Bhadrawahi Bible
लैव्यव्यवस्था 26
बरकतरो करार,
“तुस अपने लेई मूरती न बनेइयथ, ते न कोई घड़ाई केरतां मूरती या खम्भो अपने लेई खड़ो केरथ, ते न अपने मुल्खे मां पूज़ा केरनेरे लेई नक्काशीदार घोड़ बनेइयथ; किजोकि अवं तुश्शो परमेशर यहोवा आईं। तुस मेरे आरामेरे दिहाड़न मेन्नथ ते मेरे पवित्र ठारारो डर मेन्नथ; अवं यहोवा आईं।
“अगर तुस मेरी विधन पुड़ च़लथ ते मेरे हुक्मन मेनतां तैन पुड़ अमल केरथ, त अवं तुश्शे लेई वक्ते-वक्ते पुड़ झ़ड़ी बखेइलो, तैखन ज़मीन अपनि फसल उगाली, ते मैइदानेरे बुट अपने-अपने फल देले; इड़ी तगर कि तुस दाछ़ ट्लोड़नेरे वक्ते भी फसल मडते राले, ते बेनेरे वक्ते भी पेट भेरतां दाछ़ ट्लोड़ते राले, ते तुस मन पसंद रोट्टी खाएले, ते अपने मुल्खे मां बे फिक्र बस्सेले। ते अवं तुश्शे मुल्खे मां सुख चैन देइलो, ते तुस झ़ुलेले ते तुश्शो कोई डराने बालो न भोल्हो; ते अवं तैस मुल्खे मां खतरनाक जीपन राने न देइलो, ते तलवार तुश्शे मुल्खे मां न च़लेली। ते तुस अपने दुश्मना केरो पीछो केरतां निशानेले, ते तैना तुश्शी तलवारी सेइं मारे गाले। तुसन मरां पंच़ मैन्हु शौवन ते शौव मैन्हु दश हज़ारन निशानेले; ते तुश्शे दुश्मन तलवारी सेइं तुसन अग्री-अग्री मारे गाले; ते अवं तुसन पुड़ सिद्धी नज़र रखेलो ते तुसन फलदार केरेलो ते बधेइलो, ते तुसन सेइं अपनो करार पूरो केरेलो। ते तुस रखोरे पुराने अन्ने खाएले, ते नंव्वेरे रहते भी पुराने कढेले। ते अवं तुश्शे दरमियाने अपने रानेरी ठारी बनोरी रखेलो, ते मेरो दिल तुसन सेइं नफरत न केरेलो। ते अवं तुश्शे दरमियान च़लेलो फिरेलो, ते तुश्शो परमेशर बनोरो रेइलो, ते तुस मेरे लोक बनोरे राले। अवं त तुश्शो तै परमेशर यहोवा आईं, ज़ै तुसन मिस्र मुल्खे मरां एल्हेरेलेइ केढतां अव कि तुस मिस्री केरे गुलाम बनोरे न राथ; ते मीं तुश्शू जुऊं ट्लोड़ू, ते तुस सिद्धे खड़े केरतां च़लाए।
हुक्म न मन्नेरी सज़ाह
“पन अगर तुस मेरी न शुनेले, ते इन सब हुक्मन न मन्नेले, ते मेरी विधन फुज़ूल समझ़ेले, ते तुश्शी आत्मा मेरे फैसलन सेइं नफरत केरे, ते तुस मेरे सब हुक्मन न मन्नेले, बल्के मेरो करार ट्लोड़ेले, त अवं तुसन सेइं इन केरेलो; अवं तुसन बेचैन केरेलो, ते क्षयरोग ते भुखारे सेइं दुखी केरेलो, ते इन केरे वजाई तुश्शी एछ़्छ़ी केरि लौ घट भोइ गाली, ते तुश्शो मन बड़ो परेशान भोल्हो। ते तुश्शू बीज़ बेनू बेफैइदू भोल्हु, किजोकि तुश्शे दुश्मन तैसेरी फसल खाएले; ते अवं भी तुश्शे खलाफ भोइ गेइलो, कि तुस अपने दुश्मन्न करां हारथ; ते तुसन सेइं बैर रखनेबाले तुसन पुड़ हुकूमत केरेले, ते ज़ैखन कोई तुसन निशानतो भी न भोल्हो तैखन भी तुस