी तत्यार ते तु बी छुटकारु हात करसी ने तारी सामळने वाळा बी छुटकारु हात करसे।
Source notes (2)
- Cross-reference उबजाणनी किताप 9:3
- Footnote तुच्छ
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.