Bhadrawahi Bible
योना 3
योना परमेशरेरो हुक्म मन्ते
तैखन यहोवा दूइयोवं फेरे योना सेइं ज़ोवं, “उठतां तैस बड़े नगर नीनवे जो गा, ते ज़ै गल अवं तीं सेइं ज़ोलो, तैसेरो तैस मां प्रचार केरां।” तैखन योना यहोवारे ज़ोनेरे मुताबिक नीनवे जो जेव। नीनवे अक बड़ू बड्डू नगर थियूं, तैस मां घुमनेरे लेई ट्लाई दिहाड़े लगते थिये। ते योना नगरे मां गेइतां एक्की दिहैड़रू सफर1 पूरू कियूं, ते ई प्रचार केरतो जेव, “अज़ करां 40 दिहाड़े बीतनेरां बाद नीनवे नगर नाश कियूं गालू।” तैखन नीनवेरे लोकेईं परमेशरेरे वचने पुड़ विश्वास कियो; तैनेईं बरत रखनेरे लेई एलान कियूं, ते दुख बांदो केरनेरे लेई निक्के-बड्डे सेभेइं टाट पलैट्टू।
ज़ैखन नीनवेरे राज़े ऐह खबर मैल्ही; ते तैनी अपने तखते पुड़ेरां खड़े भोइतां, अपनो शाही लबास खोलतां टाट पलैट्टू ते मांज़नी पुड़ बिश्शी जेव। राज़े अपने प्रधान्न सेइं सलाह केरतां नीनवे मां इस बारे मां एलान कराव, “सब मैन्हु, गोरू गब्बां ते बाकी जानबर किछ भी न खान ते न पीन। ते मैन्हु ते जानबर दूईये टाट पलैट्टन, ते परमेशरे कां बिनती चिन्डां मैरतां केरन; ते एपनी बुरी बत्ती करां फिरन; ते तैस ज़ुलमे करां ज़ै तैना केरतन, मन फिरान। भोइ सखते कि परमेशर दया केरे ते अपनि इच्छा बदले, ते तैसेरो भड़कोरो क्रोध ठंडो भोइ गाए ते असां नाश भोने करां बेंच़ी गाम।”
ज़ैखन परमेशरे तैन केरां कम्मां हेरां, कि तैना बुरी बत्ती करां बाज़ एजने लगोरेन, तैखन परमेशरे अपनि इच्छा बदली, ते ज़ै तैन केरो नाश केरनेरो इरादो कियोरो थियो तै न कियो।
Source notes (1)
- Footnote एक्की दिहैड़रू सफर लगभग 30 किल्लो मीटर
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.