Bhadrawahi Bible
न्यायी 1
इस्राएली लोकां केरि कनानी लोकन पुड़ ज़ींत
यहोशूएरे मरनेरे पत्ती इस्राएली लोकेईं इस बारे मां पतो केरनेरे लेई यहोवा कां प्राथना की, “कि कनानी लोकां केरे खलाफ लड़नेरे लेई इश्शे 12 गोट्लां केरे तरफां पेइलो कौन कुल हमलो केरेलो?” यहोवाए जुवाब दित्तो, “यहूदा गोट्लेरे लोक हमलो केरन; किजोकि मीं ई कनान मुल्ख तैन केरे हथ्थे मां कियोरोए।” तैखन यहूदा गोट्लेरे लोकेईं अपने ढ्ला शिमोनेरे गोट्लेरे लोकन सेइं ज़ोवं, “असन सेइं साथी इश्शे ज़मीनरे हिस्से मां एज्जा, कि अस कनानी लोकन सेइं लड़म; ते अस भी तुश्शे ज़मीनरे हिस्से मां गामेले।” एल्हेरेलेइ शिमोन गोट्लेरे लोक तैन सेइं साथी च़ले जे। ते यहूदा गोट्लेरे लोक लड़ाई केरनेरे लेई जे, ते यहोवाए कनानी ते परिज्जी लोक तैन केरे कब्ज़े मां किये; तैखन तैनेईं बेजेक नगरे मां तैन मरां 10000 सिपाही मारे। ते बेजेक नगरे मां तैन अदोनीबेजेक प्रधान मैल्हो ते तैना तैस सेइं लड़े, ते तैनेईं कनानी ते परिज्जी लोक हाराए। पन अदोनीबेजेक नश्शो; पन यहूदारे गोट्लेरे लोकेईं तैसेरो पीछो केरतां तै ट्लाव, ते तैसेरे हथ पव्वां केरे नोठ1 केट्टी छ़डे। तैखन अदोनीबेजेक प्रधाने ज़ोवं, “सत्तर राज़े ज़ैन केरे हथ पव्वां केरे नोठ कट्टोरे थिये तैना मेरे मेज़े हैठ टुक्ड़े च़ुनतां पेट भरते थिये; ज़ेरू मीं कियोरू थियूं, तेरहो बदलो परमेशरे मीं दित्तोरोए।” तैखन यहूदा गोट्लेरे सिपैहेईं तै यरूशलेम नगरे जो नियो ते तैड़ी तै मेरि जेव। यहूदा गोट्लेरे लोकेईं यरूशलेम नगरे पुड़ हमलो कियो ते तैस पुड़ कब्ज़ो भी कियो, ते तलवारी सेइं तैसेरे रानेबाले मैरी छ़डे, ते तैन नगर फुक्की छ़डू। ते तैखन यहूदा गोट्लेरे लोक पहाड़ी इलाके ते नगेब इलाके, ते तैसेरे बुनीयें इलाके मां रानेबाले कनानी लोकन सेइं लड़ने जो जे। ते यहूदा गोट्लेरे लोक हेब्रोन नगरे मां रानेबाले कनानी लोकां केरे खलाफ लड़ाई केरनेरे लेई जे। (पेइलू हेब्रोन नगरेरू नवं किर्यतअर्बा थियूं) ते तैनेईं शेशै, अहीमन, ते तल्मै सेनापति हाराए। तैट्ठां गेइतां यहूदा गोट्लेरे लोकेईं दबीर नगरेरे रानेबाले लोकां केरे खलाफ लड़ाई की। पेइलू दबीरेरू नवं किर्यत्सेपेर थियूं।
ओत्नीएलेरे ज़िरिये दबीर नगरे पुड़ ज़ींत
किर्यत्सेपेर नगरे पुड़ हमलो केरने करां पेइले यहूदा गोट्ले मरां कालेबे ज़ोवं, “ज़ै किर्यत्सेपेर नगरे लड़ाई केरतां ज़ींते तैस जो अवं अपनि कुई अकसा ड्लेइतां देइलो।” ई गल शुन्तां कालेबेरे निकड़े ढ्लाए कनजी एरे मट्ठे ओत्नीएले तैन नगर ज़ींतू; ते कालेबे अपनि कुई अकसा तैस जो ड्लाही। ते ज़ैखन अकसा ओत्नीएले कां अई, तैखन तैनी तैस सेइं ज़ोवं कि अपने बाजी करां किछ ज़मीन मग।2 ज़ेरि अकसा अपने बाजी कां पुज़्ज़ी तै अपने गधे पुड़ेरां ओस्सी, त कालेबे तैस पुछ़ू, “तीं कुन लोड़ते?” तैसां अपने बाजी जुवाब दित्तो, “मीं किछ होरि ज़मीन दे; तीं मीं दक्षिण इलाको त दित्तोरोए, पन मीं पैनेरे नाग भी दे।” एन्च़रां सेइं कालेबे तैस जो बेइयें ते बुनीयें दूईये पैनेरे नाग दित्ते। मूसेरो शेहरो अक केनी कौमरो मैन्हु थियो। ज़ेसेरे खानदानेरे लोक यहूदा गोट्लेरे लोकन सेइं साथी खजूरेरे बुट्टां केरे नगरे3 मरां जे। तैन अराद नगरेरे दक्षिणे मां यहूदारे सुनसान ठैरी मां आए ते तैट्ठेरे लोकन सेइं साथी राने लगे। फिरी यहूदा गोट्लेरे लोकेईं अपने ढ्लाए शिमोनेरे गोट्लेरे लोकन सेइं साथी गेइतां सपत नगरे मां रानेबाले कनानी लोक मारे, ते तैस नगरेरो