यिर्मयाह 44

मिस्र मुल्खे मां यहूदी केरे खलाफ परमेशरेरो सन्देश

1ज़ेत्रे यहूदी लोक मिस्र मुल्खे मां मिग्दोल, तहपन्हेस ते नोप नगरन ते पत्रोस प्रदेशे मां रहते थिये, तैन केरे बारे मां यहोवा मीं सेइं ज़ोवं, 2“इस्राएलेरो परमेशर, सेना केरो यहोवा एन ज़ोते: ज़ै आफत मीं यरूशलेम ते यहूदारे सेभी नगरन पुड़ छ़डोरीए, तै सब तुसेईं लाहोरीए। हेरा, तैना अज़ केरहे उज़ड़ोरेन ते गैर आबाद आन, 3किजोकि तैन केरे रानेबालेईं तै बुराई की ज़ैस सेइं तैनेईं अवं सरकावरो थियो, तैना गेइतां होरि देबतां केरे लेई गुग्गल बालते थिये ते तैन केरि पूज़ा केरते थिये, ज़ैन्न न तुस ते न तुश्शे दादे-पड़दादे ज़ानते थिये। 4फिरी भी अवं अपने सब दास नेबन बार-बार एन ज़ोनेरे लेई तुसन कां भेज़तो राव कि एन भिट्टू कम न केरा, ज़ैस सेइं अवं नफरत केरताईं। 5पन मेरे लोकेईं मेरी न शुनी ते न मेरे पासे ध्यान दित्तू कि अपनि बुराई शारन ते होरि देबतां केरे लेई गुग्गल न बालन। 6एल्हेरेलेइ मेरी सरक ते क्रोधेरी अग यहूदारे नगरन ते यरूशलेमेरी सड़कन पुड़ बेड़की जेई; ते तैना अज़्ज़ेरे दिहाड़े तगर बेरान ते सुनसान पेवरेन। 7हुनी यहोवा, सेना केरो परमेशर, ज़ै इस्राएलेरो परमेशरे, एन ज़ोते: तुस लोक किजो अपनो ई बड़ो नुकसान केरतथ, कि कुन मड़द, कुन कौन्श, कुन बच्‍चे, कुन दुद्ध पीतो बच्‍चो, तुस सब यहूदा मरां नाश किये गाथ, ते कोई न राए? 8किजोकि इस मिस्र मुल्खे मां ज़ैड़ी तुस परदेशी बेनतां रानेरे लेई एवरेथ, तुस अपने कम्मां केरे ज़िरिये, मतलब होरि देबतां केरि पूज़ा केरतां मीं सरकातथ ज़ैस सेइं तुस नाश भोइ गाले ते दुनियारे सारे कौमां केरे लोक तुश्शी कौमरी बदनामी केरेले ते तुश्शू ऊपाम देइतां लानत देले। 9ज़ैना बुरैई तुश्शे दादे-पड़दादे, यहूदारे राज़े ते तैन केरि रैनी, ते तुश्शी कौन्शां, बल्के तुस यहूदा प्रदेश ते यरूशलेमेरी सड़कन मां केरते थिये, कुन तुसेईं तैना बुराई बिसरी? 10अज़ तगर तैन केरो मन चूर न भोव; ते न तैना डरन; ते न मेरे तैस कानून ते तैन विधन पुड़ च़लतन ज़ैना मीं तुश्शे दादे-पड़दादन ते तुसन दित्तोरी थी।

11“एल्हेरेलेइ इस्राएलेरो परमेशर, सेना केरो यहोवा एन ज़ोते: हेरा, अवं तुश्शे खलाफ भोइतां तुश्शो नुकसान केरेलो, ताके सब यहूदी केरो अन्त केरि। 12बच़ोरे यहूदी ज़ैना ज़िद केरतां मिस्र मुल्खे मां एइतां राने लगोरेन, तैना सब मिटी गाले; एना मिस्र मुल्खे मां निकड़े करां लेइतां बडे तगर तैना तलवार ते कालेरे ज़िरिये मिटी गाले; ते लोक तैन कोसेले ते हैरान भोल्हे; ते तैन केरू ऊपाम देइतां लानत देले ते निन्दा भी केरेले। 13ज़ेन्च़रे मीं यरूशलेमे तलवार, काल ते मरी एरे ज़िरिये सज़ाह दित्तोरीए, तेन्च़रे ही मिस्र मुल्खे मां रानेबालन भी सज़ाह देइलो, 14कि ज़ैना बच़ोरे यहूदी मिस्र मुल्खे मां परदेशी भोइतां रानेरे लेई एवरेन, अगर तैना यहूदा प्रदेशे मां रानेरे लेई वापस एजनेरी बड़ी इच्छा रखतन, फिरी भी तैन मरां अक भी बेंच़तां तैड़ी वापस न एज्जी बटेलो; सिर्फ किछ नशने बालां केरे अलावा होरो कोई भी वापस न एज्जी बटेलो।”

