भगवानेन छाचला बुल
1 थीसलुनीकी 2
पोलुस थीसलुनीकाय मंडळीक, तींद्रा ईचमां हवला सेवान कामेन बारामां हेर कराड़े
ए भायस्यो ने बहणस्या हामरो तुंद्रेन्चां आवणु फालतु नी हय, जी वात ते तुहुं काजे मालुम छे। तुहुं जाणु की फीलीपी सहर मां ईसुन खुस-खबर सामळावणे गुयला, ती माणसे खुस-खबरेन बेसका वीरुद कर्या, ने हामुक बेसका वेला पाड़्या, तेबी हामु भगवानेन भुरसे, बीहे बीगुर तुंद्रेन्चां आया, ने तुहुं काजे ईसुन खुस-खबर सामळाया। जी वात बी तुहुं काजे मालुम छे। काहाकी हिम्मत सी तुहुंक सीकाड़नु ने नी भरम सी छे ने नी वीटेळ्ळा सी छे, ने नी धुका सी छे। बाकुन जसु भगवान हामुक कामका समजीन खुस-खबर सुपलु, हामु तसात बताड़जे; ने हामु माणसे काजे खुस करनेन कुसीस नी करजे बाकुन हामु ते तीना भगवान काजे खुस1 करजे चु हामरा मनेन वात काजे पारखे। हामु तुंद्रे धड़े सी फायदु लेणे करीन, तुहुं बेसका वारु छे कय्न तुंद्रेन्चां कदी नी आया। ने हाय करीन हामु कदी ढंगड़ा नी कर्या। जी वात बी तुहुं जाण रया ने भगवान बी ईनी वातेन गवा छे। हामु काजे माणसे भीणी सी ईज्जत नी चाहती, हव तुंद्रे भीणी सी बी, नी ने दीसरा भीणी सी बी ईज्जत नी चाहती।
हामु ते ईसु मसीन नेवताळा छे असा कय्न तुंद्रे पर हक जमाड़ सकजे; बाकुन तेबी हामु तुंद्रे साते असु दया कर्यु, जसी माय आपसा पुर्या काजे दुत पीयाड़ीन पाळे पुसे। हामु तुंद्री बेसकी हेर करीन परम कर्या। तुहुं हामरे वाटे लाटेक्ला छे; तेरेमां हामु तुहुं काजे भगवानेन खुस-खबर सामळावणे अतरात नी, बाकुन हामरु जीव आपणे बी तीयार हय गुयला।
ए भायस्यो ने बहणस्या, तुहुंक हामरी काठी मेहनत ने हरबड़ हेर हसे। तीनु दाहड़ाम, तुंद्रे पर बुजु नी आवणु चाहजे, करीन हामु रात-दाहड़ु मेहनत करीन कमाय बी कर्या, ने खरचु करीन तुहुं काजे भगवानेन खुस-खबर सामळाया।
तुहुं गवा छे, ने भगवान बी गवा छे, की तुहुं भुरसु करने वाळान ईचमां हामरु वेहवार कसु चुखलु ने धरमेन ने नी-गुनाळु 2रयु। जसु बास तेरा पुर्या साते वेहवार करे, तसात हामु बी तुंद्रे साते वेहवार करला। जसात हामु तुहुंक भात-भात्ये समजाड़ीन सीकाड़ता रया; हामु कह्या भगवान तुहुंक हेरा राज मां, ने राजेन सेक-सींगार मां, साजल्या बणने करीन तुहुंक बुलावलु छे; तेरेमां तुहुं भगवानेक गमे तसों जीवन जीवु।
ने तेरेमां हामु भगवानेक वारु छे करीन जलम कवता रवजे, काहाकी हामरे सी जत्यार तुहुं भगवानेन खरला बुले समजीन आवर्या ने छाचलीन हयु वचन भगवानेन छे, ने तुहुं जे भुरसु कर्या, तुंद्रा जे बुले बेसको काम करे। अतरामा ईनी वातेन करता हामु भगवान काजे बेसकु वारु कह्या करजे। मेसेक यहुदीया जीलान, भगवानेन मंडळीन माणसे हेर आय रय। चे यहुदी माणसेम सी ईसु मसी पर भुरसु कर्या। तत्यार यहुदी दीसरा माणसे तीनुक वेला पाड़्या, तेबी चे ची वेला ने दुख वेठी लेदा। तींद्रेन तसात, जत्यार तुंद्रा माणसे तुहुंक वेला पाड़्या, तत्यार तुहुं बी ची वेला ने दुख वेठी लेदा। तेरेमां ए भायस्यो ने बहणस्या, तुहुं यहुदी ईसु वाळान चाल धरन्या बण गुयला छे। चे मालीक ईसु काजे ने भगवानेन अघली वात बताड़ने वाळा माणसे काजे बी मार नाख्या ने हामुक तळ्या, ने भगवान तींद्रे सी खुस नी हय, ने चे आखा माणसे पर रुक लागाड़े, ने चे नी-यहुदीया सी तींद्रा छुटकारा वाटे वाते करने सी हामुक रुके, काहाकी जलम आपणा पापेन गुळा3 भरता रहे; बाकुन तीनु पर भगवानेन रीसेन गरा आय्त पड़ली छे।
पोलुस मंडळी काजे भेळु हवणेन हर करे
ए भायस्यो ने बहणस्या हामु थुड़ीक वार लग तुंद्रे सी छेटे हय गुयला, मन मां छेटे नी हया, बाकुन डील मां छेटे हय गुयला। तेरेमां हामु तुंद्रा मुंहडा देखणे करीन बेसका हेर कर रवला। तेरेमां हामु तुंद्रेन्चां पछा आवणे कर रवला, खास करीन मे पोलुस, एक कावा नी बाकुन दुयेक कावा आवणे करलु, बाकुन भुतड़ु रुक लेदलु। आपणु मालीक ईसु पछु आवसे तीने टेमे, तेरे धड़े सी हामुक ईनाम जड़नेन आस, ने खुसी ने ईज्जत आपणी पागड़ी कुण रवसे? तीने टेमे, तेरे अगळ हामुक मटाय करनेन उत्तर तुहुंत बणसु; नी की? हामरी बड़ाय ने खुसी तुहुंत छे।
Source notes (3)
- Footnote खुस प्रसन्न
- Footnote नी-गुनाळु निर्दोष
- Footnote पापेन गुळा नपुआ
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.