Bhadrawahi Bible
गिनती 25
इस्राएली लोकां केरो कुकर्म केरनो ते तैसेरी सज़ाह
इस्राएली लोक शित्तीमे मां रहते वक्त तैना मोआबी कुइयन सेइं कुकर्म केरने लगे। ते ज़ैखन तैन कौन्शेइं तैन लोकन अपने देबतां केरे जगन मां कुजाए त तैखन तैना लोक खेइतां तैन केरे देबतां केरि आराधना केरने लगे। एस तरीके सेइं इस्राएली लोक बालपोर देबतेरी पूज़ा केरने लगे, तैखन यहोवारो क्रोध इस्राएली लोकन पुड़ भड़को; ते यहोवाए मूसे सेइं ज़ोवं, “प्रजारे सारे प्रधान ट्लेइतां यहोवारे सामने धुप्पी मां1 टेंगी दे, ज़ैस सेइं मेरो भड़कोरो क्रोध इस्राएली लोकन पुड़ेरां दूर भोए।” तैखन मूसे इस्राएली हाकिमन सेइं ज़ोवं, “तुश्शे ज़ैना-ज़ैना मैन्हु बालपोर देबते सेइं साथी मिली जेवरेन, तैन मारा।”
ज़ैखन इस्राएली लोकां केरी सारी मण्डली मिलापे बाले तेम्बेरे दारे पुड़ लेरां लगोरी थी देने, त एक्की इस्राएली मैन्हें मूसेरे ते सेब्भी लोकां केरी एछ़्छ़ी केरे सामने अक मिद्यानी कौन्श एप्पु सेइं साथी अपने ढ्लान कां आनी। तैस लेहितां एलीआजरेरू मट्ठू पीनहास ज़ैन हारून याजकेरू पोट्लड़ू थियूं, तैनी मेण्डली मरां उठतां हथ्थे मां अक बलम ट्लाती, ते ज़ैखन तैस इस्राएली मड़देरे डेरे मां गानेरां बाद तै भी अन्तर जेव, ते तैस मड़देरे ते तैस कौन्शरे दूईयां केरे पेटे मां बलम डोबी। एस वजाई सेइं ज़ै इस्राएली लोकन मां महामारी फैलोरी थी बन्द भोइ जेई। ते महामारी सेइं 24000 मैन्हु मेरि जेवरे थिये।
तैखन यहोवाए मूसे सेइं ज़ोवं, “हारून याजकेरे पोट्लड़े एलीआजरेरे मट्ठे पीनहासे, ज़ैस इस्राएली लोकन मां मेरी ज़ेरी जलन भोइ, तैनी तैन पुड़ेरां मेरी सरक एड़ी तगर दूर की, कि मीं जलनी सेइं तैन केरो अन्त न कियो। एल्हेरेलेइ तू ज़ोई दे, कि अवं तैन सेइं शान्ति केरनेरो करार केरताईं।
“ते तैना तैसेरे लेई, ते तैसेरे बाद तैसेरे खानदानेरे लेई, हमेशा तगर याजक पदेरो करार भोल्हो, किजोकि तैस अपने परमेशरेरे लेई जलन भोइ, ते तैनी इस्राएली लोकां केरे लेई प्रायश्चित कियूं।” ज़ै इस्राएली मड़द मिद्यानी कौन्शी सेइं साथी मारो जेव, तैसेरू नवं जिम्री थियूं, तै सालू नंव्वेरे मैन्हेरू मट्ठू ते शिमोनी लोकां केरे अपने सियाना केरे घरानेरो प्रधान थियो। ते ज़ै मिद्यानी कौन्श मारी जेई, तैसारू नवं कोजबी थियूं, तै सूरेरी कुई थी, ज़ै मिद्यानी सियाना केरे लोकां केरे घरानेरो प्रधान थियो।
फिरी यहोवा मूसे सेइं ज़ोवं, “मिद्यानी लोकन पुड़ हमलो केर, ते तैन मार; किजोकि पोर ठारारे बारे मां ते कोजबी कौन्शरे बारे मां तैना तुसन धोखे सेइं सतातन।” कोजबी त अक मिद्यानी प्रधानेरी कुई ते मिद्यानी लोकां केरे कौमरी बेइन भी थी, ते महामारी भोनेरे दिहाड़न मां पोरेरे मामले मां मारी जेई।
Source notes (1)
- Footnote धुप्पी मां मतलब सेब्भी केरे सामने
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.