Bhadrawahi Bible
न्यायी 6
गिदोन
इस्राएली लोकेईं फिरी यहोवारी नज़री मां बुरू कियूं, एल्हेरेलेइ यहोवाए तैना मिद्यानी लोकां केरे कैबू मां सत सालन तगर रख्खे। ते मिद्यानी लोक इस्राएली लोकन पुड़ ताकतबर भोइ जे। मिद्यानी लोकां केरे डरे सेइं इस्राएली लोक पहाड़ां केरे डुग्घे गत्तन, ते कुढन मां, ते क़िलन मां राने लगे। ते ज़ैखन-ज़ैखन इस्राएली लोक बीज़ बेते थिये तैखन-तैखन मिद्यानी ते अमालेकी ते पूर्वी लोक तैन पुड़ हमलो केरतां, गाज़ा नगरे तगर डेरे लेई-लेई ज़मीनरी फसल तबाह केरते थिये, ते इस्राएली लोकां केरे लेई न त किछ खानेरी चीज़ां, ते न गब्बां, ते न गोरू, ते न गधे छ़डते थिये। किजोकि तैना अपने जानबरन ते डेरे लेइतां लड़ाई केरते, ते टिट्टां केरे ज़ेरे बड़े जादे एइते थिये; ते तैन केरे ऊँट भी बेशुमार भोते थिये; ते तैना मुल्खे उज़ाड़नेरे लेई तैस मां एइते थिये। ते मिद्यानी लोकां केरे वजाई सेइं इस्राएली लोक बड़े बुरे हालती मां पेई जे; तैखन इस्राएली लोकेईं यहोवा कां बिनती की।
ज़ैखन इस्राएली लोकेईं मिद्यानी लोकां केरे वजाई सेइं यहोवा कां बिनती की, तैखन यहोवाए इस्राएली लोकन कां अक नबी भेज़ो, ज़ैनी तैन सेइं ज़ोवं, “इस्राएलेरो परमेशर यहोवा इन ज़ोते: ‘मीं तुस मिस्र मुल्खे मरां आने, ते गुलैमरे घरेरां केढतां आने; ते मीं तुस मिस्री लोकां केरे हथ्थे मरां, बल्के ज़ेत्रे तुसन पुड़ ज़ुलम केरते थिये तैन सेभी केरे हथ्थे मरां छुटाए, ते तैना तुश्शे सामनेरां ज़बरदस्ती केढतां तैन केरो मुल्ख तुसन दित्तो।’ ते मीं तुसन सेइं ज़ोवं, ‘अवं तुश्शो परमेशर यहोवा आईं; एमोरी लोक ज़ैन केरे मुल्खे मां तुस रहतथ तैन केरे देबतां केरो डर न मेन्नथ।’ पन तुसेईं मेरू ज़ोनू न मन्नू।”
फिरी एक्सां यहोवारे दूत एइतां तैस बंज़ेरे बुट्टे हैठ बिश्शी जेव, ज़ै ओप्रा नगरे मां अबीएजेरी योआशेरो थियो, ते योआशेरू मट्ठू गिदोन एक्की दाछ़रे कुण्डे मां गेहुं एल्हेरेलेइ मडने लगोरू थियूं कि तैन मिद्यानी लोकन करां छ़ुपेइतां रख्खे। यहोवारे दूते तैस दर्शन देइतां ज़ोवं, “हे बहादर सूरमा यहोवा तीं साथीए।” गिदोने तैस सेइं ज़ोवं, “हे मेरे मालिक, मेरी बिनती शुन, अगर यहोवा असन सेइं साथी भोथो, त असन पुड़ इना सैरी मुसीबतां किजो पेथी? ते ज़ेत्रे बड्डे-बड्डे कम्मां केरू बियान इश्शे दादे-पड़दादे एन ज़ोइतां केरते थिये, ‘कुन यहोवा अस मिस्र मुल्खे मरां छुटेइतां नईं आनोरे,’ तैना कोड़ि राए? हुनी त यहोवा अस शारे, ते मिद्यानी लोकां केरे हथ्थे कियोरेम।” तैखन