Bhadrawahi Bible
प्रकाशितवाक्य 13
दूई हैवान
मीं अक हैवान समुन्दरे मरां निस्तो लाव, तैसेरां दश शिन्गां ते सत क्रोड़ी थी; तैने शिंगन पुड़ दश राज़मुकुट ते तैसेरे क्रोड़न पुड़ परमेशरेरी तुहीनरां नंव्वां लिखोरां थियां। ज़ै मीं हैवान लाव, तै ड्लाघेरो ज़ेरो थियो; ते तैसेरे पव इछ़ेरे पव्वां केरे ज़ेरे थिये; ते तैसेरू आशी शेरेरे एशेरू ज़ेरू थियूं, ते अजगरे तैस हैवाने अपनि शक्ति दित्ती ते राज़ केरनेरे लेई तैस अधिकार दित्तो। मीं तैस हैवानेरे क्रोड़न मरां एक्की पुड़ अक एरो ज़खम लाव, ज़ेन्च़रे तै मरने पुड़े; फिरी तैसेरो मारनेबालो ज़खम ठीक भोव, ते सारे धेरतलरे लोक हैरान भोए, ते तैस हैवाने पत्ती च़लने लगे। ते तैन सेब्भी लोकेईं तैस अजगरेरी पूज़ा की, किजोकि तैने हैवाने अपनो अधिकार दित्तोरो थियो। ते इन ज़ोइतां कि, “इस हैवानेरो ज़ेरो कौने? हैवाने सेइं कौने लेड़ी बटते?”
परमेशरे तैस हैवाने अज़ाज़त दित्तोरी थी कि अपने अधिकारे पुड़ घमण्ड केरे ते एन्च़रे परमेशरेरी तुहीन केरे। परमेशरे तैस 42 महीन्न तगर ई अधिकार रखनेरे लेई अज़ाज़त दित्ती। तै हैवान परमेशरेरी तुहीन केरने लगो, कि तैसेरे नंव्वेरे खलाफ, ते ज़ैड़ी परमेशर रहते ते सुर्गे मां रानेबाले सेब्भी लोकां केरे खलाफ तुहीन केरने लगो। परमेशरे तैस हैवाने अज़ाज़त दित्तोरी थी, कि परमेशरेरे लोकन सेइं लड़े, ते तैन करां ज़ींते, ते तैस हर कुले, सारे लोकन, भाषान, त कने कौमन पुड़ अधिकार दित्तो जेव। ते धेरती पुड़ रानेबाले सेब्भी लोकेईं तैसेरी पूज़ा की। सिर्फ तैनेईं न की ज़ैन केरां नंव्वां ज़िन्दगरे किताबी मां दुनिया बनाने करां पेइले लिखोरां थियां। तै किताब गबड़ेरी ज़िन्दगरी किताबे ज़ैन बलिदानेरे लेई मारू जेवं। ज़ै समझ़नू चाते तै ध्याने सेइं शुने।
ज़ैना कैद भोनेन, तैना कैद भोल्हे, ज़ैना तलवारी सेइं मरेलो, ज़रूरीए तैना तलवारी सेइं मरेले, परमेशरेरे लोकां केरि सबर ते विश्वास इस्से मांए।
फिरी मीं अक होरो हैवान धेरतली पुड़ां निस्तो लाव, तैस गबड़ेरे ज़ेरां दूई शिन्गां थियां, पन ज़ैखन तैने ज़ोवं त तैसेरी आवाज़ अजगरेरे ज़ेरि थी। ई दूइयोवं हैवान पेइले हैवानेरो सारो अधिकार इस्तेमाल केरते। दूइयोवं हैवाने धेरती ते तैस पुड़ रानेबालन करां पेइले हैवानेरी पूज़ा कराते ज़ेसेरो मारनेबालो ज़खम ठीक भोवरो थियो। दूइयोवं हैवान बड़े-बड़े निशान हिरातो थियो, इड़ी तगर कि मैन्हु केरे सामने अम्बरेरां ज़मीनी पुड़ अग भेज़तो थियो। दूइयोवं हैवाने परमेशरे अज़ाज़त दित्ती कि तै पेइले हैवानेरे सामने चमत्कार हिराए। एन चमत्कारां केरे ज़िरिये तैनी दुनियारे सारे लोक टपलाए। तैने तैन पेइले हैवानेरी मूरती बनानेरो हुक्म दित्तो, ज़ै तलवारी सेइं मारोरो थियो पन फिरी ज़ींतो भोवरोए। दूइयोवं हैवाने परमेशरे अज़ाज़त दित्तोरी थी कि तै पेइले हैवानेरी मूरती बनाए ते तै ज़ींतोए, ताके तैस हैवानेरी मूरती गल्लां केरि बटे ते ज़ैना तैस हैवानेरी पूज़ा न केरन तैना मारे गान। दूइयोवं हैवाने सारे लोकन सेइं ज़बरदस्ती की, ज़ैना खास आन ते ज़ैना खास नईं, अमीर, गरीब, आज़ाद, गुलाम आन, कि तैना पेइले हैवानेरे नंव्वेरी मोहर देइने हथ्थे या कुपाए पुड़ लान। ज़ैस पुड़ छाप मतलब तैस हैवानेरू नवं या तैसेरो नंव्वेरो अंक भोए, त तैसेरे अलावा होरो कोई लेन देन न केरि सके। इस समझ़नेरे लेई अक्ल ज़रूरीए। ज़ैस अक्ल भोए, तै इस हैवानेरो अंक जमा केरे, किजोकि तै मैन्हेरो अंके, ते तैसेरो अंक 666 आहे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.