नश्शेले। ते अगर तुस इन आफतां केरे बाद भी मेरी न शुनथ, त अवं तुश्शे पापां केरे वजाई सेइं तुसन सत गुणा झ़िड़क होरि देइलो, ते अवं तुश्शे ताकतरू घमण्ड ट्लोड़ी छ़डेलो, ते तुश्शे लेई अम्बर लोंहेरू ज़ेरू ते धरती पितलरी ज़ेरि बरकत एजने करां रोकेलो; ते एन्च़रे सेइं तुश्शी ताकत फुज़ूले मां गुवाई गाली, किजोकि तुश्शी ज़मीन अपनि फसल न उगाली, ते मैइदानेरे बुट अपने फल न देले।
“अगर तुस मेरे खलाफ च़लते राले, ते मेरू ज़ोनू न मन्नथ, त अवं तुश्शे पापां केरे मुताबिक तुसन पुड़ सत गुणा होरि मुसीबत छ़डेलो। ते अवं तुसन मां जंगली जानबर भेज़ेलो, ज़ैना तुसन बेऔलाद केरेले, ते तुश्शे पैलतू जानबरन नाश केरेले, ते तुश्शी गिनती घटाले, कि तुश्शी सड़कां खाली पेई गैली।
“फिरी अगर तुस इन गल्लन पुड़ भी मेरी हदैइती सेइं न सुधरथ, ते मेरे खलाफ च़लते राथ, त अवं भी तुश्शे खलाफ च़लेलो, ते तुश्शे पापां केरे वजाई सेइं अवं एप्पु तुसन सत गुणा दुख देइलो। ते अवं तुसन पुड़ अक एरी तलवार च़लेइलो, ज़ै करार ट्लोड़नेरो पूरो-पूरो बदलो नेली; ते ज़ैखन तुस अपने नगरन मां गेइतां अकोट्ठे भोल्हे तैखन अवं तुश्शे दरमियान मरी फैलेइलो, ते तुस अपने दुश्मना केरे कब्ज़े मां सौंफे गाले। ज़ैखन अवं तुश्शे लेई अन्नेरे ज़िरिये दूर केरि छ़डेलो, तैखन दश कौन्शां तुश्शी रोट्टी एक्की तंदूरे मां पकेइतां तोली-तोली बेन्टेली; ते तुस खेइतां भी न रज़्ज़ेले।
“फिरी अगर तुसन इनां गल्लां ज़ोनेरे बाद तुस मेरी गल न मन्नेले, ते मेरे खलाफ च़लते राले, त अवं अपने न्याय मां तुश्शे खलाफ च़लेलो, ते तुश्शे पापां केरे वजाई सेइं तुसन सत गुणा सज़ाह होरि भी देइलो। ते तुसन अपने मट्ठां ते कुइयां केरू मास खानू पेलू। ते अवं तुश्शे मूरती केरि उच्ची ठारन बिछ़ोड़ेलो, ते तुश्शे दिहाड़ेरे मूरतन ट्लोड़ेलो, ते तुश्शी लाशन तुश्शी ट्लोड़ोरी मूरतन पुड़ शारेलो; ते मेरी आत्मा तुसन सेइं नफरत भोइ गाली। ते अवं तुश्शे नगरन उज़ाड़ेलो, ते तुश्शे पवित्र ठारी उज़ाड़ेलो, ते तुश्शी पसंद एजनेबाली खुशबू कबूल न केरेलो। ते अवं तुश्शे मुल्खे बेरान केरेलो, ते तुश्शे दुश्मन ज़ैना तैस मां रहतन तैना इन गल्लां केरे वजाई सेइं हैरान भोल्हे। ते अवं तुसन कौमी-कौमी मां तितर-बितर केरेलो, ते तुसन पत्पती तलवार खिच्चेलो; ते तुश्शो मुल्ख बेरान भोल्हो, ते तुश्शू नगर उज़ड़ेलू।
