Bhadrawahi Bible
न्यायी 3
गैर कौमां केरू कनान मुल्खे मां रानू
इस्राएली लोकन मरां ज़ेत्रे लोक कनानेरी लड़ैइन मां शामल न थिये भोवरे, तैन्न परखनेरे लेई यहोवाए एना कौमां मुल्खे मां एल्हेरेलेइ राने दित्ती, कि पीढ़ी-पीढ़ी केरे इस्राएली लोकन मरां ज़ैना पेइले लड़नू न थिये ज़ानते तैना शिखन, ते ज़ानन, ज़ैना लोक तैड़ी राए तैना इना आन, पंच़े राज़न समेत पलिश्ती लोक, ते सारे कनानी लोक, ते सीदोनी लोक, ते बालहेर्मोन नंव्वेरे पहाड़े करां लेइतां हमातेरी वैदी तगर लबानोन पहाड़े मां रानेबाले हिब्बी लोक। इना एल्हेरेलेइ रेही सखे कि एन केरे ज़िरिये इस्राएली लोकां केरि गल्लन मां अज़मैइश भोए, कि ज़ैना हुक्म यहोवा मूसेरे ज़िरिये तैन केरे दादे-पड़दादन दित्तोरे थिये, तैन्न तैना मन्नेले या नईं। एल्हेरेलेइ इस्राएली लोक कनानी, हित्ती, एमोरी, परिज्जी, हिब्बी, ते यबूसी लोकन मां बेस्सी जे; तैखन इस्राएली लोकेईं तैन केरि कुइयां केरो ड्लाह अपने मट्ठन सेइं बनाने लगे, ते अपनि कुइयां केरो ड्लाह तैन केरे मट्ठन सेइं बनाने लगे; ते एन्च़रे सेइं तैन केरे देबतां केरि भी पूज़ा केरने लगे।
ओत्नीएल इस्राएली लोकां केरो पेइलो न्यायी
एन्च़रां सेइं इस्राएली लोकेईं यहोवारी नज़री मां बुरू कियूं, ते अपने परमेशर यहोवा बिसरतां बाल नंव्वेरे देबतां ते अशेरा नंव्वेरे देबरी मूरती केरि पूज़ा केरने लगे।1 तैखन यहोवारी सरक इस्राएली लोकन पुड़ भड़की, ते तैनी तैना अरम्नहरैमेरे2 राज़े कूशन रिश्आतइमेरे हवाले किये; ते इस्राएली अठ सालन तगर कूशन रिश्आतइमेरे अधीन राए। तैखन इस्राएली लोकेईं यहोवा कां बिनती की, ते तैनी इस्राएली लोकां केरे छुटकारेरे लेई कालेबेरे निकड़े ढ्लाए कनजी एरू मट्ठू ओत्नीएल ठहरावं, ते तैनी तैना छुटाए। यहोवारो आत्मा ओत्नीएले पुड़ अव, ते तै इस्राएली लोकां केरो न्यायी बेनि जेव, ते लड़ाई केरने जो निस्सो, ते यहोवा अरामेरो राज़े कूशन रिश्आतइम तैसेरे हथ्थे मां कियो; ते तैने कूशन रिश्आतइमे पुड़ ज़ींत हासिल की। तैखन इस्राएली लोक 40 सालन तगर सुखे सेइं राए। तैखन कनजी नंव्वेरे मैन्हेरू मट्ठू ओत्नीएल मेरि जेवं।
एहूद
इस्राएली लोकेईं फिरी यहोवारी नज़री मां बुरू कियूं; ते यहोवा मोआबेरो राज़ो एग्लोन इस्राएले पुड़ शक्तिशाली कियो, किजोकि तैनेईं यहोवारी नज़री मां बुरू कियोरू थियूं। एल्हेरेलेइ अग्लोने अम्मोनी ते अमालेकी लोक एप्पु कां अकोट्ठे किये, ते गेइतां इस्राएली लोक मारे; ते खजूरे बाले नगरे पुड़ कब्ज़ो कियो। तैखन इस्राएली लोक 18 सालन तगर मोआबेरे राज़े एग्लोनेरे अधीन राए।