15तैखन मिस्र मुल्खेरे पत्रोस प्रदेशे मां रानेबाले ज़ेत्रे मड़द ज़ानते थिये कि यहूदा प्रदेशेरी सैरी कौन्शां होरि देबतां केरि पूज़ा केरतिन, ते ज़ेत्री कौन्शां बेड्डी मेण्डली मां नेड़े खड़े थी, तैन सेभेइं मीं ई जुवाब दित्तो: 16“ज़ैन वचन तीं असन यहोवारे नंव्वे सेइं शुनावं, तैस असां न शुनमेले। 17ज़ैना गल्‍लां केरनेरे लेई असेईं ज़ोवरू तैना असां पूरी केरमेले, असां सुर्गेरी रैनरे लेई गुग्गल बालमेले ते पीनेरी च़ढ़तलां देले, ज़ेन्च़रे कि इश्शे दादे-पड़दादे ते असां भी अपने राज़न ते बाकी हाकिमन समेत यहूदारे नगरन मां ते यरूशलेमेरी सड़की मां केरते थिये; किजोकि तैस वक्त असां पेट भेरतां खाते ते सझ़र रहते ते कोन्ची मुसीबती मां न थिये पेवरे। 18पन ज़ैखन करां असेईं सुर्गेरी रैनरे लेई गुग्गल बालनो ते पीनेरी च़ढ़तलां देने शैरी, तैखन करां असन सब चीज़ां केरि कमीए; ते असां तलवार ते कालेरे ज़िरिये मिटी जेवरेम।” 19ते कौन्शेइं ज़ोवं, “ज़ैखन असां सुर्गेरी रैनरे लेई गुग्गल बैलती थी ते चन्द्राकार रोट्टी बनेइतां पीनेरी च़ढ़तल च़ैढ़ती थी, तैन इश्शे मुन्श मन्ज़ूर केरते थिये।”

20तैखन मीं सब कौन्शन, मड़दन ते ज़ेत्रे लोकेईं ई जुवाब दित्तो, तैन सेभन सेइं ज़ोवं, 21“तुश्शे दादे-पड़दादे ते तुस ज़ैना अपने राज़न ते हाकिमन ते लोकन समेत यहूदा प्रदेशेरे नगरन ते यरूशलेमेरी सड़की मां गुग्गल बालते थिये, कुन तै यहोवारे ध्याने मां न अव? 22कुन तैनी तै याद न कियो? एल्हेरेलेइ ज़ैखन यहोवा तुश्शे बुरे ते सब भिट्टे कम्मन ते होरू किछ न झ़ेल्‍ली सको, तैखन तुश्शो मुल्ख उज़ैड़तां गैर आबाद ते बेरान भोइ जेव, इड़ी तगर कि लोक तैसेरू ऊपाम देइतां लानत देतन, ज़ेन्च़रे कि अज़ भोते। 23किजोकि तुस गुग्गल बैलतां यहोवारे खलाफ पाप केरते ते तैसेरी न थिये शुन्ते, ते तैसेरे कानून ते विधन ते हदायतां केरे मुताबिक न च़ले, एल्हेरेलेइ ई मुसीबत तुसन पुड़ पेई, ज़ेन्च़रे कि अज़्ज़े।”

24फिरी मीं तैन सब लोकन सेइं ते तैन सब कौन्शन सेइं ज़ोवं, “हे मिस्र मुल्खे मां रानेबाले सारे यहूदी लोकव, यहोवारू वचन शुना, 25इस्राएलेरो परमेशर, सेना केरो यहोवा, एन ज़ोते, कि तुसेईं ते तुश्शी कौन्शेइं बन्धां कियां ते एन ज़ोइतां तैन पूरे केरतथ कि असेईं सुर्गेरी रैनरे लेई गुग्गल बालने ते पीनेरी च़ढ़तलां च़ाढ़नेरू बन्धू कियूं तैना असां ज़रूर पूरे केरमेले; ते तुसेईं अपने हथ्थन सेइं एन्च़रे कियूं। एल्हेरेलेइ हुनी तुस अपनु-अपनु बन्धू मेनतां पूरू केरा! 26पन हे मिस्र मुल्खे मां रानेबाले सारे यहूदी लोकव यहोवारू वचन शुना: शुना, मीं अपने बड़े नंव्वेरी कसम खेवरीए कि हुनी पूरे मिस्र मुल्खे मां कोई यहूदी मैन्हु मेरू नवं घिन्तां फिरी कधी एन न ज़ोई बटेलो, ‘प्रभु यहोवारी कसम।’ 27शुना, हुनी अवं तैन केरे भलैइयरे नईं, बल्के नुक्सानेरे लेई नज़र रखेलो; मिस्र मुल्खे मां रानेबाले सब यहूदी, तलवार ते काले सेइं नाश भोइ गाले ज़ांतगर कि तैन केरो पूरो नाश न भोइ गाए। 28ज़ैना तलवारी करां बेंच़तां ते मिस्र मुल्खे मरां वापस गेइतां यहूदा प्रदेशे मां पुज़मेले, तैना थोड़े भोल्हे; ते मिस्र मुल्खे मां रानेरे लेई एवरे सब यहूदी लोकन मरां ज़ैना बच़ेले, तैना समझ़ेले कि केसेरू वचन पूरू भोवं, मेरू या तैन केरू। 29एस गल्‍लरो अवं ई निशान देताईं, यहोवा एन ज़ोते, कि अवं तुसन इस्से ठैरी सज़ाह देइलो, ज़ैस सेइं तुसन पतो लग्गेलो कि तुश्शो नुकसान केरने मां मेरे वचन सच़्च़े पूरे भोल्हे। 30यहोवा एन ज़ोते: हेरा, ज़ेन्च़रे मीं यहूदारे राज़ो सिदकिय्याह तैसेरे दुश्मन यानी तैस जानां मारने बाले बाबेलेरे राज़े नबूकदनेस्सरेरे हथ्थे कियो, तेन्च़रे ही अवं मिस्रेरे राज़े फ़िरौने होप्रा भी तैसेरे दुश्मना केरे, यानी तैस जाना मारने बालां केरे हथ्थे केरेलो।”