भगवानेन छाचला बुल
1 पतरस 5
भगवानेन माणसेन टुळु
तुंद्रे मां जे मंडळीन डाहला छे, तीनु काजे मे समजाड़ीन जो कह्वो की, मे बी हींद्रेन तसु एक डाहलु छे, ने ईसु मसी जो दुख झेल्यु तीना दुखेन गवा छे, ने आवणे वाळा दाहड़ा मां उजेंता हवण्या ईसुन सेक-सींगार मां साजल्यु बी छे। तीनी ईसुन मंडळीन माणसेक भगवान तुंद्रे सुपरुत कर्यु, तीनु माणसेन तुहुं वारु गुवाळी करु, जसा गुवाळ्या आपसा गाडरान राखवाळी करे। ने ज्य काम जबरान सी नी बाकुन भगवानेन मरजीन अनसारे वारु रीते करु। पयस्यान हायाळ्ळा बणी नी, बाकुन वारु खरला मन सी आपणा टुळान राखवाळी करु। ने तीनु माणसे काजे भगवान तुंद्रा हातेम सुप देदलु, तीनु माणसे पर तुहुं जु करीन हक मां करु बाकुन भगवानेन गाडरा साय एक दाखलु बणीन जीवु। ने असा करसु ती मट्लु गुवाळ्यु ईसु मसी उजेंतु हवसे, तत्यार तुहुं काजे सेक-सींगारेन पागड़ी आपसे, ची पागड़ी कदी चीमाये नी।
हीनी रीते, ए जुवान्या तुहुं बी पेहला माणसेन हक मां रवु। असा करीन आखान आखा, पुडार्या, जुवान्या, ने दीसरा बी, नीचळा हयन एक दीसरान सेवा चाकरी करने करीन तीयार रहु; काहाकी खरला सास्तुर मां लिखलो छे, “भगवान मटाय करन्यान वीरुद करतु रवे, बाकुन नीचळा माणसे पर गीण-दया करतु रवे।” हेरेसी तुहुं भगवानेन ताकतवाळा हाते तळे नीचळा रवु, हेरेसी चु तुहुंक सय टेम आवणे पर नानला ती मटा बणाय देसे। आपणी आखी फीकुरेन बुज भगवान पर मेक देवु। काहाकी चु तुंद्री फीकुर करे।
तुंद्रु वेरी भुतड़ु दाहड़ेन वाळा नाहरेन तसु, तुहुंक फाड़ीन खाणे करीन हेर रयु; हेरेसी तुहुं जागली करता रवु। ईसु पर भुरसु करन्या तुंद्रा भाय-बहणस्या, जे आखी कळी मां पुगला छे, चे बी तुंद्रेन तसा दुख झेल रया, जी वात हेर करीन भुरसा मां काठा रहु ने तीना भुतड़ान बराबरी करु। हय भगवान जु आखा गीण-दयान झोर छे, तीनाक तुहुं ईसु मसी मां आपणी जलमेन सेक-सींगार वाटे बुलावला छे, तुहुंक थुड़ीक वार लग दुख झेलनेन पछे आपसुत तुहुंक पाक्कु ने काठु ने ताकत वाळु करसे। तेरोत ताकतवाळो राज जलम टेकलो रवे। आमीन।
चिट्ठीन आकरी वात
मे सीलवानुसेन हाते, तीनाक मे ईमानदार भायस छे करीन समजो, ईतरुक चिट्ठी मां लिखीन तुहुंक समजाड़लु छे, ने जी गवाय देदलु छे की भगवान छाचलु गीण-दया जुत छे, हेरेमां काठा रवु।
जो बेबीलोन मां तुंद्रे अगळ नेवाड़ला माणसे छे, चु ने मसी मां मारु पुर्यु मरकुस बी तुहुंक आवजु ने आवीस कह्वे। परम सी गुळा दीन एक दीसरा काजे आवजु ने आवीस कह्वु।
तुहुं आखा काजे जे ईसु मसी मां छे सांती जड़ती रवे।
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.