फिरी इस्राएली लोकेईं यहोवा कां बिनती की, ते तैनी बिन्यामीन गोट्ले मरां गेरारू मट्ठू एहूद तैन केरो छुटानेबालो बनाव। तै बांए हथ्थे सेइं कम केरतो थियो। इस्राएली लोकेईं तैस्सेरे हथ्थे मोआबेरे राज़े एग्लोने कां किछ चीज़ सुखसांध भेज़ी। एहूदे अक हथ लम्मी दोधारी तलवार बनेवरी थी, ते तै तैनी अपने लिगड़न हैठ देइने ज़ंघी पुड़ टंगी। तैखन तैन सुखसांध तैनी मोआबेरे राज़े एग्लोने कां निव ज़ै बड़ो मोट्टो मैन्हु थियो। ज़ैखन एहूदे सुखसांध दित्तू, तैखन सुखसांध आन्ने बालो वापस भेज़ो। पन तै एप्पु गिलगालेरे नेड़े घड़ाई कियोरी मूरतन कां वापस जेव, ते एग्लोने कां बिस्तार भेज़ो, “हे राज़ा, मीं तीं सेइं अक भेदेरी गल ज़ोनीए।” तैखन राज़े लोकन हुक्म दित्तो, “थोड़े च़िरेरे लेई बेइर गाथ।” तैखन ज़ेत्रे लोक तैस कां हाज़र थिये तैना सारे बेइर च़ले जे। तैखन एहूद तैस कां जेव; तै त अपने एक्की हवाई बाले कमरे मां अकैल्लो बिशोरो थियो। एहूदे ज़ोवं, “परमेशरेरी तरफां मीं अक गल तीं सेइं ज़ोनीए।” तैखन राज़ो अपने तखते पुड़ेरां खड़ो भोवं। एत्रे मां एहूदे अपनो बांओ हथ अग्रोवं केरतां अपनि देइनी ज़ंघी पुड़ेरां तलवार खिचतां तैसेरे पेटे मां बाई; ते पूरी तलवार डेन्डी समेत पेटे मां डुबी जेई, ते तलवारारो तिख्खो पासो चेर्भी मां डुबोरो राव, किजोकि तैनी तलवार तैसेरे पेटे मरां न कढी; बल्के तै तैसेरे वार पार निस्सी जेई। तैखन एहूद कमरे मरां बेइर निस्तां च़लो जेव, ते कमरेरां दारां बन्द केरतां जंदरो दित्तो।
एहूदेरे च़ले गानेरां बाद राज़ेरे सेवक आए, ते कुन हेरतन, कि कमरेरे दारे पुड़ जंदरो लगोरोए। एस वजाई सेइं तैना ज़ोने लगे, “पक्को राज़ो हवाई बाले कमरे मां आराम केरतो भोनोए।” ज़ैखन तैना तैस बलगते-बलगते थेकी जे; तैखन तैना एन हेरतां कि तै कमरेरू दार न खोल्ले, तैनेईं चाबी नेइतां दार खोल्लू ते कुन हेरू, कि तैन केरे मालिकेरी लाश तल्ले मां पेवरीए।
ज़ांतगर तैना सोच विचार केरि राहोरे थिये तांतगर एहूद नेश्शी जेव, ते घड़ाई कियोरी मूरती केरे पैरीं पासे भोइतां सेइरे नगरे जो च़लो जेव। तैड़ी पुज़तां तैनी एप्रैमेरे पहाड़ी मुल्खे मां नरशिंगो बज़ाव; तैखन इस्राएली लोक तैस सेइं साथी पहाड़ी मुल्खेरां तैस पत्ती-पत्ती बुन जे। ते तैनी तैन सेइं ज़ोवं, “मीं पत्ती-पत्ती च़ला; किजोकि यहोवाए तुश्शे मोआबी दुश्मन तुश्शे कब्ज़े मां कियोरेन।” तैखन तैनेईं तैस पत्ती-पत्ती गेइतां यरदन दरियारे घाटन पुड़ ज़ै मोआब मुल्खेरे बन्नेरो हिस्सोए कब्ज़ो कियो, ते कोई भी मोआबी ओसने न दित्तो। तैस मौके एहूद ते तैसेरी सेना लगभग 10000 मोआबी लोक मैरी छ़डे; तैना सारे बहादर ते ताकतबर थिये, पन तैन मरां अक भी न बंच़ो। एन्च़रां सेइं तैस मौके मोआबी लोक इस्राएली लोकां केरे कब्ज़े मां भोए। तैखन 80 सालन तगर मुल्खे मां शान्ति बनोरी राई। तैसेरां पत्ती अनातेरू मट्ठू शमगर भोवं, तैनी 600 पलिश्ती मैन्हु दांतेरे तिखे लट्ठी सेइं मारे; एस वजाई सेइं तै भी इस्राएली लोकां केरो छुटानेबालो भोव।
Source notes (2)
- Cross-reference व्यव. 6:12;8:11,14,19.
- Footnote अरम्नहरैमेरे मेसोपोटामिया
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.