Bhadrawahi Bible
जकर्याह 12
एजने बाले वक्ते मां यहूदा प्रदेशेरो छुटकारो
इस्राएलेरे बारे मां यहोवारो सन्देश: यहोवा ज़ै अम्बर फैलाने बालोए, ते ज़मीनरी बुनीयाद रखनेबालोए ते मैन्हेरी आत्मा रच़ने बालोए, तै एन ज़ोते, “हेरा, अवं यरूशलेमेरे आसे-पासे सेभी कौमां केरे लेई हिलने बालो कुटोरो बनेइलो; ज़ैखन यरूशलेम नगर घेरू गालू तैखन यहूदारी हालत भी एरी भोल्ही। ते तैस मौके धेरतरी सैरी कौमां यरूशलेमेरे खलाफ अकोट्ठी भोल्ही, तैखन अवं तैस एत्रो भारी घोड़ बनेइलो, कि ज़ै तैस छ़ूनेरी कोशिश केरेलो, तै बड़ो ज़खमी भोइ गालो।1 यहोवा एन ज़ोते, तैस मौके अवं हर एक्की घोड़े घबरेई देलो, ते तैसेरे सुवारे ज़खमी केरेलो। पन अवं यहूदारे घराने पुड़ सिद्धी नज़र रखेलो, ते गैर कौमां केरे सेभी घोड़न कांने केरतां छ़डेलो। तैखन यहूदारे प्रधान एप्पु मांमेइं ज़ोले, ‘यरूशलेमेरे लोक अपने परमेशर सेना केरे यहोवारी मद्दती सेइं मेरे मद्दतगार बनेले।’
“तैस दिहाड़े अवं यहूदारे प्रधान्न एरे केरेलो, ज़ेन्च़रे कैड़ु केरे ढेरे मां अग्गी सेइं भेरतां आंवठी या पूले मां बलती मसाल भोतीए, मतलब तै दांए-बांए पासेरे सेभी लोकन भस्म केरेली; ते यरूशलेम नगरी ज़ैड़ी हुन्ना बस्सोरीए, तैड़ी बस्सोरी राली, यरूशलेमे मां।
“ते यहोवा पेइले यहूदारे घरानेरो छुटकारो केरेलो, कि कोन्च एरू न भोए कि दाऊदेरो घरानो ते यरूशलेमेरे रानेबाले अपने-अपने शान-ओ-शोकतरे वजाई सेइं यहूदारे खलाफ घमण्ड केरेले। तैस दिहाड़े यहोवा यरूशलेमेरे रानेबालन ज़ेन्च़रे ढाली सेइं बच़ालो, ते तैस वक्ते तैन मरां ज़ै ठोकर खाने बालो भोए तै दाऊदेरो ज़ेरो भोल्हो; ते दाऊदेरो घरानो परमेशरेरो ज़ेरो भोल्हो, मतलब यहोवारे तैस दूतेरो ज़ेरो ज़ै तैन्न अग्री-अग्री च़लतो थियो। तैस दिहाड़े अवं तैन सेभी कौमां केरो नाश केरनेरी कोशिश केरेलो ज़ैना यरूशलेमे पुड़ चढ़ाई केरेली।
लोकां केरे लेई मातम
“अवं दाऊदेरे घराने ते यरूशलेमेरे रानेबालन पुड़ अपनो अनुग्रह केरनेबाली ते प्राथना केरनेबाली आत्मा उतरेलो, तैखन तैना मेरे पासे तकेले मतलब ज़ै तैनेईं कोशोरोए, ते तैसेरे लेई एन्च़रे लेरां देले ज़ेन्च़रे एकलौते मट्ठेरे लेई लेरां देतन, ते एरहो भारी मातम केरेले, ज़ेन्च़रे बड्डे मट्ठेरे लेई केरतन।2 तैस वक्ते यरूशलेम नगरे मां एत्री लेरां भोल्ही ज़ेन्च़रे मगिद्दोनेरी वैदी मां हदद्रिम्मोने मां भोवरू थियूं।3 सारे इस्राएल मुल्खे मां मातम भोल्हो, हर एक्की परिवारे मां अलग-अलग; मतलब दाऊदेरे घरानेरू परिवार अलग, ते तैन केरि कौन्शां अलग; नातानेरे घरानेरू परिवार अलग, ते तैन केरि कौन्शां अलग; लेवेरे घरानेरू परिवार अलग ते तैन केरि कौन्शां अलग; शिमी केरू परिवार अलग, ते तैन केरि कौन्शां अलग; ते ज़ेत्रां परिवारां राहोरां भोल्हां हर अक परिवार अलग-अलग, ते तैन केरि कौन्शां अलग-अलग।
Source notes (3)
- Cross-reference मत. 21:44;लूक. 21:24.
- Cross-reference मत. 24:30;यूह. 19:37;प्रका. 1:7.
- Cross-reference प्रका. 16:16.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.