Bhadrawahi Bible
रोमियो 4
अब्राहमेरी मिसाल
त अस कुन ज़ोम, कि इश्शे पूर्वज अब्राहमे कुन मैल्हू? किजोकि अगर अब्राहम रोड़े कम्मन सेइं धर्मी ठहरावरो भोथो, त तैस घमण्ड केरनेरी ठार भोथी, पन रोड़ां कम्मां केरू घमण्ड परमेशरेरे सामने नईं। पवित्रशास्त्र कुन ज़ोते, इन कि, “अब्राहमे परमेशरेरे वाधन पुड़ विश्वास कियो, ते तै तैसेरेलेइ धार्मिकता गनो जेव।” कम केरनेबालेरी मज़दूरी देनी दान नईं, पन हक समझ़ू गाते। पन ज़ै (पुन्नेरू) कम न केरे बल्के पापी मैन्हु धर्मी ठहराने बाले पुड़ विश्वास केरते, तैसेरो विश्वास तैसेरेलेइ धार्मिकता गनो गाते।
ज़ैस परमेशर बगैर (पुन्नेरे) कम्मां केरे धर्मी ठहराते, तैस दाऊद भी धन ज़ोते,
“धने तै ज़ेसेरे अधर्म माफ़ भोए,
ते ज़ैन केरे पाप ढक्‍के जे।
धने तै मैन्हु ज़ैस परमेशर पापी न ठहराए।”
ते इन धन ज़ोनू, कुन खतने बालां केरे लेई आहे, या ज़ैन केरो खतनो नईं भोवरो तैन केरे लेई भी आहे? अस पवित्रशास्त्रे मरां ज़ोतम, “अब्राहमे परमेशरेरे वाधन पुड़ विश्वास कियो ते तै तैसेरेलेइ धार्मिकता गनो जेव।” इन तैसेरो खतनो भोने करां पेइलू भोव न कि खतनो भोनेरे बाद। परमेशरे तै पेइलो कबूल कियो ते धर्मी ठहराव, ज़ेइस हेजू तैसेरो खतनो न थियो भोवरो, ते तैस खतनेरो निशान मैल्हो, कि तैस धार्मिकता पुड़ छाप भोए, किजोकि तै तैन सेब्भी केरो (आत्मिक) बाजी ठहरे ज़ैना विश्वास त केरतन पन तैन केरो खतनो नईं भोवरो। तैना भी तैन केरे विश्वासेरे वजाई सेइं धर्मी भोन। ते ज़ैन केरो खतनो भोवरोए तैन केरो पूर्वज भोए, ज़ैन केरो न सिर्फ खतनो कियोरोए, पन ज़ैन इश्शे पूर्वज अब्राहमेरो ज़ेरो विश्वासे, ज़ै तैनी बगैर खतनेरे हालती मां कियोरी थियो।
विश्वासेरे ज़िरिये वाधो
परमेशरे अब्राहमे ते तैसेरे वंश सेइं वाधो कियोरो थियो कि तैना दुनियारे बारस भोल्हे। ई वाधे एल्हेरेलेइ नईं दित्तोरो कि अब्राहमे मूसेरो कानून मन्नो, बल्के तैसेरो विश्वास ज़ै परमेशरे पुड़ थियो तैसेरे वजाई सेइं तै धर्मी ठहराव जेव। ज़ै वाधो परमेशरे दित्तोरो थियो कि तैना दुनियारे बारस भोल्हे अगर मूसेरो कानून मन्ने सेइं आहे, त फिरी विश्वास बेमतलब, ते वाधो बेकार भोव। परमेशर तैस पुड़ क्रोध केरते ज़ै कानूने रोड़े च़ारे न मन्ने, ते ज़ैड़ी कानून नईं, तैड़ी तैसेरू ट्लोड़नू भी नईं।
एल्हेरेलेइ परमेशरेरे वाधे विश्वासेरे ज़िरिये हासिल भोतन, ताके तैना वाधे अनुग्रहेरे ज़िरिये पक्‍के भोन, ते सारे वाधे अब्राहमेरे वंशेरे लेई आन, न सिर्फ यहूदी केरे लेई, ज़ैना मूसेरो कानून मनतन बल्के तैन सेब्भी केरे लेई भी आन, ज़ैना अब्राहमेरो ज़ेरो विश्वास केरनेबालन, तैए इश्शो सेब्भी केरो पूर्वजे। ज़ेन्च़रे पवित्रशास्त्रे मां लिखेरूए, “मीं तू बेड़ि कौमां केरो पूर्वज बनेवरोस।” परमेशरे पुड़ तैने विश्वास कियो, ते ज़ै मुड़दन ज़ींतो केरते ते ज़ैना चीज़ां अथ्थी नईं, तैन भी हाज़र केरते। परमेशरेरे वचनेरे मुताबिक कि, “तेरू खानदान एरू भोल्हु” तैना बेड़ि कौमां केरे पूर्वज भोन। तैनी न उमीदी मां भी उमीदी रेखतां विश्वास कियो, ते अब्राहम ज़ै लगभग 100 सालेरो थियो, अपने मर्रे जानी, ते सारारे मर्रे पेटेरे हालती पुड़ भी विश्वासे मां कमज़ोर न भोव। ते गैर विश्वासी भोइतां परमेशरेरे वाधे पुड़ शक न की, पन विश्वासे मां मज़बूत भोइतां परमेशरेरी बडीयाई की। ते तैस पूरो भरोसो भोव, कि ज़ैस गल्‍लरो वाधो परमेशरे कियोरोए, तै तैस पूरो केरनेरी शक्ति भी रखते। अब्राहमेरो विश्वास तैसेरेलेइ धार्मिकता गनो जेव। ते इन वचन, “विश्वास तैसेरेलेइ धार्मिकता गनो जेव,” न सिर्फ तैसेरेलेइ लिखू जेव। बल्के इश्शे लेई भी ज़ैन केरे लेई विश्वास धार्मिकता गनो जेव, मतलब इश्शे लेई ज़ैना अस परमेशरे पुड़ विश्वास केरतम, ज़ैने इश्शो प्रभु यीशु मसीह मुड़दन मरां ज़ींतो कियो। यीशु इश्शे पापां केरे लेई मारनेरे लेई ट्लुवाव जेव, ते असन धर्मी ठहरानेरे लेई परमेशरे ज़ींतो भी कियो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.