Bhadrawahi Bible
लैव्यव्यवस्था 5
दोष बेलरी विधि
“अगर कोई गवाह भोइतां एरहो पाप केरे कि कसम खुवेइतां पुछ़ने पुड़ भी, कि तीं इन कुन शुनू ते ज़ानतस, ते तै गल बांदी न केरे, त तैस अपने अधर्मेरो भार छ़ूनो पेलो। ते अगर कोई कोन्ची रसमरे मुताबिक भिट्टी चीज़ी सेइं अनज़ान भोइतां हुरे, त चाहे तै अशुद्ध जंगली जानबरेरी, चाहे अशुद्ध पैलतू जानबरां केरि भोए, चाहे अशुद्ध रेंगनेबाले जीप जन्तू केरि लाश भोए, त तै अशुद्ध भोइतां दोषी ठहरे। ते अगर कोई मैन्हु कोन्ची भिट्टी चीज़ी सेइं अनज़ाने मां हुरे, चाहे तै भिट्टी चीज़ कोन्ची भी किसमेरी की न भोए ज़ैस सेइं लोक अशुद्ध भोतन त ज़ैखन तै तैस गल्ली बुझ़ेलो तैखन तै दोषी ठहरे। ते अगर कोई मैन्हु बुरू या भलू केरनेरे लेई बगैर सोचे समझ़े कसम खाए, चाहे कोन्ची किसमेरी गल तै बगैर सोची सेमझ़तां कसम खेइतां ज़ोए, त एरी गल्ली मां तै दोषी तैस वक्ते ठहरे ज़ैखन तैस पतो लग्गेलो। ते ज़ैखन तै इन गल्लन मरां कोन्ची भी गल्ली मां दोषी भोवरो भोए, त तैखन ज़ैस बारे मां तैनी पाप कियोरो भोए तै तैस मन्ने, ते तै यहोवारे सामने अपनि दोषबलि आने, मतलब तैस पापेरे वजाई सेइं तै अक भैड या छ़ेल्ली पापबलि केरनेरे लेई आने; तैखन याजक तैस पापेरे बारे मां तैसेरेलेइ प्रायश्चित केरे।
“पन अगर तैस भैड या छ़ल्ली देनेरी ताकत न भोए, त अपने पापेरे वजाई सेइं दूई घुग्गू या कबूतरेरे दूई बच्चे दोषबलि च़ाढ़नेरे लेई यहोवा कां आने, तैन मरां अक त पापबेलरे लेई ते होरो होमबेलरे लेई। तै तैन्न याजके कां आने, ते याजक पापबेलि बाले पेइले च़ाढ़े, ते तैसेरी क्रोड़ी गले करां मुरोड़े, पन अलग न केरे, ते तै पापबेलरे जानबरेरे खूने मरां किछ वेदरे ड्लेखी पुड़ छ़िड़के, ते ज़ै खून बाकी राए तै वेदरे पेइड़े पुड़ डोलो गाए; तै त पापबलि भोल्ही। तैखन दूइयोवं च़ुड़ोलोवें तै रखोरे नियमेरे मुताबिक होमबलि केरे, ते याजक तैसेरे पापेरो प्रायश्चित केरे, ते तैखन तैस माफ़ कियूं गालू।
“अगर तै दूई घुग्गू या कबूतरेरे दूई बच्चे भी न देइ बटे, त तै अपने पापेरे वजाई सेइं अपनि च़ढ़तल एपारो दशोवं हिस्सो1 अट्टू पापबलि केरतां आने; तैस पुड़ न तै तेल छ़डे, ते न लोबान रख्खे, किजोकि तै पापबलि आहे। तै तैस याजके कां ने, ते याजक तैस मरां अपनि मुठड़ी भेरतां याद कराने बालो हिस्सो सेमझ़तां वेदी पुड़ यहोवारे हबनन पुड़ फुक्के; तै त पापबलि भोल्ही। ते इन गल्लन मरां कोन्ची भी गल्लरे बारे मां ज़ै कोई पाप केरे, याजक तैसेरू प्रायश्चित केरे, ते तैखन तै पाप माफ़ कियो गालो। ते इस पापेरी बेलरी बाकी अन्नेरी बेलरी बाकी चीज़ां केरि ज़ेरि याजकेरी भोल्ही।”
फिरी यहोवाए मूसे सेइं ज़ोवं, “कोई यहोवारी पवित्र कियोरी चीज़ां केरे बारे मां बिसरतां धोखो केरतां तै पापी भोइ गाए, त तै यहोवा कां अक बगैर नुक्से हुड़ दोषेरे बेलरे लेई आने; तैसेरी कीमत पवित्र ठारारे शेकेलेरे मुताबिक एत्रे शेकेल चाँदी भोए ज़ेत्री याजक बनाए। ते ज़ैस पवित्र चीज़रे बारे मां तैनी पाप कियोरो भोए, तैस मां तै पंच़ोंव हिस्सो होरो बेद्धतां याजके दे; ते याजक दोषबेलरे हुड़े च़ैढ़तां तैसेरेलेइ प्रायश्चित केरे, तैखन तैसेरो पाप माफ़ कियो गालो। कोई एरहो पाप केरे, कि तैन कम्मन मरां ज़ैना यहोवाए ठाकोरन, कोन्ची कम्मे केरे, त चाहे तैन, तैसेरे अनज़ाने मां भोए, त फिरी भी तै दोषी ठहरे, ते तै अपने अधर्मेरो ज़िमेवार भोल्हो। एल्हेरेलेइ तै अक बगैर नुक्से हुड़ दोषेरी बलि केरतां याजके कां आने, तै एत्री कीमतरो भोए ज़ेत्री याजक बनाए, ते याजक तैसेरेलेइ तैसेरी तैस भूलरे लेई ज़ै तैने अनज़ाने मां कियोरी भोए प्रायश्चित केरे, ते तैखन तैस माफ़ कियूं गालू। ई दोषबलि भोल्ही; किजोकि तै मैन्हु बे शक यहोवारे सामने दोषी ठहरे।”
Source notes (1)
- Footnote एपारो अक किल्लो
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.