“तैखन ज़ेत्रे दिहाड़े तै मुल्ख बेरान रालो ते तुस अपने दुशमनां केरे मुल्खे मां राले एत्रे तै अपने आरामेरे कालन मनतो रालो। तैखन तैस मुल्ख आराम मैल्हेलो, मतलब अपने आरामेरे कालन मनतो रालो। ज़ेत्रे दिहाड़े तै बेरान राए एत्रे दिहाड़े आराम मैल्हेलो, मतलब ज़ै आराम तैस तुश्शे तैड़ी बस्सोरो रानेरे वक्ते तुश्शे आरामेरे कालन मां न मैल्होरो भोल्हो तै तैस तैखन मैल्हेलो। ते तुसन मरां ज़ै बच़ोरो रालो ते अपने दुशमनां केरे मुल्खे मां भोल्हो तैसेरे दिले मां अवं डर छ़डेलो; ते तैना पट्लां केरे बज़ने सेइं भी नश्शेले, ते तैना एन्च़रे नश्शेले ज़ेन्च़रे कोई तलवारी करां नश्शते, ते कोन्ची बगैर पीछो केरने सेइं भी तैना झ़ड़ेले। ज़ैखन कोई पीछो केरनेबालो न भोए तैखन भी मन्ना तलवारारे डरे सेइं तैना एक्की होरि सेइं ठोकर खेइतां झ़ड़ते गाले, ते तुसन अपने दुश्मना केरे सामने रानेरी किछ शक्ति न भोल्ही। तैखन तुस कौमी-कौमी मां पुज़तां नाश भोइ गाले, ते तुश्शे दुशमनां केरे लोक तुसन खाएले ते तुसन मरां ज़ैना बच़ेले तैना अपने दुश्मना केरे मुल्खन मां अपने पापां केरे वजाई सेइं खतम भोइ गाले ते अपने सियानां केरे पापेरे कम्मां केरे वजाई सेइं भी तैना, तैना केरे ज़ेरे खतम भोइ गाले।
“पन अगर तैना अपने ते अपने सियानां केरे पापन मन्नेले, मतलब तैस धोखो बैज़ी ज़ै तैनेईं मेरे खलाफ की, ते इन भी मन्नेले, कि अस यहोवारे खलाफ च़लोरे थिये, इस्से वजाई सेइं तैने इश्शे खलाफ भोइतां अस दुशमनां केरे मुल्खे मां आनोरेम। अगर तैस वक्ते तैन केरो बगैर खतने दिले देबोइ गालो ते तैना तैस वक्ते अपने पापां केरे सज़ाहरो इकरार केरेले; तैखन ज़ै करार, मीं याकूबे सेइं कियोरो थियो तैस अवं याद केरेलो ते ज़ै करार मीं इसहाके सेइं ते ज़ै करार मीं अब्राहमे सेइं कियोरोए तैन भी याद केरेलो, ते इस मुल्खे भी अवं याद केरेलो। पन तै मुल्ख तैन करां खाली भोइतां बेरान भोल्हो, ते तैन केरे बगैर बेरान रेइतां भी अपने आरामेरे कालन मनतो रालो; ते तैना लोक अपने पापां केरि सज़ाही मन्नेले, इस्से वजाई सेइं कि तैनेईं मेरे हुक्मां केरि खलाफत कियोरी थी, ते तैन केरि आत्मा मेरी विधन सेइं नफरत केरती थी। एत्रे पुड़ भी ज़ैखन तैना अपने दुश्मना केरे मुल्खे मां भोल्हे, तैखन अवं तैन्न एन्च़रां न छ़डेलो, ते न तैन सेइं एरी नफरत केरेलो कि तैन केरो पूरे तरीके सेइं खातमों केरि छ़ेडी ते अपने तैस करारे ट्लोड़ी ज़ै मीं तैन सेइं कियोरोए; किजोकि अवं तैन केरो परमेशर यहोवा आईं; पन अवं तैन केरि भलैइयरे लेई तैन केरे बुज़ुर्गन सेइं कियोरो करार याद केरेलो, ज़ैना मीं गैर कौमां केरि एछ़्छ़ी केरे सामने मिस्र मुल्खे मरां केढतां आने कि अवं तैन केरो परमेशर ठहरी; अवं यहोवा आईं।”
ज़ैना-ज़ैना विधि ते नियम ते कानून यहोवा अपने पासेरां इस्राएली लोकां केरे लेई सीनै पहाड़े पुड़ मूसा नेबेरे ज़िरिये ठहरावरे थिये तैना इन्ना आन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.