Bhadrawahi Bible
न्यायी 9
अबीमेलेक
एक्सां यरूब्बालेरू मट्ठू अबीमेलेक शेकेम नगरे जो अपने मम्मन कां गेइतां तैन सेइं ते अपने नानेरे सारे घराने सेइं एन ज़ोने लगू, “शेकेम नगरेरे सारे लोकन एन पुछ़ा, ‘तुश्शे लेई कुन रोड़ूए? कुन इन कि यरूब्बालेरां 70 मट्ठां तुसन पुड़ राज़ केरन?’ या इन कि अक्के मैन्हु तुसन पुड़ राज़ केरे? ते इन भी याद रखा कि अवं तुश्शी हड्डी ते मास आईं।” तैखन तैसेरे मम्मेईं शेकेम नगरेरे सारे लोकन सेइं एरी गल्लां ज़ोई; ते तैनेईं एन सोचतां कि अबीमेलेक त इश्शो ढ्लाए ते अपनो मन तैसेरे पासे लव। एक्सां तैनेईं बाल-बरीतेरे मन्दरे मरां लगभग 800 ग्राम चैंदरे सिक्के अबीमेलेके दित्ते, ते तैनी तैन पेंइसन सेइं निकम्मे ते गुण्डे मैन्हु रख्खे, ज़ैना तैस पत्ती च़लते थिये। तैखन तैनी ओप्रा नगरे मां अपने बाजी केरे घरे गेइतां अपने ढ्लान ज़ैना यरूब्बालेरां 70 मट्ठां थियां एक्की बड्डे घोड़े पुड़ मैरी छ़डां; पन यरूब्बालेरू निकड़ू मट्ठू ज़ेसेरू नवं योताम थियूं बेच़ी जेवं किजोकि तैन छ़पोरू थियूं। तैखन शेकेम ते बेतमिल्लो नगरेरे सारे लोकेईं अकोट्ठे भोइतां शेकेमेरे खम्भेरे नेड़े बंज़ेरे बुट्टे कां अबीमेलेक राज़ो बनावं।
इस गल्लरी खबर शुन्तां योताम गिरिज्जीम पहाड़ेरी च़ोटी पुड़ गेइतां खड़ो भोव, ते ज़ोरे-ज़ोरे सेइं ज़ोने लगो, “हे शेकेम नगरेरे रानेबाले लोकव, मेरी गल शुना, ताके परमेशर तुश्शी शुने। एक्सां बुट्टेईं एप्पु पुड़ राज़ केरनेरे लेई अक राज़ो बनानेरो फैसलो कियो; तैखन तैनेईं ज़ैतूनेरे बुट्टे सेइं ज़ोवं, ‘तू इश्शो राज़ो बन।’ पन ज़ैतूनेरे बुट्टे ज़ोवं, ‘कुन अवं अपनो तेल देनो छ़ेडतां, ज़ैस सेइं लोक परमेशर ते मैन्हु दूईयां केरि इज़्ज़त केरतन, बुट्टन पुड़ राज़ केरनेरे लेई इरां-उरां हंठने जो च़ेलि?’ फिरी बुट्टेईं फैगेरे बुट्टे सेइं ज़ोवं, ‘तू एइतां इश्शो राज़ो बन।’ फैगेरे बुट्टे तैन सेइं ज़ोवं, ‘कुन अवं अपने मिट्ठारे ते अपने रोड़े-रोड़े फलन छ़ेडतां बुट्टन पुड़ राज़ केरनेरे लेई इरां-उरां हंठने जो च़ेलि?’ फिरी बुट्टेईं दाछ़रे बड़हे सेइं ज़ोवं, ‘तू एइतां इश्शो राज़ो बन।’ दाछ़रे बड़हे तैन सेइं ज़ोवं, ‘कुन अवं अपनो नंव्वो दाछ़रो रस छ़ेडतां, ज़ैस सेइं परमेशर ते मैन्हु दूईये खुश भोतन, बुट्टन पुड़ राज़ केरनेरे लेई इरां-उरां हंठने जो च़ेलि?’ तैखन सारे बुट्टेईं करेरी सेइं ज़ोवं, ‘तू एइतां असन पुड़ राज़ केर।’ करेरां तैन बुट्टन सेइं ज़ोवं, ‘अगर तुस अपनो राज़ो भोनेरे लेई मेरू अभिषेक सच़्च़ाई सेइं केरतथ, त एइतां मेरी छावी मां शरण नेथ; नईं त, मीं मरां अग निस्सेली ज़ैस सेइं लबानोनेरे गैइड़ भी भस्म भोइ गाले।’
