1 कुरींथी 1

आव-भाव करनु

1पोलुस भीणी सी जु भगवानेन मरजी 1सी ईसु मसीन नेवताळु हवणे वाटे बुलाय गुयलु छे, ने भायस सोस्‌थीनेस भीणी सी बुलाय गुयलु छे,

2भगवानेन ईनी मंडळीन नाव जे कुरींथीस मां छे, मतलब हींद्‌रो नाव जे ईसु मसी मां चुखला करला, ने चुखला हवणे वाटे बुलाय गुयला छे; ने हीनु आखान बी जे आखी जागा हामरे ने आपणा मालीक ईसु मसीन नाव सी दुवा करजे।

3आपणा भगवान बास ने मालीक ईसु मसीन गीण-दया ने सुक-सांती तुहुं आखा काजे जड़ती रहणु चाहजे।

मसी मां बरकत

4भगवानेन गीण-दया तुहुं काजे ईसु मसीन साहरे जड़ली छे, हेरेसी मे तुंद्‌रे वाटे आपणा भगवान काजे जलम बेसकु वारु कह्‌या करो। 5की हेरे मां हयन तुहुं आखी वात मां, मतलब आखा ने आखी अक्‌कल मां मालदार2 बणावलु छे 6की मसीन गवाय तुंद्‌रे मां पाक्‌की नीकळी 7जां लग की काहाला बी भगवानेन वाटा मां कमी नी हय, ने तुहुं हामरा मालीक ईसु मसीन देखायणेन वाट देखता रवु। 8चु तुहुं काजे आकरी लग काठा बी करसे की तुहुं हामरा मालीक ईसु मसीन दाहड़ा मां नी-गुनाळा रवु 9भगवान भुरसा वाळु छे, चु तुहुं काजे आपणा पुर्‌या ने हामरा मालीक ईसु मसीन साजेदारी मां बुलावलु छे।

मंडळी मां झगड़ा हवे

10ए मारा भाय, बहणस्‌या मे तुंद्‌रे सी हामरा मालीक ईसु मसीन नाव सी लीलघाये की तुहुं आखा एकुत वात कह्‌जु, ने तुंद्‌रे मां झगड़ा नी हवणु चाहजे, बाकुन एकुत मन ने एकुत हीया मां हयन मेळीन रवु। 11काहाकी ए मारा भाय-बहणस्‌या, खलोयेन घरेन माणसे मेसे तुंद्‌रे बारामां बताड़ला छे की तुंद्‌रे मां झगड़ा हय र्‌या। 12मारो कवणेन ज्‌य मतलब छे की तुंद्‌रे मां सी कुय ते आपसा काजे “पोलुसेन कह्‌वे” ने कुय अपुल्‌लोस कह्‌वे, कुय “केफान कह्‌वे” ती कुय-कुय “मसीन” कह्‌वे। 13काय मसी आटाय गुयु? काय पोलुस तुंद्‌रे वाटे कुरुस पर चड़ायु गुयु काय? नीते तुहुं काजे पोलुसेन नाव सी बपतीस्‌मा जड़लो छे काय?

14मे भगवान काजे तु बेसकु वारु छे करीन कह्‌वो की कीर्‌स्‌पुस ने गयुस काजे छुड़ीन मे तुंद्‌रे मां सी काहाला काजे बी बपतीस्‌मा नी आप्‌यु। 15नीते असो नी हवे की कुय कह्‌वे की तुहुं काजे माणसे नाव पर बपतीस्‌मा जड़लो छे। 16ने हव, मे स्‌तीफनासेन घरन्‌या काजे बी बपतीस्‌मा देदलु छे; ईनु काजे छुड़ीन मे नी जानतु की मे अळी काहालाक काजे बपतीस्‌मा देदु। 17काहाकी मसी मेसे बपतीस्‌मा आपणे करीन नी, बाकुन खुस-खबर सामळणे करीन मकेल्‌लु छे, ने गुयो बी बुलेन अकलेन अनसारे नी, असो नी हवे की मसीन कुरुस फालतु रवे।

मसी भगवानेन अक्‌कल ने ताकत छे

18काहाकी कुरुस सी खत्‌तम हवणेवाळा वाटे बेकार छे, बाकुन हीयु छुटकारु जड़ने वाळा वाटे भगवानेन ताकत छे। 19काहाकी लिखलो छे,

“मे अक्‌कल वाळान अक्‌कल काजे खत्‌तम करीस,

ने समज वाळान समज काजे बेकार कर दीस।”3

20काहा रया अक्‌कल वाळा? काहा रया यहुदी धरम सीकाड़न्‌या मास्‌तर्‌या? काहा रया ईनी कळीन माणसे वात मां जखड़ी पन्‌या? काय भगवान कळीन अक्‌कल काजे बेकार नी कर्‌यु? 21काहाकी जत्‌यार भगवानेन अकलेन अनसारे कळीन अक्‌कल सी भगवान काजे नी जाण्‌या, ती भगवान काजे ज्‌य वारु लाग्‌यो की ईनी परचारेन डेड़-अकल्‌यान साहरे भुरसु करने वाळा काजे छुटकारु देय। 22यहुदी माणसे ते सहलाणी चाहावे, ने युनानी माणसे अकलेन हेर मां रवे, 23बाकुन हामु ते हीना कुरुस पर चड़ाय गुयला मसीन परचार करजे, जे यहुदीया वाटे ठुकरेन वजे बणे ने नी-यहुदी वाटे डेड़-अकल्‌या छे; 24बाकुन जे बुलाय गुयला छे, काय यहुदी काय नी-यहुदी, हींद्‌रे साते मसी भगवानेन ताकत ने भगवानेन अक्‌कल छे। 25काहाकी भगवानेन डेड़ अक्‌कल माणसेन अक्‌कल सी अक्‌कल वाळा छे, ने भगवान लुल्‌ला माणसेन जुर सी बेस ताकतवाळु छे।

26ए भायसे ने भणस्‌या, आपणे बुलाये जाणेन ते सुचु की नी डीलेन अनसारे बेसका अकलवाळा, ने नी बेसका ताकत, ने नी बेसका नावसाद्‌या बुलाय गुया। 27बाकुन भगवान कळीन डेड़-अकल्‌या काजे नेवाड़ लेदु की अकलवाळा काजे सरमाड़े, ने भगवान ईनी कळीन ताकतवाळा माणसेक लाजवाड़े करीन तीनु माणसेक नेवाड़ लेदु, तीनु काजे ईनी कळीन माणसे लुल्‌ला समजे। 28ने भगवान कळीन लुल्‌ला माणसे काजे ने बेकार काजे, बाकुन जे छे बी नी हीनु काजे बी नेवाड़ लेदु की हीनुक जे छे, फालतु4 बणाय देय। 29काहाकी कुय जीव भगवान अगळ मटाय नी करनु चाहजे। 30बाकुन हेरेत भीणी सी तुहुं ईसु मसी मां छे, जे भगवान भीणी सी हामरे वाटे अक्‌कल ठेहरे, मतलब धरम, ने चुखला, ने छुटकारु; 31काहाकी जसों लिखलो छे, असोत हवे, “जु मटाय करे चु मालीक मां मटाय करे।”5