Bhadrawahi Bible
जकर्याह 14
परमेशरेरी दिहाड़ी
शुना, यहोवारी एरी दिहाड़ी एजने बालीए ज़ैस मां तेरी दौलत ते लुटतां तेरे दरमियाने मां बन्टी गाली। यहोवा ज़ोते, किजोकि अवं सैरी कौमन यरूशलेमे सेइं लड़नेरे लेई अकोट्ठी केरेलो, ते यरूशलेम नगरे पुड़ कब्ज़ो भोइ गालो। घरां लुट्टां गालां ते कौन्शन सेइं कुकर्म कियो गालो; नगरेरे अधे लोक गुलैमी मां च़ले गाले। तैखन यहोवा निस्तां तैन कौमन सेइं एन्च़रे लड़ेलो, ज़ेरो तै जंगरे दिहाड़े लड़तो थियो। ते तैस दिहाड़े तै ज़ैतूनेरे पहाड़े पुड़ पव रखेलो, ज़ैन पूर्वेरे पासे यरूशलेमेरे सामने, ते ज़ैतून पहाड़े पूरबे करां पश्चिमे तगर मझ़ाटेरां खड्डो भोइ गालो; तैखन अध्धू पहाड़ उत्तरेरे पासेरां ते अध्धू दक्षिणेरे पासे हेटी गालू। तैखन तुसां मेरी बनेवरी तैस वैदी मांमेइं नेश्शी गाले, किजोकि तै वादी आसेले तगर पुज़ेली, बल्के तुस एन्च़रे नश्शेले ज़ेन्च़रे तैस भुन्ज़लेरे डरे सेइं नश्शोरे थिये, ज़ै यहूदा प्रदेशेरे राज़े उज्जियाहेरे राज़ केरनेरे वक्ते मां एवरो थियो। तैखन मेरो यहोवा एज्जेलो, ते सब पवित्र स्वर्गदूत तैस सेइं साथी भोल्हे।1
तैस दिहाड़े कोई लौ न भोल्ही, किजोकि लौ देने बैली सब चीज़ां मिटेई गैली। ते लगातार अक्के दिहाड़ी भोल्ही ज़ै यहोवा ही ज़ानते, न दीस भोल्ही, ते न रात भोल्ही, पन ड्लवझ़ी ट्लेकड़ार भोल्हो।2
तैस दिहाड़े यरूशलेमे मरां ज़िन्दगरू पानी निसेलू तैसेरी अक शाख पूरबेरे समुन्दरेरे ते होरि पश्चिमेरे समुन्दरेरे पासे बगेली, ते रिती ते हिंवतड़े भी बराबर बगती राली।3
तैखन यहोवा सैरी धेरतरो राज़ो भोल्हो; ते तैस दिहाड़े अक्के यहोवा ते तैसेरू नवं भी अक्के मन्नू गालू।4
गेबा नगरे करां लेइतां यरूशलेमेरे दक्षिणेरे पासे रिम्मोने तगर सब ज़मीन अराबारी ज़ेरि भोइ गाली। पन तै उच्चे भोइतां बिन्यामीनेरे फाटके करां लेइतां पेइले फाटकेरे ठारी तगर, ते कूने बाले फाटके तगर, ते हननेलेरे गुम्मटे करां लेइतां राज़ेरे दाछ़रे कुण्डन तगर अपने ठैरी मां बसेली। लोक तैस मां बेस्सी गाले किजोकि सत्यानाश भोनेरो श्राप फिरी न रालो; ते यरूशलेम नगरी बेधड़क बस्सोरी राली।5 ज़ेत्री कौमेईं यरूशलेम नगरे सेइं जंग कियोरीए तैन सेभन यहोवा एन्च़रे सज़ाह देलो, कि खड़खड़े तैन केरू मास शेड़ि गालू, तैन केरि एछ़्छ़ी चोघलन मां शेड़ि गैली, ते तैन केरि ज़िभ तैन केरे एशी मां शेड़ि गाली। तैस दिहाड़े यहोवारे तरफां तैन मां बड़ी घबराहट बिश्शी गाली, ते तैना एक्की होरेरे हथ्थन ट्लाले, ते एक्की होरि पुड़ अपने हथ खड़े केरेले। यहूदा भी यरूशलेमे मां लड़ेलो, ते सोन्नू, चाँदी च़ेवरे पासां केरि सब कौमां केरि धन-दौलत तैस मां अकोट्ठी की गाली। ते घोड़े, खचरां, ऊँट, ते गधे, बल्के ज़ेत्रे जानबर तैन केरे डेरन मां भोल्हे, तैना भी एन्च़रे महामैरी सेइं मारे गाले।
मुल्खां केरे राज़ेरी आराधना केरनी
तैखन ज़ेत्रे लोक यरूशलेम नगरे पुड़ हमलो केरनेबैली सैरी कौमन मरां बच़ोरे राले, तैना हर साल राज़े जो मतलब सेना केरे यहोवारी आराधना केरने, ते झोफड़ी केरू तियार मनानेरे लेई यरूशलेम नगरे जो गाले। दुनियारे सारे कुलन मरां ज़ैना लोक यरूशलेम नगरे मां राज़ेरी, मतलब सेना केरे यहोवारी आराधना केरनेरे लेई न गाले, तैन केरे ज़मीनी मां झ़ड़ी न बखेली। अगर मिस्रेरू कुल तैड़ी न एज्जे, त कुन तैन पुड़ तै महामारी न पेली ज़ैस सेइं यहोवा तैन कौमन मारेलो ज़ैना झोफड़ी केरू तिहार मनानेरे लेई न गाले?
ई मिस्रेरो ते तैन सब कौमां केरो पाप ठहरेलो, ज़ैना झोफड़ी केरू तिहार मनानेरे लेई न गाले। तैस दिहाड़े घोड़ां केरि घंटान पुड़ एन लिखोरू भोल्हु, “यहोवा परमेशरे लेई पवित्र।” ते यहोवारे भवनेरां भांडां तैन कुटोरां केरां ज़ेरां पवित्र ठहरेलां, ज़ैना वेदरे सामने रहतन। बल्के यरूशलेम ते यहूदा प्रदेशे मां सब भांडां सेना केरे यहोवारे लेई पवित्र ठहरेलां, ते सब मेलबलि केरनेबाले एज्जी-एज्जी तैन भांडन मां मास बनाले। तैखन सेना केरे यहोवारे भवने मां कोई बुपारी न भोल्हो।
Source notes (5)
- Cross-reference मत. 24:30-31;1 थिस. 3:13;यहूद. 1:14.
- Cross-reference प्रका. 21:23;22:5.
- Cross-reference यहे. 47:1;प्रका. 22:1,17.
- Cross-reference प्रका. 11:15.
- Cross-reference प्रका. 11:15.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.