Bhadrawahi Bible
प्रकाशितवाक्य 9
पंच़ोंव नरशिंगो
ज़ैखन पंच़ोंव स्वर्गदूते नरशिंगो बज़ाव, त मीं सुर्गेरां धेरतली पुड़ अक तारो बिछ़ड़तो लाव, ते तैस अथाह कुण्डेरी चाबी दित्ती। तैने अथाह कुण्ड खोल्लू, ते कुण्डे मरां एक्की भेट्ठरो ज़ेरो तू निस्सो, ते कुण्डेरे तूए सेइं दिहाड़ो ते अम्बर आंधरू भोइ जेव। ते तैस तूए मरां धेरतली पुड़ टिट्टां निस्सां, ते तैन धेरतलरे बिच़्च़ू केरि ज़ेरि ताकत दित्ती जेई। ते तैन सेइं ज़ोवं, कि न धेरतलरे घासे, न केन्ची नीलारे, न केन्ची बुट्टे नुकसान पुज़ान, सिर्फ तैन मैन्हन ज़ैन केरे कुपाए पुड़ परमेशरेरी मोहर नईं। ते तैन मारनेरे लेई नईं, पन पंच़ महीन्न तगर लोकन दुख देनेरो अधिकार दित्तो, ते तैन केरो दुख एरो थियो, ज़ेन्च़रे बिच़्च़ू केरे डस मारने सेइं मैन्हन भोते। तैन पंच़ महीन्न मां मैन्हु मरनू चाले, पन तैना न मेरि बटेले। तैना मरनेरी इच्छा रखेले पन तैना कोन्ची भी तरीके सेइं मरनेरी बत न मैल्हेली। तैना टिट्टां जंग केरनेरे लेई तियार घोड़ां केरां ज़ेरां लेइहोतां थियां, तैन केरे क्रोड़न पुड़ सोन्नां ताजां केरू ज़ेरू किछ लेइहोतू थियूं; तैन केरां तुत्तरां मैन्हु केरे तुत्तरां केरां ज़ेरां थियां। ते तैन केरे बाल कुआन्शां केरे ज़ेरे लम्मे थिये, ते तैन केरे दंत शेरां केरे ज़ेरे मज़बूत थिये। ते तैने लोंहेरी ज़ेरि झिलम लेवरी थी, ते तैन केरे फंघां केरि आवाज़ एरी थी ज़ेन्च़रे रथां केरि ते लड़ैई मां दौड़ते बड़े घोड़ां केरि। तैन केरां पौंछ़ड़न बिच़्च़ू केरां ज़ेरां थियां, ते तैन मां डस थियो, ते तैन पंच़ महीन्न तगर मैन्हन दुख पुज़ानेरी ताकत थी, तै ताकत तैन केरे पौंछ़ड़न मां थी। अथाह कुण्डेरो दूत तैन पुड़ राज़ो थियो, तैसेरू नवं इब्रानी भाषाई मां अबद्दोन, ते यूनानी भाषाई मां अपुल्लहोने, ज़ेसेरो मतलब नाश केरनेबालो।
पंच़ महिन्ना बाद पेइली आफत बीती जेई, ते इट्ठां पत्ती दूई बल्के दूई करां जादे आफतां एजने बैलिन।
ज़ैखन शेइयोवं स्वर्गदूते नरशिंगो बज़ाव ते ज़ै सोन्नेरे बलिदान केरनेरी ठार परमेशरेरे सामने, तैसेरे च़ेवरे कून्न मरां मीं एरी आवाज़ शुनी। ज़ेन्च़रे कोई शेइयोवं स्वर्गदूत सेइं ज़ोने लगोरोए ज़ैस कां नरशिंगो थियो, “कि तैन च़ेवरे दूत ज़ैना बडे दरियाए फराते कां बन्धोरोए, तैन खोल्ल।” तैखन तैना च़ेवरे दूत खोल्ले, तैना पेइले तियार भोवरे थिये, त इस घेड़ी, ते दिहाड़े, ते महीने, ते सालेरे लेई तैन बलगनेरे लेई ज़ोवरू थियूं, ते हुनी ई वक्त अव, कि तैना दुनियारे लोकन मरां अक तिहाई लोक मारन। ते तैन केरे सेनारी गिनती 20 करोड़ थी ज़ैना घोड़न पुड़ सुवार थिये, मीं तैन केरि गिनती शुनी। ते मीं इस दर्शने मां घोड़े ते तैन केरे एरे सुवार लेइहोए, ज़ैन केरि झ़िल्लमां अग्गरे ज़ेरि लाल, ते नीले ते हेइड्ले रंगेरे ज़ेरे थी, ते तैन घोड़ां केरि क्रोड़ी शेरां केरे क्रोड़ी केरि ज़ेरि थी, ते तैन केरे ऐशेरां अग ते तू ते गन्धक निसती थी। इन ट्लेइ आफतन सेइं ज़ैना इना आन, अग, तू, ते कने गन्धक, ज़ै तैन घोड़ां केरे ऐशी मरां निसती थी; तैन सेइं अक तिहाई लोक मेरि जे। तैन घोड़ां केरि ताकत तैन केरे ऐशी, ते कने तैन केरे पौंछ़ड़न मां थी, किजोकि तैन केरां पौंछ़ड़न सप्पां केरां ज़ेरां थियां, ते तैन केरे पौंछ़ड़न केरि क्रोड़ी भी थी, ते तैने सेइं तैना दुख भी पुज़ाते थिये। ते होरे मैन्हु ज़ैना तैन आफतन सेइं न थी मर्रे, ते तैनेईं मूरती केरि पुज़ा केरनि न शारी, ज़ैना तैनेईं सोन्ने, पितल, ते कन्ने घोड़, लेकड़रे बनेइं। तैना मूरती न लहन, न शुन्न, न च़ेलि बटन, ते तैनेईं दुष्टात्मां केरि आराधना केरनि भी न शारी। ते तैनेईं, खून, टूनो, बदमाशी, ते कने च़ोरी केरने करां मन न फिराव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.