Bhadrawahi Bible
लैव्यव्यवस्था 7
दोषबलि
“फिरी दोष बेलरो1 कानून ईए। तै परमपवित्रे; ज़ैस ठारी पुड़ होमबेलरे जानबरे मारतन तैस्से ठारी पुड़ दोषबलि जानबर भी बलि कियो गाए, ते तैसेरे खूने याजक वेदी पुड़ च़ेवरे पासन छ़िड़के। ते तै तैस मरां सब चर्भी च़ाढ़े, मतलब तैसेरे मोट्टे पौंछ़ड़े, ते ज़ैस चेर्भी सेइं आंट्लां ढेकोरी रैतिन तै भी, ते दूईये गुर्दे ते ज़ै चर्भी तैन पुड़े ते ट्लिगे कां रहतीए, ते गुर्दन सने कलैज़े करां बेइयीं झिल्‍ली; इन सेब्भन तै अलग केरे; ते याजक इन्न वेदी पुड़ यहोवारे लेई हबन केरे; तैखन तै दोषबलि भोल्ही। याजकन मरां सब मड़द तैस मरां खेइ सकतन; तै कोन्ची पवित्र ठारी मां खाइ गाली; किजोकि तै परमपवित्रे। ज़ेरि पापबलि आहे तेरही दोषबलि भी आहे, तैन दूईयां केरो अक्‍के कानूने; ज़ै याजक तैन बेलन च़ैढ़तां प्रायश्चित केरे तैए तैन चीज़न ने। ते ज़ै याजक केन्चेरे लेई होमबलि च़ाढ़े तैस होमबेलरे जानबरेरी खाड़ी तैए याजक ने। ते तंदूरे मां, या किड़ेई मां, या तव्वे पुड़ पकोरे सब अन्नेरी बेलि तैस्से याजकेरी भोल्ही ज़ै तैन्न च़ाढ़ते। ते सब अन्नेरी बेलि, ज़ैना चाहे तेले सेइं सेन्नोरि भोन चाहे शुकोरी भोन, तैना हारूनेरे सेब्भी मट्ठन बराबर मैल्हन।
मेलबलि
“मेलबलि ज़ै कोई यहोवारे लेई च़ाढ़े कानून ईए: अगर तै तैस शुक्रगुज़ेरारे लेई च़ाढ़े, त शुक्रगुज़ेरारे बेलि सेइं साथी तेले सेइं सन्नोरे अखमीरी फुलके, ते तेले सेइं च़ोपड़ोरि अखमीरी रोट्टी, ते तेले सेइं सन्नोरे अट्टेरे फुलके तेल सेइं तर केरतां च़ाढ़े। ते तै अपने शुक्रगुज़ेरारे लेई मेलबेलि सेइं साथी अखमीरी रोट्टी भी च़ाढ़े। ते एरी एक्‍की-एक्‍की च़ढ़तली मरां तै अक-अक रोट्टी यहोवा जो सल्‍लनेरी च़ढ़तल केरतां च़ाढ़े; तै मेलबेलरे खूने छ़िड़कने बाले याजकेरी भोल्ही। ते तैस शुक्रगुज़ेरारे लेई मेलबेलरू मास बलि च़ाढ़नेरे दिहाड़े खावं गाए; तैस मरां किछ भी झ़ेझ़ां तगर बाकी न राए। पन अगर तैसेरे बेलरी च़ढ़तल बन्धेरी या अपने मेर्ज़री भोल्ही, त तै बलि ज़ैस दिहाड़े च़ाढ़ी गाली तैस्से दिहाड़े तै खाइ गाली, ते तैस मरां ज़ै बाकी रेही गाए तै होरसां भी खाइ गाली। पन ज़ैन किछ बलि कियोरे मासे मरां ट्लेइयोवं दिहाड़े तगर रेही गाए तैन अग्गी मां फुक्‍कू गालू। ते तैसेरे मेलबेलरे मासे मरां अगर किछ भी ट्लेइयोवं दिहाड़े खावं गालू, त तैन कबूल न भोल्हु, ते न तैसेरे हके मां गनु गालू; तैन बुरू कम समझ़ू गालू, ते ज़ै कोई तैस मरां खाए तैसेरो अधर्म तैसेरे दोग्गे पुड़ पेलो।
