Bhadrawahi Bible
श्रेष्ठगीत 2
अवं शारोनेरो गुलाब आईं,
ते वैदी केरे सोसनेरू फूड़ोंव आईं।
लाड़ो
ज़ेन्च़रे सोसनेरू फूड़ोंव कंटन मां,
तेन्च़रे मेरी ट्लारी जुवाना केरे दरमियाने मांए।
लाड़ी
ज़ेन्च़रे च़ोइयां केरो बुट जंगलेरे बुट्टन मांए,
तेन्च़रे मेरो ट्लारो जुवाना केरे दरमियाने,
अवं तैसेरी छावी मां बिशतां खुश भोइतां बिश्शी,
ते तैसेरो फल मीं खाने मां मिट्ठो लग्गो।1
तैनी अवं धांमरे घरे मां आनी,
ते तैसेरे प्यारेरो झण्डो मेरे दोग्गे पुड़ फिरतो थियो।
मीं किशमिश खुवेइतां सम्भाला, च़ोइयां खुवेइतां ताज़गी देथ:
किजोकि मीं प्यारेरो रोग लगोरोए।
कधी एरू भोथू, तैसेरो बांओ हथ मेरे क्रोड़ी करां बुन,
ते तैसेरो देइने हथ मीं गले लाए।
हे यरूशलेमेरी कौन्शव, अवं तुसन सेइं चिकारी
ते मैइदानेरी हिरनी केरि कसम देइतां ज़ोतीं,
कि ज़ांतगर तै एप्पु न उठनू चाए, तांतगर तैस न उकसाथ ते न बींझ़ाथ?
ज़ांतगर तै एप्पु उठनू न चाहे।
दूइयोवं गीत
लाड़ी
मेरे ट्लारेरी आवाज़ शुनोतीए!
हेरा, तै पहाड़न पुड़ दौड़तो ते छालां मारतो एइते।
मेरो ट्लारो चिकारे या जुवान हिरनेरो ज़ेरोए,
हेरा, तै इश्शे दिवारी पत्र खड़ोए,
तै दैरी केरे पासे तेक्की राहोरोए,
ते तै दैरन मरां तकने लगोरोए।
मेरो ट्लारो मीं सेइं ज़ोई राहोरोए,
लाड़ो
“हे मेरी ट्लारी, हे मेरी खूबसूरत खड़ी उठतां च़ली एई:
किजोकि हेर, ठंढारो मौसम खतम भोवरोए;
झ़ड़ी भी खेड़ोरीए, ते बरसांतरो मौसम भी खतम भोवरोए।
ज़मीनी पुड़ फूड़ू केरी बहारे, ते
च़ुड़ोलू केरो गीतां ज़ोनेरो मौसम भी एज्जी राहोरोए,
ते इश्शी ज़मीनी मां कबूतरां केरि आवाज़ शुनोने लगोरीए।
फैगू केरे बुट्टन पुड़ फैगू केरे दाने पकने लगोरेन,
ते दाछ़ां फुल्लने लेगोरिन;
तैना खुशबू देने लेवरिन
हे मेरी ट्लारी, हे मेरी खूबसूरत, उट्ठतां च़ली एई।
हे मेरी कबूतरी, पहाड़ां केरि दरज़न मां ते शफड़ां केरि आड़ी मां मीं अपनि शकल हिरा,
ते मीं अपनि आवाज़ शुन्ने दे
किजोकि तेरी आवाज़ मिट्ठी आहे, ते तेरू तुत्तर खूब रोड़ू आहे।
इश्शे लेई तैना निक्की लोई ट्लाथ ज़ैना बागन बरबाद केरतिन,
किजोकि इश्शे बागन मां फूड़ू फुलोरन।”2
लाड़ी
मेरो ट्लारो मेरोए, ते अवं तैसेरी आईं,
तै सोसनेरे फूड़न मां अपना गब्बां च़ारते।
ज़ांतगर दिहाड़ी न डुब्बे ते छाव लम्मी भोते-भोते मिटी न गाए,
तांतगर हे मेरा ट्लारा तैस चिकारे या जुवान हिरनेरो ज़ेरो बन।
ज़ै बेतेरेरे पहाड़न पुड़ फिरते।
Source notes (2)
- Cross-reference प्रका. 22:1-2.
- Cross-reference भज. 80:8-13;यहे. 13:4.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.