Bhadrawahi Bible
यूहन्ना 14:27
Verse 27 is marked below, with the whole chapter around it. Read from the start
परमेशरे तगर पुज़नेरी बत
“तुश्शो दिल उदास न भोए, तुस परमेशरे पुड़ विश्वास केरतथ, मीं पुड़ भी विश्वास केरा। मेरे बाजेरे घरे मां बड़े कमरेन, अगर न भोथी त अवं तुसन सेइं ज़ोथो, किजोकि अवं तुश्शे लेई ठार तियार केरने च़लोरोईं। अगर गेइतां तुश्शे लेई ठार तियार केरि त वापस एइतां तुसन एप्पू सेइं साथी नेलो, ताके ज़ैड़ी अवं भोल्हो तुस भी तैड़ी भोथ। ते ज़ेरां अवं च़लोरोईं तुस तैट्ठेरी बत ज़ानतथ।” थोमा तैस ज़ोवं, “हे प्रभु, असन नईं पतो तू कोरहां च़लोरोस, ते फिरी बत केन्च़रे ज़ानम?” यीशुए तैस सेइं ज़ोवं, “बत, सच़्च़ी ते हमेशारी ज़िन्दगी अव्वें आईं, कोई मेरे ज़िरिये बगैर बाजी कां न एज्जी सके। अगर तुसेईं अवं पिशानोरो भोथो त मेरे बाजी भी पिशानेथे, पन हुनी तुस तैस ज़ानतथ ते कने लाव भी।” फिलिप्पुसे तैस सेइं ज़ोवं, “हे प्रभु असन बाजी हिरा, तैन्ने इश्शे लेई बड़ू आहे।” यीशुए तैस सेइं ज़ोवं, “फिलिप्पुस, एत्रे च़िरे अवं तुसन सेइं साथी राव कुन तू मीं न ज़ानस ज़ैनी अवं लाव तैनी बाजी भी लाव तू किजो ज़ोतस असन बाजी हिरा? कुन तू विश्वास न केरस, कि अवं बाजी मां आईं ते बाजी मीं मां आहे? अवं ज़ैना गल्‍लां तुसन सेइं ज़ोताईं तैना गल्‍लां अवं अधिकारे सेइं न ज़ोईं, बल्के बाजी मीं मां रेइतां अपनु कम केरते। मेरो विश्वास केरा, कि अवं बाजी मां आईं ते बाजी मीं मां आहे, नईं त ज़ैना कम्मां केरताईं तैन हेरतां मीं पुड़ विश्वास केरा।” अवं तुसन सेइं सच़-सच़ ज़ोताईं, “कि ज़ै मीं पुड़ विश्वास केरते, एना कम्मां ज़ैना अवं केरताईं तै भी केरेलो, बल्के मीं करां भी बडां कम्मां केरेलो, किजोकि अवं बाजी कां च़लोरोईं। ज़ैन किछ तुस मेरे नंव्वे सेइं मगेले अवं तुसन देलो कि बाजी केरि महिमा मट्ठेरे वजाई सेइं बांदी भोए। अगर तुस मेरे नंव्वे सेइं किछ भी मग्गेले त अवं तैन केरेलो।”
पवित्र आत्मारो वाधो
“अगर तुस मीं सेइं प्यार केरतथ त मेरे हुक्मन मन्नेले। ते अवं बाजी कां प्राथना केरेलो ते तै तुसन अक मद्दतगार देलो कि हमेशा तुसन सेइं साथी राए। मतलब तै आत्मा ज़ै परमेशरेरे बारे मां सच़ बांदू केरेलो, ज़ै दुनिया कबूल न केरि सके, किजोकि न तैस लेइहोए न ज़ाने, तुस तैस ज़ानतथ किजोकि तै तुसन साथी रहती, ते तै तुसन मां भोल्ही। अवं तुसन अकैल्‍लो न शैरेलो बल्के अवं तुसन कां एज्जेलो। ई दुनिया किछ च़िरेरां बाद मीं न लाहेली, पन तुस मीं लहते राले, किजोकि अवं ज़ींतोईं ते तुस भी ज़ींते राले। ज़ैखन अवं ज़ींतो भोल्हो तेइस तुसन पतो लग्गेलो, कि अवं अपने बाजी मां आईं ते तुस मीं मां आथ ते अवं तुसन मां आई। ज़ैस कां मेरे हुक्म आन ते तैन मन्ते, त तैए मीं सेइं प्यार केरते ते मेरो बाजी तैस सेइं प्यार केरेलो, ते अवं तैस सेइं प्यार केरेलो, ते अपनो आप तैस पुड़ बांदो केरेलो।” तैखन यहूदा (तै यहूदा इस्करियोती न थियो बल्के होरो चेलो थियो) तैस सेइं ज़ोवं, “हे प्रभु कुन भोवं कि तू अपनो आप असन पुड़ बांदो केरनो चातस ते दुनियारे लोकन पुड़ नईं?” यीशुए जुवाब दित्तो, अगर कोई मीं सेइं प्यार केरते त तै मेरी शिक्षाई मन्ते, ते मेरो बाजी भी तैस सेइं प्यार केरेलो, ते अस तैस कां एजमेले ते तैस सेइं साथी रहमेले। ज़ै मीं सेइं प्यार न केरे, तै मेरे शिक्षाई न मन्ने, ज़ै शिक्षा तुस शुन्ने लगोरेथ, मेरी नईं पन मेरे बाजी केरि ज़ैने अवं भेज़ोरोईं।
“एना सैरी गल्‍लां मीं तुसन साथी रेइतां ज़ोई। पन तै मद्दतगार यानी पवित्र आत्मा ज़ैस बाजी मेरे ठैरी भेज़ेलो, तुसन सैरी गल्‍लां शिखालेलो, ते हर गल ज़ै मीं तुसन सेइं ज़ोरी याद करालो।” अवं तुसन शान्ति देइतां ज़ै मीं कां आहे, ज़ेन्च़रे दुनिया देचे तेन्च़रे नईं, तुश्शो दिल उदास न भोए ते न डेरथ। तुसेईं शुनू, मीं तुसन सेइं ज़ोवं, अवं गाताईं तुसन कां फिरी एज्जेलो अगर तुस मीं सेइं प्यार केरते भोते त खुशी भोने थिये, कि अवं बाजी कां च़लोरोईं किजोकि बाजी मीं करां बड्डोए। मीं सैरी गल्‍लां पेइले तुसन ज़ोवरिन कि ज़ैखन तैना पूरी भोन त तुस विश्वास केरेले। हुनी अवं तुसन सेइं जादे गल्‍लां न केरेलो, किजोकि शैतान एइते, ज़ै इस दुनियाई पुड़ राज़ केरनेबालोए। मीं पुड़ तैसेरो किछ अधिकार नईं। ज़ेन्च़रे बाजीए मीं हुक्म दित्तो, अवं तेन्च़रे केरताईं। पन एन एल्हेरेलेइ भोते कि दुनिया ज़ांने, कि अवं बाजी सेइं प्यार केरताईं। ते उठा इट्ठां च़लम।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.