Bhadrawahi Bible
गिनती 4
कहाती लोकां केरो फर्ज़
फिरी यहोवाए मूसे ते हारूने सेइं ज़ोवं, “लेवी लोकन मरां कहाती लोकां केरे कुलां ते सियाना केरे घराना केरे मुताबिक तैन केरि अलग गिनती केरा, तैन मरां 30 सालन करां लेइतां 50 सालां केरि उमरी बालन मां ज़ेत्रे मड़द मिलापे बाले तेम्बु मां कम काज़ केरनेरे काबल भोन तैन केरि गिनती केर। ते मिलापे बाले तेम्बु मां बेड़ि पवित्र चीज़ां केरे बारे मां कहाती लोकां केरू एन कम भोल्हु, मतलब ज़ैखन-ज़ैखन डेरे पुटतां अग्रोवं च़लन तैखन-तैखन हारून ते तैसेरां मट्ठां नेड़े एइतां मझ़ेटियों ढकनेरो पड़दो ओसैलतां तैस सेइं करारेरो सन्दूख ढकन। तैखन तैना तैस पुड़ समुन्दरी बछ़ड़ां1 केरि खैड़ी केरे ढकनेरो पड़दो च़ाढ़न ते तैस पुड़ बिलकुल नीले रंगेरो कपड़ो बिछ़ान, ते करारेरे सन्दूखे मांमेइं डण्डे लान। ते फिरी च़ढ़तलरी रोट्टी केरे मेज़े पुड़ नीलो कपड़ो बछ़ेइतां तैस पुड़ पातरां, ते धूपदान, ते कड़छ़न, उलटानेरे कुटोरे रखन, ते रोज़ेरी रोट्टी तैस पुड़ भोए; तैखन तैना तैस पुड़ लाल रंगेरो कपड़ो बछ़ेइतां तैस पुड़ समुन्दरी बछ़ड़ां केरि खैड़न सेइं ढकन ते मेज़ेरे डण्डे लान। फिरी तैना नीले रंगेरो कपड़ो नेइतां तैस पुड़ दीयन, ते गुलतराशन, ते गुलदानन समेत लौ देनेबाले दीवटे, ते तैना सब भांडां ज़ैन मां तेल रखतन ढेकी देन। तैखन तैना तैस सारे सामाने ते दीवटे समेत समुन्दरी बछ़ड़ां केरि खैड़न सेइं ढेकी देन, ते तैस च़ेवरे डण्डन पुड़ रखन। फिरी तैना सोन्नेरी वेदी पुड़ अक नीलो कपड़ो बछ़ेइतां तैस समुन्दरी बछ़ड़ां केरि खैड़न सेइं ढेकी देन, ते तैस डण्डे लान; तैखन तैना सेवा केरनेरू सारू सामान ज़ैस सेइं पवित्र ठारी मां सेवा केरतन, एन्हतां नीले कपड़े सेइं पलेटतां समुन्दरी बछ़ड़ां केरि खैड़न सेइं ढेकतां डण्डन पुड़ रखन। फिरी तैना वेदी पुड़ेरां सब मांज़न सेल्हतां बैंगनी रंगेरो कपड़ो बिछ़ान; फिरी ज़ैस सामाने सेइं वेदी पुड़ सेवा केरतन तैन सब, यानी तैसेरे कड़छ़, सींख, बेलचे ते कुटोरे, वेदी पुड़ेरू सारू सामान तैस पुड़ रखन; ते तैस पुड़ समुन्दरी बछ़ड़ां केरि खैड़ी केरे ढकनेरो पड़दो बछ़ेइतां तैस वेदी मां डण्डे लान। ते ज़ैखन हारून ते तैसेरां मट्ठां डेरे अग्रोवं नेनेरे मौके पवित्र ठारारे सारे सामाने ढेकी देन तैखन तैसेरे बाद कहाती लोक तैस छ़ूनेरे लेई एज्जन, पन कोन्ची पवित्र चीज़ी सेइं न हुरन, एरू न भोए कि तैना मेरि गान। कहाती लोकां केरे छ़ूनेरे लेई मिलापे बाले तेम्बेरी एन्ना चीज़न।
