Bhadrawahi Bible
प्रकाशितवाक्य 16
परमेशरेरे सरकारे सत कटोरे
तैट्ठां पत्ती मीं मन्दरे मां कोई ज़ोरे सेइं तैन सत स्वर्गदूतन सेइं ज़ोतो शुनो कि, “गाथ, परमेशरेरे सज़ाहरे सते कटोरे दुनियारे लोकन पुड़ उलटाथ।”
ते पेइले गेइतां अपनो कटोरे धेरतली पुड़ उलटव। ते तैन मैन्हु केरे ज़ैन पुड़ हैवानेरी छाप थी, ते ज़ैना लोकेईं तैसेरी मूरतरी पूज़ा केरते थी, एक्की किसमेरे बुरे ते दुख देनेबाले फोड़े निस्से।
ते दुइयोवें अपनो कटोरो समुन्दरे पुड़ उलटव, ते तै मुड़दां केरे खूनेरो ज़ेरो बनो, ते समुन्दरेरे सारे जानदार मरे।
ते ट्लेइयोवं स्वर्गदूते अपनो कटोरो दरियान ते पैनेरे नागन पुड़ उलटव, ते सारू पानी खून बन्नू। ते ज़ैस स्वर्गदूते पैनी पुड़ अधिकारे मीं तै परमेशरे सेइं इन ज़ोते शुनो कि,
“हे पवित्र परमेशर, तू ज़ै आस, ते हमेशा करां थियो, तीं कां एन्च़रे न्याय केरनेरू हक्के।
किजोकि तैनेईं तेरे लोक ते तेरे नबी मारे ते तैन केरो खून बगेवरो थियो,
एल्हेरेलेइ तीं हुना तैन खून पीने जो दित्तो।
इन इनामेरे रूपे मां तैन केरे लेई ठीक आहे।”
फिरी मीं बलिदान केरनेरी ठारी मरां ई आवाज़ शुनी कि,
“हाँ सर्वशक्तिमान प्रभु-परमेशर, तेरो न्याय सही ते कने सच़्च़ोए।”
ते च़ेवरोवें स्वर्गदूते अपनो कटोरो दिहाड़े पुड़ उलटव, ते दिहाड़े जादे गर्म भोनेरी अज़ाज़त दित्ती कि तैस सेइं लोक फुकोन। ते लोक तैस बड़े सेके सेइं फुकोए, ते तैना लोक परमेशरेरी तुहीन केरने लाए, किजोकि तैए आहे ज़ैस कां सैरी आफतन पुड़ अधिकारे। फिरी भी तैन लोकेईं अपने पापन करां मन न फिराव, ते फिरी भी तैनेईं परमेशरेरे महिमारो इकरार न कियो।
ते पंच़ोवें स्वर्गदूते अपनो कटोरो तैस हैवानेरे तखते पुड़ उलटव ते तैसेरे सारे राज़्ज़े मां आंधरू भोवं। ते लोक दुखे सेइं मरे ते अपनि-अपनि ज़िभ च़ापने लगे। ते अपने दुखे ते फोड़ां केरे वजाई सेइं सुर्गेरे परमेशरेरी तुहीन की; ते अपने-अपने कम्मन करां मन न फिरव।
शेइयोवं स्वर्गदूते अपनो कटोरो बडे दरिया फराते पुड़ उलटव ते तैसेरू पानी शुक्की जेव एसेरो नितीजो ई भोव कि पूरबेरे राज़े अपनि फौज घिन्तां पार जे। एसेरां पत्ती मीं ट्लाई भूतां मैंडू केरे रूपे मां लआं। अक अजगरेरे ऐशी मरां निस्सू, ते अक पेइले हैवानेरे ऐशी मरां निस्सू, ते अक दूइयोवं हैवानेरे ऐशी मरां निस्सू, ज़ै जो झूठो सन्देश ज़ोते। इन भूतन कां चमत्कार केरनेरी काबलीत थी ते तैना दुनियारे सारे मुल्खां केरे राज़ केरनेबालन अकोट्ठे केरने च़ले ताके तैना सर्वशक्तिमान परमेशरे सेइं लड़न, ई तै दिहाड़ीए ज़ेइस परमेशर भूतन नाश केरेलो ते अपने लोकन मुक्ति देलो। तैन भूतेईं हुकूमत केरनेबाले ते तैन केरि फौज एक्की ठैरी अकोट्ठी की ज़ैस जो इब्रानी भाषाई मां हर-मगिदोन ज़ोतन। एल्हेरेलेइ यीशुए ज़ोवरूए, “इस शुना। मेरू एजनू अचानक च़ोरेरू ज़ेरूए। धने तै मैन्हु ज़ैखन अवं एज्जी त तै बींझ़ो रहते, ते अपने लिगड़न तियार रखते। फिरी तै नग्गो न भोल्हो, ते फिरी तैस लोकन मां गाने सेइं शर्म न भोल्ही।”
ते सत्तोवं स्वर्गदूते अपनो कटोरो हवाई पुड़ उलटव, ते मीं सुर्गे मां मन्दरे मरां परमेशरे तखते पुड़ां ई बड़ी आवाज़ शुनी कि कोई ज़ोने लगोरोए, “सब किछ पूरू भोवं।” फिरी बिजली, ते आवाज़, ते गुड़ने लाव, ते अक एत्रो बड्डो भुंज़ल अव, कि ज़ेइसेरे मैन्हु इस धेरतली पुड़ पैदा भोवरेन, तेइसेरो अज़ तगर एरो भुंज़ल कधी नईं एवरो। ते तैस महान बाबेल नगरेरे ट्लाई टुक्ड़े भोए, ते दुनियारे कौमां-कौमां केरे सारे नगर बर्बाद भोए। ताके परमेशर तै वाधो पूरो केरे ज़ै तैने बाबेल नगरेरे लोकन सज़ाह देनेरे लेई कियोरो थियो। ई सज़ाह परमेशर पक्की देलो। परमेशर तैन ट्लिठी शराबी पियालो ज़ैस मां पानी न भोए मिलावरू ज़ेसेरो मतलब परमेशरे तैन सेइं बड़ो क्रोधे मांए ते तैन पुड़ दया न केरेलो। तैस वक्ते हर अक टैपू समुन्दरे मां डुबो; ते कोई भी पहाड़ न रावं। ते अम्बरेरां मैन्हन पुड़ मन-मन आण पेई, ते एल्हेरेलेइ कि ई आफत बड़ी भारी थी, लोकेईं आणरी आफतरे वजाई सेइं परमेशरेरी तुहीन की।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.