भगवानेन छाचला बुल
1 थीसलुनीकी 4
चुखा हवणेन बुलावु
ए भायस्यो ने बहणस्या, भगवानेन मरजीन अनसारे कसों जीवणु छे, ने तीनाक कसों खुस करनु छे; ईनी वातेन सीकणु तुहुं हामरे धड़े सी सीक लेदा, ने ईनी सीकणेन अनसारे तुहुं जीवता आय रया। हय हामु मालीक ईसुन नावे तुंद्रे धड़े लीलघाय करीन तुहुंक ज समजाड़जे, भगवानेक खुस करता जाय्न जीवणे मां तुहुं अगा बड़ता जावु। काहाकी तुहुं जाणु की हामु मालीक ईसु भीणी सी तुहुंक काहनी-काहनी हुकुम बताड़्या। तुहुं चुखला रहणु चाहजे; जीत भगवानेन मरजी छे; मतलब छीनाळा सी छेटे रहु। ने तुंद्रे मां सी हर एक जणु चुखलु ने ईज्जत करीन आपणी लाडी साते रहणे जाणे। छीनाळाय ने चंगली हेर सी छेटे रवजु। भगवान काजे नी जाणे, असला नी-यहुदीया माणसेत असी हेर करे। की हीनी वात मां कुय बी आपसान भाय काजे नी ठगे ने अळी नी तेरे पर दावु लागाड़े, काहाकी मालीक असली आखी वातेन हीसाब लेण्यु छे। जी वात हामु पेहेल बी कहीन तुहुं काजे चेतावला। काहाकी भगवान आपणु काजे वीटाळने करीन नी बुलायु, बाकुन तेरी नींगाम चुखला रहणे करीन बुलावलु छे। हेरे वजे सी जु कुय हीनाक नानु जाणे तीना माणुस काजे नी बाकुन भगवान काजे नानु जाणे चु तेरी चुखली-आत्मा तुसेक आपे।
मंडळीन भाय-बहणस्यान परमेन बारामां तुहुं काजे लिखणु जरुड़ी नी हय, काहाकी तुहुं काजे आंबा-सांबा परम करनेन वात भगवान सी सीकला छे। ने आखा मकीदुनीया जीलान आखा मंडळीन आखा भाय-बहण्स्या काजे परम कर रया। तेबी अतरोत घुण कहुं। ए भायस्यो ने बहणस्या, हामु तुहुं काजे समजाड़जे की तुहुं आंबा-सांबा बी जादा परम करता जावु। ने जसा हामु तुहुं काजे पेहेल हुकुम आपीन कहला तसात हय बी कवजे की दीसरान काम-धंदा मां अड़चन मां नाखु। आपसोत काम करता रवु, ने खुदेन हातेन कमाय सी खावु। तत्यार तुहुंक कसरायला माणसेन तसा दीसरान भुरसे रहणु नी पड़े, ने मंडळीन बाहरना माणसे बी तुंद्री जीवाय देखीन तुहुंक वारु कवसे।
मालीकेन पछु आवणेन
ए भायस ने बहणस्या, हामु नी चाहता की तुहुं तींद्रा बारामां जे सुय गुयला चे तींद्रा बारामां अंजाण्या1 रहु, असो नी हवे की तुहुं दीसरान तसा रड़ु ने कलप्या करु, तीनुक काय बी आस नी रवे। कदी हामु भुरसु करजे की ईसु मर गुयलु, ने पछु जीवतु बी हय गुयु अतरामा जे ईसु पर भुरसु करीन मर गुया, भगवान तीनुक बी पछा जीवता करीन ईसु पुठ्ये ली जासे।
काहाकी हामु मालीकेन बुलेन अनसारे ज कह्जे जत्यार ईसु कळीम पछु आवसे, तत्यार ईसु पर भुरसु करन्या मरला भाय-बहणस्या जीवता हय्न ईसुक भेटणे पेहेल जासे। अळतेन आपणु जे जीवतेला छे, ने ईसुक आवता लग जीवतेला रवसु, तींद्रे पछळ ईसुक भेळा हवणे जासु। काहाकी तीने दाहड़े, पेहेल मालीक ईसु खुद सरगे सी उतेरतु जाय्न कुर्रु दीन बुलावसे। तीने टेमे एक मटला सरग वाळा खबर लावण्यान अवाज सामळायसे। एक सरग वाळु खबर लावण्यु, भगवान अगे सी फेप्या वाजाड़से। तत्यार जे ईसु मसी पर भुरसु करता जाय्न मर गुया, चे पछा जीवता हवसे। तत्यार आपणु बी जे जीवतेला रवसु, ने बचला रवसु, ईसुक भेळा हवणे करीन वादळा मां हाकलायन जासु। ईसुक मान्या आपणु आखा, सरगेम ईसु साते भेळा हवसु, ने असा करीन चां आपणु जलम मालीक ईसु पुठ्ये रवसुन। हेरे वजे सी तुहुं जी वात कहीन एक दीसरा काजे हिम्मत आप्या करु।
Source notes (1)
- Footnote अंजाण्या अज्ञानी
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.