“ज़ैना चीज़ां हारून याजकेरे मट्ठे एलीआजरे सौंफी जेवरिन, तैना इना आन, मतलब लौ देनेरे लेई तेल, ते खुशबूदार धूप, ते रोज़ेरी अन्नबलि ते अभिषेक केरनेरो तेल, ते मिलापे बाले तेम्बेरी सैरी चीज़ां, पवित्र ठार ते तैसेरू सारू सामान।”
फिरी यहोवाए मूसे ते हारूने सेइं ज़ोवं, “कहाती लोकां केरे कुलां केरे गोट्लेरे लोक लेवी लोकन मरां नाश भोने नईं देने; तैन सेइं एरू केरा कि ज़ैखन तैना महा पवित्र चीज़ां केरे नेड़े एज्जन त मरन नन्ना बल्के ज़ींते रान; पन ज़ींते रानेरे लेई एन्च़रे केरा; हारून ते तैसेरां मट्ठां पवित्र ठारी अन्तर गेइतां एन केरन कि कौन कुन कम केरे, ते कौन भारो छ़ूए एन्च़रे केरन, ते कहाती लोक पवित्र चीज़ां केरे हेरनेरे लेई अक पल भी अन्तर न एज्जन, कोन्च एरू न भोए कि तैना मेरि गान।”
गेर्शोनी लोकां केरि सेवा
फिरी यहोवाए मूसे सेइं ज़ोवं, “गेर्शोनी लोकां केरि गिनती तैन केरे सियाना केरे घराने ते कुलां केरे हिसाबे सेइं केर; 30 सालन करां लेइतां 50 सालां केरि उमरी बाले मैन्हु ज़ेत्रे भी मिलापे बाले तेम्बु मां कम काज़ केरि सकतन तैन केरि गिनती केर। सेवा केरने ते भारो छ़ूनेबाले लोकन मां गेर्शोनी कुलां केरे लोकां केरि एहे सेवा भोल्ही; मतलब तैना मिलापे बाले तेम्बेरे पड़दे, ते मिलापे बाले तेम्बेरो ढकनेरो पड़दो, समुन्दरेरे बछ़ड़ां केरि खैड़ी केरो बेइयों ढकनेरो पड़दो, ते मिलापे बाले दारेरे पड़दे। ते मिलापे बाले तेम्बेरे ते वेदी कां च़ेवरे पासां केरे अंगनेरे पड़दे, रेस्सी ते तैन सब सामान ज़ैन मिलापे बाले तेम्बेरे कम्मे मां लगते, इन सब तैना छ़ून ते तैन चीज़न सेइं ज़ैन किछ कियूं गाते, तैन सभे तैन केरि सेवाई मां एज्जे। गेर्शोनी खानदानेरी सारी सेवकाई हारून ते तैसेरां मट्ठां केरे ज़ोनेरे मुताबिक भोल्ही, यानी ज़ैन किछ तैनेईं छ़ूनू या ज़ै-ज़ै सेवा तैनेईं केरनीए तैन केरू सारू कम तुस्से तैन सौंफतां देथ। मिलापे बाले तेम्बु मां गेर्शोनी कुलां केरे लोकां केरि एहे सेवकाई भोल्ही, ते तैन पुड़ हारून याजकेरू मट्ठू ईतामार अधिकार रखेलो।
मरारी लोकां केरि सेवा
“फिरी मरारी लोकन भी तैन केरे कुलां ते सियाना केरे घराना केरे मुताबिक गिनती केर। 30 सालन करां लेइतां 50 सालां केरि उमरी बाले मैन्हु ज़ेत्रे भी मिलापे बाले तेम्बु मां कम काज़ केरि सकतन, तैन सेब्भी केरि गिनती केर। ते मिलापे बाले तेम्बु मां तैन केरि सेवकाई ई थी, तखते, लरां, खम्भे ते कुर्सी छ़ूनेरी ज़िमेवारी तैन केरि थी। तेन्च़रे च़ेवरे पासां केरे अंगनेरे खम्भे, ते तैन केरि कुर्सी, ते खुन्डे, रेस्सी, ते किसमे-किसमेरू तैन सब सामान ज़ैन कम्मे मां एजने बालूए, तैन सामान छ़ूने जो तैन सौंफू गाए, तैन मरां हर एक्की मैन्हे कुन छ़ूनूए तैस तुस ज़ोइयथ। मरारी कुलां केरी सारी सेवकाई ज़ै तैन मिलापे बाले तेम्बु मां केरनि भोल्ही, तै ईहीए, तैना हारून याजकेरे मट्ठे ईतामारेरे अधिकारे मां रान।”