“एल्हेरेलेइ हुनी अगर तुसेईं सच़्च़ाई ते साफ नीती सेइं अबीमेलेक राज़ो बनेवरोए, ते यरूब्बाल ते तैसेरे घराने सेइं भलियाई की, ते तैस सेइं तैसेरे कम्मेरे मुताबिक बर्ताव कियोरो भोए, त रोड़ू। (मेरो बाजी त तुश्शी खातर लड़ो, ते अपनि जान खतरे मां छ़डी ते लड़ाई केरतां तुस मिद्यानी लोकां केरे हथ्थे मरां छुटाए; पन तुसेईं अज़ मेरे बाजी केरे घरानेरे खलाफ उठतां बगावत की, ते तैसेरां 70 मट्ठां एक्की घोड़े पुड़ मारां, ते तैसेरी रखैलरू मट्ठू, अबीमेलेक एल्हेरेलेइ शेकेमे नगरेरे लोकन पुड़ राज़ो बनाव किजोकि तै तुश्शो रिश्तेदारे) एल्हेरेलेइ अगर तुसेईं अज़्ज़ेरे दिहाड़े यरूब्बाल ते तैसेरे घराने सेइं सच़्च़ाई ते साफ नीती सेइं बर्ताव कियोरो भोए, त अबीमेलेकेरे वजाई सेइं खुश भोथ, ते तै भी तुश्शे वजाई सेइं खुश भोए; ते अगर नईं, त अबीमेलेके करां एरी अग निस्से ज़ैस सेइं शेकेमेरे लोक ते बेतमिल्लो फुकोइतां खतम भोइ गान: ते शेकेमेरे मैन्हु ते बेतमिल्लो करां एरी अग निस्से ज़ैस सेइं अबीमेलेक फुकोइतां खतम भोइ गाए।” तैखन योताम नश्शो, ते अपने ढ्ला अबीमेलेके करां डेरतां बेर नगरे जो च़लो जेव ते तैड़ी राने लगो।
अबीमेलेक इस्राएले पुड़ ट्लाई साल हाकिम राव। तैखन परमेशरे अबीमेलेक ते शेकेमेरे प्रधान्न मां अक बुरी आत्मा भेज़ी; एल्हेरेलेइ शेकेमेरे प्रधान अबीमेलेके सेइं धोखेबाज़ी केरने लगे; ज़ैस सेइं यरूब्बालेरां 70 मट्ठन पुड़ कियोरो ज़ुलमेरो फल मैल्ही गाए, ते तैन केरो खून तैन केरे मारनेबाले तैन केरे ढ्ला अबीमेलेकेरे दोग्गे पुड़, ते तैसेरे अपने ढ्लान मारने मां तैसेरी मद्दत केरनेबाले शेकेम नगरेरे प्रधानां केरे दोग्गे पुड़ भी भोए। तैखन शेकेम नगरेरे प्रधानेईं पहाड़ां केरि च़ोटन पुड़ तैसेरे लेई किछ मैन्हु बिशाले, ज़ैना तैस बत्तां सारे एजने गानेबालन लुटते थिये; ते एसेरी खबर अबीमेलेके मैल्ही।
तैखन एबेदेरू मट्ठू गाल अपने ढ्लान सेइं साथी शेकेम नगरे मां अव; ते शेकेमेरे प्रधाने तैस पुड़ भरोसो कियो। ते तैनेईं मैइदाने मां गेइतां अपने-अपने दाछ़रे बागरे फल ट्लोड़े ते तैन ढ्लेन्च़तां तैन केरो रस बनाव, ते तारीफ़रू बलिदान केरतां अपने देबतां केरे मन्दरे मां गेइतां खाने पीने लगे ते अबीमेलेकेरी निन्दा केरने लगे। तैखन एबेदेरे मट्ठे गाले