Bhadrawahi Bible
योना 1
योना परमेशरेरो हुक्म ट्लोड़ते
एक्सां यहोवा अमित्तैरे मट्ठे योना सेइं ज़ोवं, “जल्दी उठतां तैस बड्डे नगर नीनवे जो गानेरे लेई तियार भो, ते तैसेरे खलाफ न्यायेरो प्रचार केर; किजोकि तैसेरी बुराई मेरी नज़री मां एवरीए।” पन योना यहोवारे हज़ूरी मरां तर्शीश नगरे जो नशनेरे लेई खड़ो उठो, ते तैस याफा नगरे मां गेइतां तर्शीश नगरे जो गाने बालू अक ज़िहाज़ मैल्हू; ते करेइयो देइतां तैस पुड़ च़ैढ़ी जेव कि तैन सेइं साथी रेइतां यहोवारे हज़ूरी मरां तर्शीशे जो च़लो गाए।
तैखन यहोवाए समुन्दरे मां अक बड़ी आँधी च़लाई, ते समुन्दरे मां अक बड़ी आँधी च़ली, इड़ी तगर कि ज़िहाज़ ट्लुटने बालू थियूं। तैखन मल्लाह लोक डेरतां अपने-अपने देबतन कां फरियाद केरने लगे; ते ज़िहाज़े मां ज़ैन बुपारेरू सामान थियूं, तैन समुन्दरे मांजो शारने लगे कि ज़िहाज़ पोल्लू भोइ गाए। पन योना ज़िहाज़ेरे बुन्हीं हिस्से मां गेइतां तैड़ी झ़ुल्ली जेव, ते डुग्घी निड्ली मां झ़ुलोरो थियो। तैखन माँझी तैस कां नेड़े गेइतां ज़ोने लगो, “तू डुग्घी निड्ली मां झ़ुलोरो कुन केरतस? उठ अपने देबते कां प्राथना केर! भोइ सकते कि तै इश्शो खियाल केरे, ते असां नाश न भोम।”
तैखन मल्लाह एप्पु मांमेइं ज़ोने लगे, “एज्जा असां चिट्ठी छ़ेडतां पतो केरम कि ऐह मुसीबत असन पुड़ केसेरे वजाई सेइं एवरीए।” तैखन तैनेईं चिट्ठी छ़डी, ते चिट्ठी योनारे नंव्वे पुड़ निस्सी। तैखन तैनेईं योना सेइं ज़ोवं, “असन सेइं ज़ो कि ऐह मुसीबत असन पुड़ केसेरे वजाई सेइं एवरीए? तू कुन कारोबार केरतस? ते तू कोट्ठां एवरोस? ते तू कौस मुल्खेरो रानेबालोस ते तू कौस कौमरोस?” योना तैन जुवाब दित्तो, “अवं अक इब्रानी मैन्हु आईं; ते सुर्गेरो यहोवा ज़ैनी जल-थल दूईये बनेवरूए, तैसेरी आराधना केरताईं।” तैखन तैना बड़े डरे, ते तैस सेइं ज़ोने लगे, “तीं एन कुन कियोरूए?” तैना ज़ानते थिये कि ऐह यहोवारी हज़ूरी करां नेशतां एवरोए, किजोकि तैनी एप्पु तैन सेइं ज़ोवरू थियूं।
तैखन तैनेईं तैस पुछ़ू, “असां तीं सेइं कुन केरम ज़ैस सेइं समुन्दरेरी छ़ेल्ही शान्त भोइ गान?” तैस वक्त समुन्दरेरी छ़ेल्ही बेद्धती च़ेलोरी थी। योना तैन सेइं ज़ोवं, “मीं समुन्दरे मांजो शारा; तैखन समुन्दर शान्त भोल्हो; किजोकि अवं ज़ानताईं कि ऐह भारी आँधी तुसन पुड़ मेरे वजाई सेइं एवरीए।” फिर भी मल्लाह एपनी पूरी कोशिशी सेइं तैस बन्नेरे पासे खिचने लगे, पन पुज़ेई न सखे, किजोकि तैस समुन्दरेरी छ़ेल्ही बेद्धती च़ेलोरी थी। तैखन तैनेईं यहोवा कां प्राथना की, “हे यहोवा असां बिनती केरतम, कि इस मैन्हेरे प्राणा केरे बदले असां नाश न भोम, एक्की बेकसूरेरे मौतरी ज़िमेवारी इश्शे शिरे न ला, किजोकि हे यहोवा ज़ैन किछ तेरी इच्छा थी तैन्ने तीं कियोरूए।” तैखन तैनेईं योना छ़ुइतां समुन्दरे मांजो शारो; ते समुन्दरेरी खतरनाक छ़ेल्ही रुकी जेई। तैखन तैन मैन्हेइं यहोवारो बड़ो डर मन्नो, ते तैस कां च़ढ़तल च़ाढ़ी ते बन्धां कियां।
यहोवा अक बड्डी मछ़ली ठहरावरी थी कि योना निगले; ते योना तैस बेड्डी मेछ़लरे पेटे मां ट्लाई दिहाड़े ते ट्लाई राती राव।1
Source notes (1)
- Cross-reference मत. 12:40.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.