Bhadrawahi Bible
रोमियो 13
अधिकैरी लेई फर्ज़
हर कोई मैन्हु प्रधान अधिकैरी केरे अधीन राए; किजोकि कोई अधिकार एरो नईं, ज़ै परमेशरेरे तरफां न भोए; ते ज़ैना अधिकारी आन, तैना परमेशरे ठहरावरेन। एल्हेरेलेइ ज़ै कोई अधिकैरी केरि खलाफत केरते, तै परमेशरेरे कानूनेरी खलाफत केरते, ते ज़ैना लोक परमेशरेरे कानूनेरी खलाफत केरतन तैन सज़ाह मैल्लनीए। किजोकि हेरा हाकिम तैस मैन्हु ज़ै भलियाई केरते तैस न डराए, पन तैस मैन्हु डराते ज़ै बुरू कम केरते। अगर तुस हाकिमे करां डरनू न चाथ त भलियाई केरते राथ ते तुसन हाकिमे करां शाबाश मैल्हेली हाकिम परमेशरेरो सेवके ते तेरू भलू केरनेरे लेई आहे, पन अगर तू बुराई केरस, त तू डर, किजोकि तैस कां तलवार बेफैइदी नईं, ते तै परमेशरेरो सेवके; ज़ै बुरू कम केरनेबाले पुड़ कोप आनते। एल्हेरेलेइ हाकिमेरे लेई तुश्शू समर्पण ज़रूरीए न सिर्फ परमेशरेरे सज़ाहरे वजाई सेइं बल्के तुश्शे अपने ज़मीरेरे वजाई सेइं। एल्हेरेलेइ धड़त भी देतथ, किजोकि हुकूमत केरनेबाले परमेशरेरे सेवकन, ते सदा एस्से कम्मे मां लग्गोरो रहतन। एल्हेरेलेइ हर केन्चेरू हक देथ, ज़ेसेरी धड़त बनतीए तैस धड़त देथ; ज़ेसेरी चुंगी बनतीए तैस चुंगी देथ; ज़ेसेरी इज़्ज़त ते आदर कियोरी लोड़े तैसेरी इज़्ज़त ते आदर केरा।
एक्की होरि सेइं प्यार
एप्पू मांमेइं प्यारेरे अलावा ते केन्ची गल्ली मां कोन्ची चीज़रे कर्ज़दार न राथ; किजोकि ज़ै होरन सेइं प्यार केरते, तैने परमेशरेरे दित्तोरे कानूनेरे हुक्म पूरे किये। किजोकि मूसेरे कानूने मां बड़े हुक्म दित्तोरेन ज़ेन्च़रे कि, “बदमाशी न केर, कत्ल न केर, च़ोरी न केरा, लालच़ न केर,” ते एन केरे अलावा होरो कोई भी हुक्म भोए त तैन सैरी केरि बुनीयाद इस्से गल्ली मांए, “अपने पड़ोसी सेइं अपने बराबर प्यार केर।” प्यार पड़ोसेरी किछ भी बुराई न केरे, एल्हेरेलेइ ज़ै प्यार केरते तै परमेशरेरो दित्तोरो कानून पूरे केरते।
एल्हेरेलेइ वक्त पिशैनतां इन केरा। तुश्शे लेई निड्ली मरां बींझ़नेरो वक्त एवरोए, किजोकि ज़ैस वक्ते असेईं विश्वास कियोरो थियो, तैस वक्तेरे खियाले सेइं हुनी इश्शी मुक्ति नेड़ीए। इस बुरे दुनियाई मां रानेरो इश्शो वक्त लगभग खतम भोवरोए, ज़ेन्च़रे रात ट्लेकड़ोने बालीए, ते लौ भोनेबालीए ते मसीहेरो वापस एजनेरो वक्त नेड़े एवरोए, एल्हेरेलेइ असां तैना कम्मां शारम ज़ैना लोक आंधरे मां केरतन ते तैना हथियार बन्धम ज़ैना लौई मां इस्तेमाल भोतन। एल्हेरेलेइ अस भी तैन लोकां केरो ज़ेरो बर्ताव केरम, ज़ैना लौई मां ज़िन्दगी ज़ीतन न कि आंधरे मां, न कि नच़ने, नशो केरने, न बदमाशी केरने मां, ते लुचपने, लड़ैई, ते जलनी मां मसत भोम, बल्के ज़ेन्च़रे प्रभु यीशु मसीहे ज़ीवं तेन्च़रे तुस भी ज़ीथ, ते जिसमेरी खुवैइशां पूरी केरनेरी कोशिश न केरा।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.