यहोवाए तैसेरे पासे तेकतां ज़ोवं, “अपने इस शेक्ति सेइं गा ते तू इस्राएली लोकन मिद्यानी लोकां केरे हथ्थे मरां छुटालो; अवं तीं भेज़ने लगोरोईं।” तैखन गिदोने ज़ोवं, “हे मेरे प्रभु, मेरी बिनती शुन, अवं इस्राएले केन्च़रे छुटेईं? हेर, मेरू कुल मनश्शे मां सेभन करां गरीबे, फिरी अवं अपने बाजी केरे घराने मां सेभन करां निकड़ो आईं।” यहोवा तैस सेइं ज़ोवं, “पक्को अवं तीं साथी रालो; ते तू मिद्यानी लोकन एन्च़रे मारेलो ज़ेन्च़रे एक्की मैन्हु।” गिदोने तैस सेइं ज़ोवं, “अगर तेरो अनुग्रह मीं पुड़ भोए, त मीं इसेरो कोई निशान हिरा कि तूए मीं सेइं गल्लां केरि राहोरोस। ज़ैखन तगर अवं तीं कां फिरी एइतां अपनि च़ढ़तल केढतां तेरे सामने न रेखी, तांतगर तू इट्ठां न गेइयां।” यहोवा ज़ोवं, “अवं तेरे वापस एजने तगर बलगतो रालो।”
तैखन गिदोने गेइतां अक छ़ेड़ू ते 10 किल्लो अट्टेरी अखमीरी रोट्टी तियार की; तैखन मास बनेइतां टोकरी मां, ते तरी भांडे मां रेखतां बंज़ेरे बुट्टे हैठ तैस कां गेइतां दित्ती। परमेशरेरे दूते तैस सेइं ज़ोवं, “मास ते अखमीरी रोट्टी नेइतां इस पहाड़े पुड़ रख, ते तरी उलटा।” तैनी एन्च़रे कियूं। तैखन यहोवारे दूते अपने हथ्थेरी सोटी अग्रोवं केरतां मास ते अखमीरी रोट्टन सेइं हुरो; ते चट्टानी मरां अग निस्सी ज़ैस सेइं मास ते अखमीरी रोट्टी फुकोइतां भस्म भोइ जेई; फिरी तैसेरां बाद यहोवारो दूत गिदोने न लेइहोव। ज़ैखन गिदोने एन हेरू कि तै यहोवारो दूत थियो, तैखन गिदोन ज़ोने लगो, “हाय, प्रभु यहोवा! मीं त यहोवारो दूत आमने-सामने लाहोरोए।” पन यहोवा तैस सेइं ज़ोवं, “तीं शान्ति मैल्हे; डर न, तू न मरेलो।” तैखन गिदोने तैड़ी यहोवारे लेई अक वेदी बनेइतां तैसेरू नवं, “यहोवा शालोम1 रख्खू।” तै अज़्ज़ेरे दिहाड़े तगर अबीएजेरी लोकां केरे ओप्रा नगरे मां बनोरीए।
फिरी तैस्से राती यहोवाए गिदोने सेइं ज़ोवं, “अपने बाजी केरो निग्गर दांत, मतलब होरो सत सालां केरो दांत ने, ते बालेरी ज़ै वेदी तेरे बाजी केरीए तैस बिछ़ोड़ी छ़ड, ते ज़ै अशेरा देबरो खम्भो तैस कां आए तैस केट्टी छ़ड; ते तैस मज़बूत ठारारी च़ोटी पुड़ रखोरे रीति सेइं अपने परमेशर यहोवारी अक वेदी बना; तैखन तै होरो दांत ने, ते तै अशेरा देबरी लकड़ी ज़ै तू केट्टी छ़डेलो तैस फुकतां होमबलि च़ाढ़।” तैखन गिदोने एप्पु सेइं साथी दश नौकर नेइतां यहोवारे वचनेरे मुताबिक कियूं; पन अपने बाजेरे घराने ते नगरेरे लोकां केरे डरे सेइं तैन कम दीसां न केरि सको, एल्हेरेलेइ राती कियूं।
