Bhadrawahi Bible
गिनती 29
नरशिंगे केरे तिहारेरी दिहाड़ी
“फिरी सत्तोवं महीनेरे1 पेइले दिहाड़े तुश्शी पवित्र सभा भोल्ही; तैस मां मेहनतरू कोई कम न कियूं गालू। तै दिहाड़ी तुश्शे लेई जयजयकार केरनेरी नरशिंगो बज़ानेरी दिहाड़ी भोल्ही; तुस होमबलि च़ैढ़थ, ज़ैस सेइं यहोवारे लेई खुश केरनेबाली खुशबू भोए; मतलब, अक बछ़ड़ू ते अक हुड़, ते एक्की-एक्की सालेरां सत बगैर नुक्से गबड़ां; ते तैन केरी अन्नबलि तेले सेइं सन्नोरे अट्टेरी भोल्ही; मतलब, बछ़ड़े सेइं साथी एपारो ट्लाई दशोवं अंश, ते हुड़े सेइं साथी एपारो अक दशोवं अंश, ते सत्ते गबड़न मरां एक्की-एक्की गबड़े सेइं साथी एपारो अक दशोवं अंश मैदो च़ाढ़नो। ते तैस सेइं साथी अक थाव्वो भी पापबलि केरतां च़ाढ़नो, ज़ैस सेइं तुश्शे लेई प्रायश्चित भोए। एन सेब्भन करां जादे नव्वीं चैंदनरी होमबलि ते तैसेरी अन्नबलि ते रोज़ेरी होमबलि ते तैसेरी अन्नबलि, ते तैन सेब्भी केरी पीनेरी च़ढ़तल भी तैन केरे नियमेरे मुताबिक खुश केरनेबाली खुशबू देनेरे लेई यहोवा कां हबन केरतां च़ाढ़नू।
प्रायश्चितेरि दिहाड़ी
“फिरी तैस्से सत्तोवं महीनेरे दशोवं दिहाड़े तुश्शी पवित्र सभा भोल्ही; तुस बरत रेखतां एपनी-एपनी जानी दुख देइयथ, ते कोन्ची किसमेरू कम काज़ न केरथ; ते यहोवारे लेई खुश केरनेबाली खुशबू देनेरे लेई होमबलि; मतलब, अक बछ़ड़ू, ते अक हुड़, ते एक्की-एक्की सालेरां सत गबड़ां च़ाढ़ना, तैना सब बगैर नुक्से लोड़तन; ते तैन केरी अन्नबलि तेले सेइं सन्नोरे अट्टेरी भोल्ही; मतलब, बछ़ड़े सेइं साथी एपारो ट्लाई दशोवं अंश, ते हुड़े सेइं साथी दूई दशोवं अंश, ते सत्ते गबड़न मरां एक्की-एक्की गबड़े सेइं साथी पेइले एपारो अक दशोवं अंश मैदो च़ाढ़नो। ते पापबेलरे लेई अक थाव्वो भी च़ाढ़नो; एना सब प्रायश्चित केरनेरे लेई ते पापबेलरे लेई रोज़ होमबलि ते अन्नबलि ते तैन सेब्भी केरे पीनेरी च़ढ़तलरे अलावा च़ाढ़ू गालू।
झोफड़ी केरू तिहार
“फिरी सत्तोवं महीनेरे परहनोवं दिहाड़े तुश्शी पवित्र सभा भोल्ही; ते तैस मां मेहनतरू कोई कम काज़ न केरथ, ते सत दिहाड़न तगर यहोवारे लेई तिहार मनेइयथ; तुस होमबलि यहोवारे लेई खुश केरनेबाली खुशबू देनेरे लेई तेरहे बछ़ड़ां ते दूई हुड़ ते एक्की-एक्की सालेरां 14 बगैर नुक्से गबड़ां; इना सब अग्गी मां अर्पित केरतां च़ैढ़थ; ते तैन केरी अन्नबलि तेले सेइं सन्नोरे अट्टेरी भोल्ही, मतलब 13 बछ़ड़न मरां एक्की-एक्की बछ़ड़े सेइं साथी एपारो ट्लाई दशोवं अंश, ते दूईये हुड़न मरां एक्की-एक्की हुड़े सेइं साथी एपारो दूई दशोवं अंश, ते 14 गबड़न मरां एक्की-एक्की गबड़े सेइं साथी एपारो अक दशोवं अंश मैदो च़ाढ़नो। ते पापबलि देनेरे लेई अक थाव्वो भी च़ाढ़नो; ऐह रोज़ेरी होमबलि ते अन्नबलि पीनेरी च़ढ़तलरे अलावा च़ाढ़ी गाली।
“फिरी होरसां 12 बछ़ड़ां ते दूई हुड़, एक्की-एक्की सालेरां 14 गबड़ां बगैर नुक्से च़ाढ़ना; ते बछ़ड़न ते हुड़न ते गबड़न सेइं साथी तैन केरि अन्नबलि ते पीनेरी च़ढ़तल, तैन केरी गिनतरे मुताबिक ते नियमेरे मुताबिक च़ाढ़नी। ते पापबेलरे लेई अक थाव्वो भी च़ाढ़नो; ऐह रोज़ेरी होमबलि ते तैसेरी अन्नबलि पीनेरी च़ढ़तलरे अलावा च़ाढ़ी गाली।
