Bhadrawahi Bible
रूत 2
रूतरू बोअजे सेइं मिलनू
बैतलहम नगरे मां नाओमरे मुन्श एलीमेलेकेरे कुले मां तैसेरो अक बड़ो अमीर भियाल थियो, ज़ेसेरू नवं बोअज थियूं। एक्सां मोआबी रूत नाओमी सेइं ज़ोने लगी, “मीं कोन्ची उडारे मां गाने दे, कि ज़ै मीं पुड़ महरबानी केरतां नज़र केरे, तैस पत्ती-पत्ती अवं शिल्लां च़ुनेली।” तैसां ज़ोवं, “च़ली गा, कुइये।”1 एल्हेरेलेइ तै गेइतां एक्की उडारे मां जौ लुन्ने बालन पत्ती शिल्लां च़ुन्ने लगी, ज़ैस उडारे मां तै जेवरी थी तैन ऊडार एलीमेलेकेरे भियाले बोअज नंव्वेरे एक्की मैन्हेरू थियूं। किछ वक्तेरां बाद बोअजे बैतलहम नगरेरां एइतां रूत लाही ते लुन्ने बालन सेइं ज़ोने लगो, “यहोवा तुसन सेइं साथी राए,” ते तैना तैस सेइं ज़ोने लगे, “यहोवा तीं बरकत दे।” तैखन बोअजे अपने एक्की नौकरे पुछ़ू, ज़ै तैनी लुन्ने बालन पुड़ निगरान रखोरो थियो, “ऐह केसेरी कुइये?” ज़ै नौकर लुन्ने बालन पुड़ निगरान रखोरो थियो, तैनी जुवाब दित्तो, “ऐह मोआबी कुइये, ज़ै नाओमी सेइं साथी मोआब मुल्खेरां एवरीए। एसां ज़ोवरू थियूं, ‘मीं लुन्ने बालन पत्ती-पत्ती गेड्डन मांमेइं शिल्लां च़ुन्ने देथ।’ ते तै एवरीए, ते झ़ेझ़री देंती हुन्ना तगर इड़ी शिल्लां च़ुन्ने लगोरीए, सिर्फ हुन्ना थोड़े ज़ेरे च़िरेरे लेई डेरे मां आराम केरनेरे लेई जेवरी थी।”
तैखन बोअज रूती सेइं ज़ोने लगो, “हे कुइये, शुन! कोन्ची होरि केरे उडारे मां शिल्लां च़ुन्ने न गेइयां, मेरी नौकरेनन सेइं साथ इड़ी रेइयां। ज़ैस उडारे मां तैना लुनती भोल्ही तैस्से पुड़ ध्यान लेइतां रेखां, ते तैन्न पत्ती-पत्ती च़लती रेइयां। कुन मीं जुवानन हुक्म नईं दित्तोरो, कि तीं तंग न केरन? ते ज़ैखन भी तीं ट्लिश लग्गे, तैखन तू भांडन कां नेड़े गेइतां सेवकां केरू भारोरू पानी पीयां।” तैखन रूत ज़मीनी पुड़ ज़ैधू केरे भारे झुकतां ज़ोने लगी, “कुन वजाए कि तीं मीं परदेशी पुड़ महरबानी केरतां नज़र की ते मेरी खबर घिन्नी?” बोअजे जुवाब दित्तो, “ज़ैन किछ तीं अपने मुन्शेरी मौतरे बाद एपनी शिखी सेइं कियूं, ते तू केन्च़रे अपने अम्मा बाजी ते ज़र्म ठार छ़ेडतां इठेरे लोकन मां एवरिस ज़ैन तू पेइले न थी ज़ानती, लोकेईं मीं सेइं रोड़ेच़ारे ज़ोवरूए। यहोवा तेरी केरनरो फल दे, ते इस्राएलेरो परमेशर यहोवा ज़ेसेरी शरणी मां तू रानेरे लेई एवरिस, तीं भरपूर फल दे।” तैखन रूत ज़ोने लगी, “हे मेरे मालिक, तेरी महरबानी मीं पुड़ बनोरी राए, किजोकि अवं तेरी नौकरेनन मरां केन्चेरे भी बराबर नईं, तांभी तीं एपनी नौकरैनरे दिले बस्सने बैली गल्लां ज़ोइतां मीं आराम दित्तोरोए।”