सत्यानाश केरतां छ़डो। एल्हेरेलेइ तैस नगरेरू नवं होर्मा4 पेई जेवं। ते यहूदा गोट्लेरे लोकेईं च़ेवरे पासेरी ज़मीनी समेत गाज़ा, अश्कलोन, ते एक्रोन नगरन पुड़ कब्ज़ो भी कियो। यहोवा यहूदारे लोकन सेइं साथी राव, एल्हेरेलेइ तैनेईं पहाड़ी इलाकेरे रानेबाले कढे; पन वैदी मां रानेबालन न केढी सखे, किजोकि तैन कां लोंहेरे रथ थिये। ते तैनेईं मूसेरे ज़ोनेरे मुताबिक हेब्रोन नगर कालेबे जो दित्तू: ते तैनी तैट्ठां अनाकेरां ट्लाईए मट्ठां केढी छ़डां। ते यरूशलेम नगरे मां रानेबाले यबूसी लोक बिन्यामीनी लोकेईं न कढे; एल्हेरेलेइ यबूसी अज़्ज़ेरे दिहाड़े तगर यरूशलेम नगरे मां बिन्यामीनी लोकन सेइं साथी रहतन। फिरी यूसुफेरे गोट्लेरे लोकेईं बेतेल नगरे पुड़ हमलो कियो; ते यहोवा तैन सेइं साथी थियो। ते यूसुफेरे गोट्लेरे लोकेईं बेतेल नगरेरो भेद कढनेरे लेई जासूस भेज़े। ते पेइलू तैस नगरेरू नवं लूज थियूं। ते जासूसेईं अक मैन्हु तैस नगरे मरां निस्तो लाव, ते तैस पुछ़, “नगरे मां गानेरी खुफिया बत असन हिरा, ते अस तीं पुड़ दया केरमेले।” ज़ैखन तैनी तैन्न तैस नगरे मां गानेरी खुफिया बत हिराई, तैखन तैनेईं नगरेरे सारे लोक तलवारी सेइं मारे, पन तै मैन्हु तैसेरे सारे टब्बरे समेत बगैर नुकसाने छ़ेडी दित्तो। तैनी मैन्हे हित्ती लोकां केरे मुल्खे मां गेइतां अक नगर बसाव, ते तैसेरू नवं लूज रख्खू; ते अज़ तगर तैसेरू नवं तैन्ने आहे। मनश्शे गोट्लेरे लोकेईं अपने-अपने ड्लाव्वन समेत बेतशान, तानाक, दोर, यिबलाम, ते मगिद्दो नगरां केरे रानेबाले न कढे; एन्च़रां सेइं कनानी लोक तैस मुल्खे मां बस्सोरे राए। पन ज़ैखन इस्राएली लोक शक्तिशाली भोए, तैखन तैनेईं कनानी लोक गुलामां केरू ज़ेरू कम करानेरे लेई मजबूर किये, पन तैना पूरे तरीके सेइं न कढे।
तेन्च़रे एप्रैम गोट्लेरे लोकेईं गेजेर नगरे मां रानेबाले कनानी लोक न कढे; एल्हेरेलेइ कनानी लोक गेजेर नगरे मां तैन केरे दरमियाने मां बस्सोरे राए।
जबूलून गोट्लेरे लोकेईं कित्रोन ते नहलोल नगरां केरे रानेबाले लोक न कढे; एल्हेरेलेइ कनानी लोक तैन केरे दरमियाने मां बस्सोरे राए, ते तैन केरे गुलाम भोइ जे।
आशेर गोट्लेरे लोकेईं अक्को, सीदोन, अहलाब, अकजीब, हेलबा, अपीक ते रहोब नगरां केरे रानेबाले न थिये कढोरे;
एल्हेरेलेइ आशेरी लोक तैस मुल्खेरे रानेबाले कनानी लोकन मां बेस्सी जे; किजोकि तैनेईं तैना न थिये कढोरे।
नप्ताली गोट्लेरे लोकेईं बेतशेमेश ते बेतनात नगरां केरे रानेबाले न कढे, पन तैस मुल्खेरे रानेबाले कनानी लोकन मां बेस्सी जे; फिरी भी बेतशेमेश ते बेतनात नगरां केरे लोक तैन केरे गुलाम भोइ जे।
एमोरी लोकेईं दानी लोक पहाड़ी मुल्खे मांजो निशाने, ते वैदी मां एजने न दित्ते; एल्हेरेलेइ एमोरी लोक हेरेस नंव्वेरे पहाड़ेरे, अय्यालोन ते शाल्बीम नगरन मां बस्सोरे राए, फिरी भी यूसुफेरे गोट्लेरे लोक एत्रे ताकतबर भोए कि एमोरी लोक तैन केरे गुलाम भोइ जे। ते एमोरी लोकां केरि मुल्खेरी हद अक्रब्बीम नंव्वेरे पहाड़ेरी चड़ैई करां लेइतां बेइयें पासे थी।
Source notes (4)
- Footnote हथ पव्वां केरे नोठ हथ पव्वां केरे नोठ कटनेरो मतलबे कि सारे सेनारी बेइज़्ज़ती केरनी ते लंगड़े बनाने।
- Footnote किछ ज़मीन मग। इन भी भोइ सकते कि ओत्नीएले ज़मीन मग्गी।
- Footnote नगरे यरीहो नगरे जो खजूरां केरू नगर भी ज़ोतन।
- Footnote होर्मा मतलब पूरे तरीके सेइं तबाह केरनू।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.