“फिरी ज़ैन मास कोन्ची अशुद्ध चीज़ी सेइं हुरी गाए तैन न खावं गालू; तैन अग्गी मां फुक्‍कू गालू। फिरी मेलबेलरू मास ज़ेत्रे शुद्ध मैन्हु भोन तैना खान, पन ज़ै अशुद्ध भोइतां यहोवारे मेलबेलरे मासे मरां किछ खाए तै अपने लोकन मरां अलग कियो गालो। ते कोई कोन्ची भिट्टी चीज़ी सेइं हुरतां यहोवारे मेलबलि जानबरेरे मासे मरां खाए, त तै भी अपने लोकन मरां अलग कियो गालो, चाहे तै मैन्हेरी कोई भिट्टी चीज़ या अशुद्ध जानबर या कोई भी अशुद्ध ते भिट्टी चीज़ भोए।”
खून ते चर्भी मनाह केरनि
फिरी यहोवाए मूसे सेइं ज़ोवं, “इस्राएली लोकन सेइं एन्च़रां ज़ो: तुस लोक न त दांतेरी किछ चर्भी खेइयथ ते न भैड या छ़ेल्‍लरी। ते ज़ै जानबर एप्पु मेरि गाए, ते ज़ैस दूइयोवं जानबर छ़िन्दे, तैसेरी चर्भी होरि बाकी कम्मे मां आनी गाए, पन तै कोन्ची किसमे सेइं खाइ न गाए। ज़ै कोई एरे जानबरेरी चर्भी खालो ज़ैस मरां लोक किछ यहोवारे लेई हबन केरतां च़ाढ़तन तै खाने बालो अपने लोकन मरां अलग कियो गालो। ते तुस अपने घरे मां कोन्ची किसमेरो खून न खेइयथ, चाहे तै च़ुड़ोलू केरो या जानबरेरो भोए। हर अक मैन्हु ज़ै कोन्ची किसमेरो खून खालो तै अपने लोकन मरां अलग कियो गालो।”
फिरी यहोवाए मूसे सेइं ज़ोवं, “इस्राएली लोकन सेइं एन्च़रां ज़ो: ज़ै यहोवारे लेई मेलबलि च़ाढ़े तै तैस्से मेलबेलि मरां यहोवा कां च़ढ़तल आने; तै अपने हथ्थन सेइं यहोवारे हबने, मतलब छैती सने चेर्भी आने कि छाती, हिलानेरी च़ढ़तल केरतां यहोवारे सामने हिलाई गाली। ते याजक चर्भी त वेदी पुड़ फुक्‍के, पन छाती हारून ते तैसेरे मट्ठां केरि भोल्ही। फिरी तुस अपने मेलबेलिन मरां देइनी ज़ंघ भी सल्‍लनेरी च़ढ़तल केरतां याजके जो देइयथ; हारूनेरे मट्ठन मरां ज़ै मेलबेलरे खूने ते चर्भी च़ाढ़े देइनी ज़ंघ तैसेरो हिस्सो भोल्हो। किजोकि इस्राएली लोकां केरे मेलबेलिन मरां हिलानेरी च़ढ़तल छाती ते सल्‍लनेरी च़ढ़तल ज़ंघी नेइतां मीं याजक हारूने ते तैसेरे मट्ठन दित्तोरीए, कि इन सदा इस्राएली लोकां केरे तरफां तैन केरू हक हमेशा भोल्हु।”
“ज़ैस दिहाड़े हारून ते तैसेरां मट्ठां यहोवा कां याजकेरी पेदवरे लेई आनां जेआं, तैस्से दिहाड़े यहोवारे हबनन मरां तैन केरो ई अभिषिक्त हिस्सो रख्खो जेव; मतलब ज़ैस दिहाड़े यहोवा तैन केरू अभिषेक कियूं तैस्से दिहाड़े तैनी हुक्म दित्तो कि तैन जो इस्राएली केरे तरफां ई हिस्सो रोज़ मैल्हे; तैन केरि पीढ़ी-पीढ़ी तगर तैन केरू इन्ने हक रख्खू जेवं।”
होमबलि, अन्नेरी बलि, पापबलि, दोषबलि, याजकां केरि संस्कार बलि, ते मेलबेलरो कानून ईए आहे; ज़ैखन यहोवा सीनै पहाड़ेरे नेड़े सुनसान ठैरी मां मूसे हुक्म दित्तो कि इस्राएली मेरे लेई कुन-कुन च़ढ़तल च़ाढ़न, तैखन तैनी तैन जो ईए कानून दित्तोरो थियो।
Source notes (1)
- Footnote दोष बेलरो चुकानेरी बलि
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.