होरसां झ़ेझ़ां नगरेरे लोकेईं उठतां हेरू, कि बालेरी वेदी बिछ़ड़ोरीए, ते तैसेरे नेड़े अशेरा कट्टोरी पेवरीए, ते होरो दांत बनेवरी नेव्वीं वेदी पुड़ च़ाढ़ोरोए। तैखन तैना लोक एप्पु मांमेइं ज़ोने लगे, “एन कम केनि कियूं?” ते पुछ़ गन केरतां ते तोपतां तैना ज़ोने लगे, “योआशेरे मट्ठे गिदोने एन कम कियोरूए।” तैखन नगरेरे मैन्हेइं योआशे सेइं ज़ोवं, “अपने मट्ठे बेइर आन, कि तैन मारू गाए, किजोकि तैनी बालेरी वेदी बिछ़ोड़ोरीए, ते तैसेरे नेड़े अशेरा भी केट्टी छ़डोरीए।” पन योआशे तैन सेभन सेइं ज़ोवं, ज़ैना तैसेरे सामने खड़े भोवरे थिये, “कुन तुस बालेरे लेई बेंस केरेले? कुन तुस तैस बच़ाले? ज़ै कोई तैसेरे लेई बेंस केरे तै मारो गालो। झ़ेझ़ां तगर बिश्शोरे राथ; तांतगर अगर तै परमेशर भोए, त ज़ैनी तैसेरी वेदी बिछ़ोड़ोरीए तैस सेइं तै एप्पु बेंस केरे।” एल्हेरेलेइ तैस दिहाड़े गिदोनेरू नवं एन ज़ोइतां यरूब्बाल रख्खू जेवं, कि एनी ज़ै बालेरी वेदी बिछ़ोड़ोरीए त एस पुड़ बाल एप्पु अपनो बचाव केरे।
एसेरे बाद सारे मिद्यानी ते अमालेकी ते पूर्वी लोक अकोट्ठे भोए, ते यरदन दरिया पार एइतां यिज्रेलेरी वैदी मां डेरे लाए। तैखन यहोवारो आत्मा गिदोने पुड़ अव; ते तैनी नरशिंगो बज़ाव, तैखन अबीएजेरी लोक तैसेरी शुन्नेरे लेई अकोट्ठे भोए। फिरी तैनी सारे मनश्शे कां अपने दूत भेज़े; ते तैना भी तैसेरे नेड़े अकोट्ठे भोए। ते तैनी आशेर, जबूलून, ते नप्ताली लोकन कां भी दूत भेज़े; तैखन तैना भी तैस सेइं मिलने जो च़ले आए।
तैखन गिदोने परमेशरे कां प्राथना की, “अगर तू अपने वाधेरे मुताबिक इस्राएले मेरे ज़िरिये छुटालो, त शुन, अवं एक्की भैड्डरी उन्ना खलाड़ी मां रखेलो, ते अगर ओश सिर्फ तैस उन्नी पुड़ पे, ते तैस छ़ेडतां सारी ज़मीन शुकोरी रेही गाए, त अवं बुझ़ेलो कि तू अपने वाधेरे मुताबिक इस्राएले मेरे ज़िरिये छुटालो।” ते एन्च़रे भोवं। एल्हेरेलेइ ज़ैखन गिदोने झ़ेझ़ां उठतां तैस उन्नी मरां दबेइतां तैस मरां ओश निच़ोड़ी, तैखन अक कुटोरो भेरोई जेवं। फिरी गिदोने परमेशरे कां फिरी प्राथना की, “अगर अवं एक्की बार फिरी ज़ोईं, त तेरी सरक मीं पुड़ न भड़के; अवं एस उन्नी सेइं एक्की बार हेजू तेरी अज़मैइश केरीं, मतलब सिर्फ उन्ने शुकोरी राए, ते सैरी ज़मीनी पुड़ ओश पे” तैस राती परमेशरे एन्च़रे कियूं; मतलब सिर्फ उन्ना शुकोरी रेही जेई, ते सैरी ज़मीनी पुड़ ओश पेई।
Source notes (1)
- Footnote यहोवा शालोम मतलब यहोवा शान्ति देनेबालो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.