लेवी लोकां केरि गिनती
तैखन मूसे ते हारूने ते मेण्डलरे प्रधानेईं कहाती लोकां केरे कुलां ते तैन केरे सियाना केरे घराना केरे मुताबिक गिनती की, यानी 30 सालन करां लेइतां 50 सालां केरी उमरी बाले मैन्हु ज़ेत्रे भी मिलापे बाले तेम्बु मां कम काज़ केरि सकते थिये तैना सब गनोरे थिये; ते ज़ैना अपने-अपने कुलां केरे मुताबिक गने जे, तैना 2750 थिये। कहाती लोकां केरे कुलन मरां ज़ेत्रे भी मिलापे बाले तेम्बु मां सेवा केरनेबाले गने जे, तैना एत्रे थिये, कि ज़ै हुक्म यहोवा मूसेरे ज़िरिये दित्तोरो थियो, तैसेरे मुताबिक मूसे ते हारूने तैन केरि गिनती की।
गेर्शोनी लोकन मरां ज़ैना अपने कुलां ते सियाना केरे घरानेरे मुताबिक गने जे, यानी 30 सालन करां लेइतां 50 सालां केरी उमरी तगर ज़ेत्रे भी मिलापे बाले तेम्बु मां सेवकाई केरि सकते थिये, तैन केरी गिनती तैन केरे कुलां ते सियाना केरे घराना केरे मुताबिक 2630 थी। गेर्शोनी लोकां केरे कुलन मरां ज़ेत्रे भी मिलापे बाले तेम्बु मां सेवा केरनेबाले गने जे, तैना एत्रे थिये, कि ज़ै हुक्म यहोवा मूसेरे ज़िरिये दित्तोरो थियो, तैसेरे मुताबिक मूसे ते हारूने तैन केरि गिनती की।
फिरी मरारी लोकां केरे कुलन मरां ज़ैना अपने-अपने सियाना केरे घरानेरे मुताबिक गने जे। यानी ज़ैना 30 सालन करां लेइतां 50 सालां केरि उमरी तगर ज़ेत्रे भी मिलापे बाले तेम्बु मां सेवकाई केरि सकते थिये, तैन केरि गिनती तैन केरे कुलां ते सियाना केरे घराना केरे मुताबिक 3200 थी। मरारी लोकां केरे कुलन मरां ज़ेत्रे भी मिलापे बाले तेम्बु मां सेवा केरनेबाले गने जे, तैना एत्रे थिये, कि ज़ै हुक्म यहोवाए मूसे नेबेरे ज़िरिये दित्तोरो थियो, तैसेरे मुताबिक मूसे ते हारूने तैन केरि गिनती की तैना एत्रे थिये।
लेवी लोकन मरां ज़ेत्रे भी मूसे ते हारूने ते इस्राएली प्रधानेईं तैन केरे कुलां ते सियाना केरे घराना केरे मुताबिक गने, यानी ज़ैना 30 सालन करां लेइतां 50 सालां केरि उमरी तगर ज़ेत्रे भी मिलापे बाले तेम्बु मां सेवा केरने ते भारो छ़ूनेरे लेई हज़ार भोनेबाले थिये, तैन सेब्भी केरि गिनती 8580 थी। एना अपनि-अपनि सेवा ते भारो छ़ूनेरे लेई यहोवारे ज़ोने पुड़ जे, ते ज़ै हुक्म यहोवाए मूसे दित्तोरो थियो, तैसेरे मुताबिक तैना गने जे।
Source notes (1)
- Cross-reference समुन्दरी बछ़ड़ां निर्ग. 25:5.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.