ज़ोवं, “अबीमेलेक कौने? शेकेम कौने कि अस तैसेरे अधीन रहम? कुन तैन यरूब्बालेरू मट्ठू नईं? कुन जबूल तैसेरो सेनानायक नईं? शेकेमेरे बाजी हमोरेरे लोकां केरे त अधीन भोए, पन अस तैसेरे अधीन किजो रहम? ते इना लोक मेरे कैबू मां भोथे त केत्रू रोड़ू भोथू! तैखन त अवं अबीमेलेके दूर केरेथो।” फिरी तैनी अबीमेलेके सेइं ज़ोवं, “अपनि सेनारी गिनती बधेइतां निस्सी एई।”
एबेदेरे मट्ठे गालेरी तैना गल्लां शुन्तां नगरेरे हाकिमे जबूले बड़ी सरक अई। ते तैनी अबीमेलेके कां छ़ेपतां किछ दूतां केरे ज़िरिये ई सन्देश भेज़ो, “एबेदेरू मट्ठू गाल ते तैसेरे किछ लोक शेकेम नगरे मां एइतां लोकन तेरे खलाफ लड़ाई केरने जो भड़काने लगोरेन। एल्हेरेलेइ तू अपने सैथन समेत राती उठतां मैइदाने मां छ़ेपतां बिष। ते होरसां झ़ेझ़ां ज़ेरो दिहाड़ो निस्से त उठतां एस नगरे पुड़ हमलो केरां; ते ज़ैखन तै अपने सैथन समेत तेरो मुकाबलो केरने निस्से तैखन ज़ैन तू केरि सकस तैन्ने तैस सेइं केरनू।”
एल्हेरेलेइ अबीमेलेक ते तैस सेइं साथी सारे लोक राती उठतां च़ेवर जथे बनेइतां शेकेम नगरेरे खलाफ छ़ेपतां बिश्शे। ते एबेदेरू मट्ठू गाल बेइर गेइतां नगरेरे फाटके पुड़ खड़ू भोव; तैखन अबीमेलेक ते तैसेरे साथी छ़ेपोरी ठारी मरां बांदे भोए। तैन लोकन हेरतां गाल जबूले सेइं ज़ोने लगो, “हेर, पहाड़ां केरि च़ोटन पुड़ेरां लोक ओस्तां एवरेन!” जबूले तैस सेइं ज़ोवं, “तै त पहाड़ां केरि छावे ज़ै तीं मैन्हु केरि ज़ेरि लेइहोतीए।” गाले फिरी ज़ोवं, “हेर, लोक मुल्खेरे मझ़मेइं ओसतन, ते अक दल मोननीम नंव्वेरे बंज़ेरे बुट्टेरे बत्तां च़लो एइते।” जबूले तैस सेइं ज़ोवं, “तेरी ई गल कोड़ि राई, कि अबीमेलेक कौने कि अस तैसेरे अधीन रहम? इना त तैना लोकन ज़ैना तीं निकम्मे समझ़ोरे थिये; एल्हेरेलेइ हुनी निस्तां तैन सेइं लड़ाई केर।” तैखन गाल शेकेमेरे प्रधान्न अग्री-अग्री नगरे मरां बेइर निस्सो, तैने अबीमेलेके सेइं लड़ाई की। ते अबीमेलेके तैसेरो पीछो केरतां कढो, ते तै अबीमेलेकेरे सामनेरां नश्शो; ते नगरेरे फाटके तगर पुज़ते-पुज़ते बड़े लोक ज़खमी भोइतां बिछ़ड़ी जे। तैखन अबीमेलेक अरूमा नगरे मां राने लगो: ते जबूले गाल ते तैसेरे ढ्ला कढे, ते शेकेम नगरे मां राने न दित्तो। एग्री दिहाड़े शेकेमेरे लोक अपने उडारन मां कम केरने जे। ई गल अबीमेलेके सेइं ज़ोई जेई। ते तैनी अपनि सेनारे ट्लाई जथे बनेइतां उडारन मां छ़ेपतां बिशाले; ते ज़ैखन हेरू कि लोक नगरे मरां निस्तां एवरेन तैखन