भगवानेन छाचला बुल
1 कुरींथी 12
आत्मा भरायला भगवानेन वाटु
ए भायसे, बहणस्या मे नी चाहतु की तुहुं आत्मा मां भरायला।
भगवानेन वाटान बारामां अनजाण्या रवु। तुहुं जाणु की जत्यार तुहुं नी-यहुदी हतला, ती बुबड़ी मुरतीन पछळ जसा कवला असा चालतेला। गलाती 4:8 हेरेसी मे तुहुंक चेतावणी आपो की जे कुय भगवानेन आत्मान अगवाय सी बुले, चु नी कह्वे की ईसु गरा वाळु छे; ने नी कुय चुखली-आत्मान पाखुर कुय कय सके की ईसु मालीक छे।
भगवानेन वाटा ते काय तरेन छे, बाकुन आत्मा एकुत छे; ने चाकरी बी काय तरेन छे, बाकुन मालीक एकुत छे; ताकतवाळा काम1 ते काय तरेन छे, बाकुन भगवान एकुत छे, जु आखा मां एक एकेन हिम्मत पयदा करे। बाकुन आखान फायदु पुगाड़ने वाटे एक आत्मान वीजाळो आप देय। काहाकी एक काजे आत्मान साहरे डीमाकेन वात आप देय, ने दीसरा काजे हीनीत आत्मान अनसारे अकलेन वात आप देय। काहालाक काजे हीनीत आत्मा सी भुरसु छे, ने काहालाक काजे हीनीत एक आत्मा सी वारु करनेन भगवानेन वाटु आप देय। पछेन काहानाक काजे ताकत काम करनेन जुरेन, ने काहानाक काजे भगवानेन अघी सी आवणे वाळी वात बताड़े, ने काहानाक काजे आत्मान पारख करने, ने काहानाक काजे काय तरेन बुली, ने काहालाक काजे बुलीन मतलब2 बताड़ने ताकत आप्यु। बाकुन जे आखा ताकत वाळा काम चीत एक आत्मा कराड़े, ने तीनाक जो चाहजे चो वाटी देय।
डील एक भाक तरान
काहाकी जीने तरा डील ते एक छे ने हेरा भाक बेसका छे, ने हीना एक डीलेन आखा भाक बेसका रवणे पर आखा मेळीन एकुत डील छे, हीनीत तरा मसी बी एकुत छे। काहाकी हामु आखा काय यहुदी हवे काय नी-यहुदी, काय पावर्यु हवे काय आजाद, एकुत आत्मान साहरे एक डील हवणे वाटे बपतीस्मा लेदा, ने हामु आखा काजे एकुत आत्मा पीवाड़ देदली छे।
हेरसी की डील मां एकुत भाक नी बाकुन बेसका भाक छे। कदी पाय कह्वे, “मे हात नी हय, हेरेसी डीलेन नी हय,” ती काय चु हेरे वजे सी डीलेन नी। ने कदी कान्टा कह्वे, “मे डुळु नी हय, हेरेसी डील नी हय,” ती काय चु हेनी वजे सी डीलेन नी हय? कदी आखो डील डुळात रवता ती सामळनु काहा रवतो? कदी आखो डील कान्टात रवता, ती सुंगणु काहा रवतो? बाकुन छाचलीन भगवान भाक काजे आपणी मरजीन अनसारे एक करीन डील मां मेक्यु। कदी चे आखा एकुत भाक रवता, ती डील काहा हवतो? बाकुन हय भाक ते बेसका छे, बाकुन डील एकुत छे।
डुळा हात सी नी कय सके, “मेसे तारी जरुवत नी हय” ने नी मुणको पाय सी कय सके, “मेसे तुंद्री जरुवत नी हय।” बाकुन डीलेन चे भाक जेत दीसरा सी लुला लागे, बेसको जरुवत छे; ने डील जीनु भाके काजे हामु आव-भाव लायेक नी समजे हीनु काजे हामु जादास आव-भाव देजे; ने हामरे सुभे नी देय असला भाक अळी बी बेसका सुभु देय असा हय जाय, अळतेन बी आपणो सुभे असा भाके काजे हेरी जरुवत नी बाकुन भगवान डील काजे असु बणाय देदु की तीना भाक काजे आव-भाव मां कमी हतली हीना काजे अळी बी बेसका आव-भाव जड़्यो। काहाकी डील मां बेरजु नी पड़नु, चाहजे बाकुन भाक एक दीसरान बराबर फीकुर3 करे। हेरेसी कदी एक भाक काजे दुख जड़े, ती आखा भाक हेरेसी ते जड़े; ने कदी एक भाकन बड़ाय हवे, ती हेरे साते आखा भाक खुसी मनावे।
असात तुहुं आखा मेळीन मसीन डील छे, ने आंग्ये-आंग्ये हेरा भाक छे; ने भगवान मंडळी मां आंग्ये-आंग्ये माणसे ठेरावला छे; पेहलु नेवताळु, दीसरु भगवानेन अघी सी आवणे वाळी वात देखाड़न्यु, तीसरु मास्तर, अळतेन ताकुतेन काम करने वाळु, अळतेन वारु करने वाळा, ने भलाय करने वाळा, ने देख-भाळ करने वाळा, ने काय तरेन बुली बुलने वाळा। काय आखा नेवताळा छे? काय आखा भगवानेन अघी सी आवणे वाळी वात देखान्या छे? काय आखा परचार करन्या छे? काय आखा ताकुतेन काम करने वाळा छे? काय आखा काजे वारु करनेन भगवानेन वाटु जड़लु छे? काय आखा काय तरान बुली बुले? काय आखा बुल बदलेन काम करे काय? तुहुं मटा सी मटा भगवानेन वाटु धुन मां रवु, बाकुन मे तुहुंक अळी बी आखा सी वारु वाट देखाड़े।
Source notes (3)
- Footnote ताकतवाळा काम प्रभावशाली कार्य
- Footnote मतलब अर्थ
- Footnote फीकुर चिन्ता
भगवानेन छाचला बुल. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.