Bhadrawahi Bible
गिनती 36
सलोफादेरी कुइयां केरो हिस्सो
एक्सां यूसुफेरे कुलन मरां गिलाद, ज़ैन माकीरेरू मट्ठू ते मनश्शेरू पोट्लड़ू थियूं, तैसेरे खानदानेरे कुलेरे सियाना केरे घरानेरे खास-खास मड़द मूसेरे नेड़े गेइतां तैन प्रधानां केरे सामने, ज़ैना इस्राएली लोकां केरे सियाना केरे घरानेरे खास मड़द थिये, ज़ोने लगे, “यहोवा इश्शे प्रभुए हुक्म दित्तोरो थियो, कि इस्राएली लोकन चिट्ठी छ़ेडतां बेंटतां देनो; ते यहोवारो ई हुक्म भी इश्शे प्रभु मैल्हो, कि इश्शे गोट्लेरे सलोफादेरो हिस्सो तैसेरी कुइयन देनो। पन अगर तैना इस्राएली केरे कोन्ची गोट्लेरे मड़दन सेइं ड्लेई गान, त तैन केरो हिस्सो इश्शे बुज़ुर्गन करां छुट्टी गाए, ते ज़ैस गोट्ले मांजो तैना ड्लेई गान तैस्से गोट्ले मां मैल्ही गालो; तैखन इश्शो हिस्सो घटेलो। ते ज़ैखन इस्राएली लोकां केरि जुबली भोल्ही, तैखन ज़ैस गोट्ले मां तैना ड्लेई गान तैसेरे हिस्से मां तैन केरो हिस्सो पक्को मैल्हेलो; ते तै इश्शे सियानां केरे हिस्से मरां हमेशारे लेई छुटी गालो।” तैखन यहोवाए करां हुक्म मैलतां मूसे इस्राएली लोकन सेइं ज़ोवं, “यूसुफेरे गोट्लेरे लोक ठीक ज़ोतन। सलोफादेरी कुइयां केरे बारे मां यहोवा ई हुक्म दित्तोरोए, कि ज़ै बर तैसेरे नज़री मां रोड़ो लग्गे तैस्से सेइं ड्लाई गाए; पन तैना अपने बाजे केरे गोट्लेरे कुले मां ड्लेई गान। ते इस्राएली कोन्ची गोट्लेरो हिस्सो होरी गोट्लेरे हिस्से मां न मैल्हे; इस्राएली अपने-अपने बाजी केरे गोट्लेरे हिस्से पुड़ बनोरे रान। ते इस्राएली केरे कोन्ची गोट्ले मां कोन्चेरी कुई भोए ज़ै हिस्सो नेने बाली भोए। तै अपने बाजी केरे गोट्लेरे मड़दे सेइं ड्लाई गाए, एल्हेरेलेइ कि इस्राएली अपने-अपने बाजी केरे हिस्सेरे अधिकारी रान। कोन्ची गोट्लेरो हिस्सो होरि गोट्लेरे हिस्से मरां न मैल्हे; इस्राएली एक्की-एक्की गोट्लेरे लोक अपने-अपने हिस्से पुड़ बनोरे रान।” यहोवारे हुक्मेरे मुताबिक ज़ै तैनी मूसे दित्तो सलोफादेरी कुइयेईं कियूं। मतलब महला, तिर्सा, होग्ला, मिल्का, ते नोवा ज़ैना सलोफादेरी कुइयां थी, तैनेईं अपने चाचेरे मट्ठन सेइं ड्लाह बनाव। तैना यूसुफेरे मट्ठे मनश्शेरे खानदाने मां ड्लेई जेई, ते तैन केरो हिस्सो तैन केरे बाजी केरे कुलेरे गोट्लेरे अधिकारे मां बनोरो राव।
ज़ैना हुक्म ते नियम यहोवाए मोआबेरे अराबा मां यरीहोएरे नेड़ेरे यरदन दरियारे बन्ने पुड़ मूसेरे ज़िरिये इस्राएली लोकन दित्ते तैना इना आन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.