Bhadrawahi Bible
प्रकाशितवाक्य 7
इस्राएलेरे 144000 लोक
इसेरां पत्ती मीं दुनियारे च़ेवरे कून्न पुड़ च़ेवर स्वर्गदूत खड़े लाहे। तैन स्वर्गदूतन दुनियाई मां आफत फैलेइतां नुकसान पुज़ानेरे लेई परमेशरे करां अधिकार हासिल कियोरो थियो, चाए धेरती पुड़ या समुन्दरे पुड़। तैनेईं दुनियारे च़ेवरे कून्न करां हवां ठेमतां रख्खी ताके धेरतली, या समुन्दर, या कोन्ची बुट्टे पुड़, हवा न च़ले। ते मीं अक होरो स्वर्गदूत पूर्बेरां एइतो लाव। तैस कां अक महोर थी ज़ै हमेशा ज़ींते परमेशरेरे तरफां थी। तैने च़ेवरे स्वर्गदूतन सेइं ज़ोरे सेइं ज़ोवं: “ज़ांतगर अस अपने परमेशरेरे दासां केरे कुपाए पुड़ मोहर न लाम तांतगर तैना आफतां तैन पुड़ न एज्जन, ते धेरतली, समुन्दर ते कने बुट्टन नुकसान न पुज़ान।” ते ज़ैन पुड़ मोहर कीजेई, मीं तैन केरि गिनती शुनी, कि इस्राएलेरी खानदानेरे गोट्लन मरां अक लख चुरतैली हज़ारन पुड़ महोर कीजेई। यहूदारे गोट्लन मरां 12 हज़ारन पुड़ मोहर लाही, रूबेनेरे गोत्रे मरां 12 हज़ारन पुड़; गादेरे गोत्रे मरां 12 हज़ारन पुड़। अशेरेरे गोट्लेरे मरां 12 हज़ारन पुड़; नप्तालेरे गोत्रे मरां 12 हज़ारन पुड़; मनश्शेरे गोत्रे मरां 12 हज़ारन पुड़। शमौनेरे गोत्रे मरां 12 हज़ारन पुड़; लेवेरे गोत्रे मरां 12 हज़ारन पुड़; इस्साकारेरे गोत्रे मरां 12 हज़ारन पुड़। जबूलूनेरे गोत्रे मरां 12 हज़ारन पुड़; यूसुफेरे गोत्रे मरां 12 हज़ारन पुड़, बिन्यामीनेरे गोत्रे मरां 12 हज़ारन पुड़ मोहर लाई जेई।
अक बड़ी भीड़
इसेरां पत्ती मीं मैन्हु केरि भीड़ लाही ज़ैस कोई गेनि न थियो बटतो। तैना हर कुले मरां, हर कौमी मरां, ते हर भाषाई मरां एवरे थिये। तैना तखतेरे ते गबड़ेरे सामने खड़े थिये। तैनेईं छ़ित्तां लिगड़ां लेवरां थियां, ते सेभेइं अपने हथ्थन मां तैसेरे आदरारे निशानेरे रूपां मां खजूरेरी डैलड़ी घिन्तां थिये। ते तैना लोक बड़े ज़ोरे सेइं ज़ोते थिये, “मुक्तरे लेई इश्शे परमेशरेरू ज़ै तखते पुड़ बिशोरोए, ते गबड़ेरू जयजयकार भोए।” ते सारे स्वर्गदूत ज़ैना तखतेरे च़ेवरे पासन ते बुज़ुर्गां केरे च़ेवरे पासन थिये ते च़ेवरे प्रैणेईं तैनेईं मथ्थो टेको, ते परमेशरे कां मथ्थो टेकतां ज़ोवं, “आमीन, इश्शे परमेशरेरी स्तुति, ते महिमा, ते ज्ञान, ते शुक्र ते आदर, ते सामर्थ, ते शक्ति हमेशा बनोरी राए। आमीन।”
इन गल्लन पुड़ बुज़ुर्गन मरां एक्के मीं सेइं ज़ोवं, “इना छ़ित्तां लिगड़ां लेइतां कौने? ते कोट्ठां एवरेन?” मीं तैस सेइं ज़ोवं, “हे मालिक, तूए ज़ानतस।” तैने मीं सेइं ज़ोवं, “इना तैना आन, ज़ैना तैस बड़े मुसीबती मरां निसोरेन; तैनेईं अपना लिगड़ां गबड़ेरे खूने सेइं धोइतां छ़ित्तां केरन, ज़ेसेरो मतलब तैन केरे पाप दूर किये।”
“एल्हेरेलेइ तैना परमेशरेरे तखतेरे सामनेन,
ते तैसेरे मन्दरे मां रात दिहाड़ी तैसेरी सेवा केरतन;
ते ज़ै तखते पुड़ बिशोरोए, तै तैन मां रालो ते तैन केरि रक्षा केरेलो।
ते तैना फिरी ढ्लुखोरे ते ट्लिशोरे न भोल्हे:
ते तैना दिहाड़े सेइं ते कोन्ची भी गेर्मी सेइं न फुकोले।
किजोकि गबड़ू ज़ैन तखतेरे मझ़ाटे, तैन केरि रखवाली केरेलू;
ते तैन लोकन ज़िन्दगरे पैनी कां नेलू,
ते परमेशर तैन केरे एछ़्छ़ी केरां सब ऐंखरू पुछ़ेलो।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.