Bhadrawahi Bible
योएल 1
टिट्टां केरे ज़िरिये विनाश
यहोवाए पतूएलेरे मट्ठे योएले ई सन्देश दित्तो, हे बुज़ुर्गव1, शुना, हे मुल्खेरे सब रानेबालव, ध्याने सेइं शुना! कुन एरी गल तुश्शे दिहाड़न मां, या तुश्शे दादे-पड़दादां केरे दिहाड़न मां कधी भोवरीए? अपने बच्चन सेइं एन गल्लां केरू बियान केरा, ते तैना अग्रोवं अपने बच्चन सेइं ते फिरी तैन केरे बच्चे एजने बैली पीढ़रे लोकन सेइं बियान केरन।
ज़ैन किछ गाजाम नंव्वेरे टिट्टन करां बच़ू; तैन अर्बे नंव्वेरे टिट्टेइं खाऊं। ते ज़ैन किछ अर्बे नंव्वेरे टिट्टेइं खाऊं। तैन येलेक नंव्वेरे टिट्टेइं खाऊं। ते ज़ैन किछ येलेक नंव्वेरे टिट्टन करां बच़ू। तैन हासील नंव्वेरे टिट्टेइं खेइ छ़डू। हे मतवाले लोकव, बींझ़ां ते खड़े उट्ठा, ते लेरां देथ; ते हे सब दाछ़रो रस पीने बालाव, नंव्वे दाछ़रे रस्सेरी वजाई सेइं अफ़सोस, अफ़सोस, केरा; किजोकि हुनी तै तुसन नईं मैल्हनो।
हेरा, मेरे मुल्खे पुड़ एक्की कौमां चढ़ाई कियोरीए, तै ताकतबरे, ते तैसारे लोक बेशुमारन; तैन केरे दंत शेरेरे ज़ेरेन, ते दाढ़ां शेरनरी ज़ेरिन।2 तैस कौमां मेरी दाछ़री बाग उज़ाड़ी, ते मेरे फैगेरे बुट ट्लोड़ी छ़डोरेन। तैसां तैना छ़िलतां बिछ़ोड़े, ते तैसेरी डैलड़ी छ़िलने सेइं छ़ित्ती भोइ जेई।
टाट पलेटतां ज़ेन्च़रे जुवान कुई अपने भोनेबाले मुन्शेरे मरने पुड़ मातम केरतीए, तेन्च़रे तुस भी मातम केरा। यहोवारे भवने मां न त अन्नबलि ते न दाछ़रे रस्सेरी बलि एज्जे। तैसेरे सेवक ज़ैना याजकन, तैना मातम केरि राहोरेन। ऊडारां तबाह भोइ जेआं, ज़मीन मातम केरतीए; किजोकि अन्न नाश भोइ जेवरूए, नंव्वो दाछ़रो रस शुक्की जेवरोए, तेल भी शुक्की जेवरोए।
हे ज़मीनदारव, शरमिन्दे भोथ, हे बागां केरे मालिकव ते गेहुं, जौआं केरे लेई अफ़सोस केरा; किजोकि ऊडारां केरि फसल तबाह भोइ जेवरीए। दाछ़री बाग शुक्की जेवरीए, ते फैगेरे बुट ट्लेक्की जेवरेन। अनार, खजूर ते च़ोइयां केरे बल्के फल देनेबाले सारे बुट शुक्की जेवरेन; ते इन्सानेरी खुशी खतम भोइ जेवरीए।
हे याजकव, टाट लेइतां ते छाती पिट्टी-पिट्टी मातम केरा! हे वेदी कां सेवा केरनेबालव, अफ़सोस केरा। हे मेरे परमेशरेरे सेवकव, ते टाट लेइतां रात गुज़ारा! किजोकि तुश्शे परमेशरेरे भवने मां न त अन्नबलि ते न पीनेरी च़ढ़तल एज्जे।
बरत रखनेरी दिहाड़ी च़ुना, महा सभारो प्रचार केरा। बुज़ुर्गन बल्के मुल्खेरे सब लोकन भी अपने यहोवारे भवने मां अकोट्ठे केरतां तैस कां मद्दतरे लेई बिनती केरा।
तैस खतरनाक दिहाड़ेरे3 वजाई सेइं अफ़सोस! किजोकि यहोवारी दिहाड़ी नेड़े। तै सर्वशक्तिमान परमेशरेरे तरफां सत्यानाश भोनेरी दिहाड़ी भोइतां राली। कुन खानेरी चीज़ां इश्शे हेरते नाश नईं भोइ? कुन इश्शे परमेशरे भवनेरो आनन्द ते मघन भोनू खतम नईं भोवरू?
बीज़ ढैलन हैठ शुक्की जेवं, गुदाम खाली पेवरेन; ते कोठार ट्लोड़ी छ़डोरेन, किजोकि फसल बरबाद भोइ जेई। जानबर केन्च़रे करलाने लगोरेन? गोरू थेकी जेवरन, किजोकि तैन केरे लेई कोन्च घास नईं; ते गब्बां केरि केन्नी पापेरो फल भोगी रेवरिन।
हे यहोवा, अवं तीं कां बिनती केरताईं, किजोकि जंगलेरो घास अग्गरो शिकार भोइ जेव, ते मैइदानेरे सारे बुट अग्गी सेइं फुकोई जे। जंगली जानबर भी तेरे लेई हमफतन, किजोकि सुनसान ठैरारे नाग भी शुक्की जेवरेन, किजोकि घास अग्गी सेइं फुकोई जेवरोए।
Source notes (3)
- Footnote बुज़ुर्गव लोकां केरे अगुवे
- Cross-reference प्रका. 9:7-10.
- Footnote खतरनाक दिहाड़ेरे ज़ेइस परमेशर दुनियारे लोकां केरो न्याय केरेलो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.