“ते फिरी ट्लेइयोवं दिहाड़े 11 बछ़ड़ां ते दूई हुड़, ते एक्की-एक्की सालेरां 14 बगैर नुक्से गबड़ां च़ाढ़ना; ते बछ़ड़न ते हुड़न ते गबड़न सेइं साथी तैन केरी अन्नबलि ते पीनेरी च़ढ़तलरे गिनतरे मुताबिक ते नियमेरे मुताबिक च़ाढ़नी। ते पापबेलरे लेई अक थाव्वो भी च़ाढ़नो; ऐह रोज़ेरी होमबलि ते तैसेरी अन्नबलि पीनेरी च़ढ़तलरे अलावा च़ाढ़ी गाली।
“ते फिरी च़ेवरोवं दिहाड़े 10 बछ़ड़ां ते दूई हुड़, ते एक्की-एक्की सालेरां 14 बगैर नुक्से गबड़ां च़ाढ़ना; बछ़ड़न ते हुड़न ते गबड़न सेइं साथी तैन केरी अन्नबलि ते पीनेरी च़ढ़तलरे गिनतरे मुताबिक ते नियमेरे मुताबिक च़ाढ़नी। ते पापबलि देनेरे लेई अक थाव्वो भी च़ाढ़नो; ऐह रोज़ेरी होमबलि ते तैसेरी अन्नबलि पीनेरी च़ढ़तलरे अलावा च़ाढ़ी गाली।
“ते फिरी पंच़ोंव दिहाड़े 9 बछ़ड़ां ते दूई हुड़, ते एक्की-एक्की सालेरां 14 बगैर नुक्से गबड़ां च़ाढ़ना; ते बछ़ड़न ते हुड़न ते गबड़न सेइं साथी तैन केरी अन्नबलि ते पीनेरी च़ढ़तलरे गिनतरे मुताबिक ते नियमेरे मुताबिक च़ाढ़नी। ते पापबेलरे लेई अक थाव्वो भी च़ाढ़नो; ऐह रोज़ेरी होमबलि ते तैसेरी अन्नबलि पीनेरी च़ढ़तलरे अलावा च़ाढ़ी गाली।
“ते फिरी शेइयोवं दिहाड़े अठ बछ़ड़ां ते दूई हुड़, ते एक्की-एक्की सालेरां 14 बगैर नुक्से गबड़ां च़ाढ़ना; बछ़ड़न ते हुड़न ते गबड़न सेइं साथी तैन केरी अन्नबलि ते पीनेरी च़ढ़तलरे गिनतरे मुताबिक ते कानूनेरे मुताबिक च़ाढ़नी। ते पापबेलरे लेई अक थाव्वो भी च़ाढ़नो; ऐह रोज़ेरी होमबलि ते तैसेरी अन्नबलि पीनेरी च़ढ़तलरे अलावा च़ाढ़ी गाली।
“ते फिरी सत्तोवं दिहाड़े सत बछ़ड़ां ते दूई हुड़, ते एक्की-एक्की सालेरां 14 बगैर नुक्से गबड़ां च़ाढ़ना। बछ़ड़न ते हुड़न ते गबड़न सेइं साथी तैन केरी अन्नबलि ते पीनेरी च़ढ़तलरे गिनतरे मुताबिक ते नियमेरे मुताबिक च़ाढ़नी। ते पापबेलरे लेई अक थाव्वो भी च़ाढ़नो; एना रोज़ेरी होमबलि ते तैसेरी अन्नबलि पीनेरी च़ढ़तलरे अलावा च़ाढ़ी गाली।
“फिरी अठोवं दिहाड़े तुश्शी पवित्र सभा भोल्ही; तुस तैस मां कोई कम काज़ न केरथ। ते तैस मां होमबलि यहोवारे लेई खुश केरनेबाली खुशबू देनेरे लेई अक बछ़ड़ू, ते अक हुड़ ते एक्की-एक्की सालेरां सत बगैर नुक्से गबड़ां अग्गी मां अर्पित केरतां च़ैढ़थ। बछ़ड़न ते हुड़न ते गबड़न सेइं साथी तैन केरी अन्नबलि ते पीनेरी च़ढ़तलरे गिनतरे मुताबिक ते नियमेरे मुताबिक च़ाढ़नी। ते पापबेलरे लेई अक थाव्वो भी च़ाढ़नो; ऐह रोज़ेरी होमबलि ते तैसेरी अन्नबलि पीनेरी च़ढ़तलरे अलावा च़ाढ़ी गाली।
“एपनी मिन्नतां ते अपने मेर्ज़री बेलि केरे अलावा अपने-अपने ठीक वक्ते पुड़ होमबलि ते अन्नबलि ते पीनेरी च़ढ़तल ते मेलबलि यहोवारे लेई च़ाढ़नी।” एना सारे हुक्म यहोवा मूसे जो दित्ते, ज़ैना तैनी इस्राएली लोकन शुनाए।
Source notes (1)
- Footnote सत्तोवं महीने इब्रानी कलंडरेरे मुताबिक अध्धे सतम्बरेरे करां अकतूबर अध्धे तगर। ई इब्रानी सालेरो बड़ो पवित्र भोतो थियो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.