तैन सेइं लड़ाई केरतां तैना मारे। अबीमेलेक अपने सैथी केरे टोलन सने अग्रोवं दौड़तां नगरेरे फाटके पुड़ खड़ो भोव, ते दूई दलेई तैन सब लोकन पुड़ हमलो केरतां ज़ैना लोक उडारन मां थिये तैना मैरी छ़डे। तैस्से दिहाड़े अबीमेलेके नगरे सेइं पूरे दिहैड़ी लेड़तां तैन अपने कब्ज़े मां कियूं, ते तैसेरे लोकन मैरतां नगर बिछ़ोड़ी छ़डू, ते तैस पुड़ लून छ़िड़कावं।
एन शुन्तां शेकेमेरे गुम्मटेरे सारे रानेबाले एलबीरीतेरे1 मन्दरेरे क़िले मां जे। ज़ैखन अबीमेलेके ई खबर मैल्ही कि शेकेमेरे गुम्मटेरे सारे प्रधान लोक अकोट्ठे भेवरेन, तैखन तै अपने सारे सैथन सने सल्मोन नंव्वेरे पहाड़े पुड़ च़ढ़ो; ते हथ्थे मां मैक्कु नेइतां बुट्टन मरां अक डालड़ी कट्टी, ते तै छ़ुइतां अपने कंधे पुड़ रख्खी। ते अपने सैथन सेइं ज़ोवं, “ज़ेरो तुसेईं अवं केरतो लाव तेन्च़रे तुस भी लूश केरा।” तैखन तैन सारे लोकेईं भी अक-अक डालड़ी कट्टी, ते अबीमेलेके पत्ती च़ले ते तैन केरे क़िले पुड़ छ़ेडतां तैस अग लाई; तैखन शेकेमेरे गुम्मटेरे सैरी कौन्शां ते मड़द ज़ैना सारे लगभग 1000 थिये मेरि जे।
तैखन अबीमेलेके तेबेस नगरे मां गेइतां तैसेरे सामने डेरे खड़े किये ते तैस पुड़ कब्ज़ो कियो। पन तैस नगरेरे मझ़ाटे अक मज़बूत गुम्मट थियो, एल्हेरेलेइ कुन कौन्शां कुन मड़द, नगरेरे सारे लोक नेशतां तैस मां जे; ते तैस बन्द केरतां गुम्मटेरी छती पुड़ च़ेढ़ी जे। तैखन अबीमेलेक गुम्मटेरे नेड़े गेइतां तैसेरे खलाफ लड़ने लगो, ते गुम्मटेरे दारे तगर जेव कि तैस मां अग लाए। तैखन कोन्ची कौन्शां ढ्लाटेरो बेइयोवं ढ्लेइटोल अबीमेलेकेरे दोग्गे पुड़ बिछ़ोड़ो, ते तैसेरो दोग भेनोई जेव। तैखन तैनी लूशी अपने हथियार छ़ूनेबाले जुवाने कुजेइतां ज़ोवं, “अपनि तलवार केढतां मीं मैरी छ़ड, एरू न भोए कि लोक मेरे बारे मां ज़ोन कि, ‘तै त एक्की कौन्शां मारोरोए।’” तैखन तैसेरे जुवाने तलवार डोबी, ते तै मेरि जेव। एन हेरतां कि अबीमेलेक मेरि जेवरोए इस्राएली लोक अपने-अपने ठारी जो च़ले जे। एन्च़रां सेइं ज़ैन बुरू कम अबीमेलेके अपने 70 ढ्ला मैरतां अपने बाजी सेइं कियूं, तैसेरी सज़ाह परमेशरे तैसेरे दोग्गे पुड़ वापस आनी; ते शेकेमेरे मड़दां केरे भी सारे दुष्ट कम्मां केरि सज़ाह परमेशरे तैन केरे दोग्गे पुड़ वापस आनी, ते यरूब्बालेरू मट्ठू योतामेरी लानत तैन लग्गी।
Source notes (1)
- Footnote एलबीरीतेरे करारेरो देबतो
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.