फिरी रोट्टी खानेरे मौके बोअज तैस सेइं ज़ोने लगो, “इड़ी एइतां रोट्टी खा, ते अपनो ड्लाछ़ड़ो सिरके मां डोब।” ते तै लुन्ने बालां केरे ड्लखोरां गेइतां बिश्शी जेई; ते बोअजे तैस किछ भुज़ोरू अन्न दित्तू; ते तैसां रेज़्ज़तां खावं ते किछ बच़ेइतां रख्खू। तैसेरां बाद तै शिल्लां च़ुन्नेरे लेई खड़ी उठी, तैखन बोअजे अपने नौकरन हुक्म दित्तो, “एस गेड्डन मझ़ाटे भी च़ुन्ने देथ, ते तैस न झ़िड़का। बल्के एपनी च़प्पी मरां केढतां भी किछ बुछ़ोड़तां छ़ेडथ, ते तैसारे च़ुन्नेरे लेई छ़ेडी देइयथ, ते तैस न झ़िड़का।”
ते रूत ड्लवझ़ी तगर उडारे मां शिल्लां च़ुनती राई; तैखन ज़ैन किछ तैसां च़ुनोरू थियूं मेडतां छ़ट्टू, ते लगभग 12 किल्लो जौ निस्से। तैखन तै तैस छ़ुइतां नगरे मां अपने घरे जेई, ते तैसेरी शिखां तैसारू च़ुनोरू अन्न हेरू, ते ज़ैन किछ तैसां ज़ैन भुज़ेरू अन्न रेज़्ज़तां बच़ेवरू थियूं तैन तैसां केढतां एपनी शिखी कां दित्तू। तैसारी शिखां तैस पुछ़ू, “अज़ तू कोड़ि शिल्लां च़ुनती थी? ते केसेरे उडारे मां कम केरती थी? परमेशर तैस बरकत दे ज़ैनी तीं पुड़ महरबानी की।” तैखन तैसां एपनी शिखी सेइं सब किछ ज़ोवं, कि मीं केसेरे उडारे मां कम कियूं, ते ज़ोवं, “ज़ैस मड़देरे उडारे मां मीं अज़ कम कियूं तैसेरू नवं बोअजे।” नाओमी एपनी नुश्शी सेइं ज़ोने लगी, “तैस यहोवा परमेशरेरी तरफां बरकत मैल्हे, किजोकि तैनी न त ज़ींतन पुड़ ते न मर्रोरे लोकन पुड़ेरां अपनि दया हटेवरीए!” फिरी नाओमी तैस सेइं ज़ोने लगी, “तै मड़द त इश्शो अक भियाले, बल्के तैन मरांए, ज़ैन्न इश्शी ज़मीन छुटानेरू हक्के।”2 फिरी मोआबी रूत अपने शिखी सेइं ज़ोने लगी, “तैनी मीं सेइं इन भी ज़ोवं, ‘ज़ांतगर मेरे नौकर सारी कटाई पूरी न केरन, तांतगर तैन सेइं साथी लगोरी रेइयां।’” नाओमी एपनी नुश्शी रूती सेइं ज़ोने लगी, “मेरी कुइये इन रोड़ू भी आहे, कि तू तैसेरी नौकरेनन सेइं साथी-साथी गाती रास। अगर तू होरि केरे उडारे मां गाली त तैना तीं तंग केरि सकतन।” एल्हेरेलेइ रूत जौ ते गेहुं दूईयां केरि कटेइयरे आखरी तगर शिल्लां च़ुन्नेरे लेई बोअजेरे नौकरेनन सेइं साथी-साथी लगोरी राई; ते तै एपनी शिखी सेइं साथी रहती थी।
Source notes (2)
- Footnote लैव्य. 19:9-10; 23:22; व्यव. 24:19-22 इब्रानी केरे कानूनेरे मुताबिक उडारन मां लुन्ने बालन करां राहोरे शिल्लां च़ुन्नेरू हक परदेशी, विधवां, अनाथ ते गरीब लोकां केरू थियूं।
- Cross-reference लैव्य. 25:25-55.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.