Bhadrawahi Bible
यिर्मयाह 10
परमेशर ते मूरती पूज़ा
यहोवा एन ज़ोते, हे इस्राएली लोकव ज़ैन वचन यहोवा तुसन सेइं ज़ोते तैस शुना। “गैर कौमां केरे ज़ेरे न बना, ज़ैना अम्बरेरे निशान हेरतां एजने बाले वक्तेरे बारे मां ज़ान्नेरी कोशिश केरतन, एल्हेरेलेइ ज़ेन्च़रे तैना एन हेरतां डरतन तेन्च़रे तुस न डेरथ। किजोकि मुल्खेरे लोकां केरि रीति रुवाज़ फुज़ूल आन। मूरती त जंगले मरां कोन्चे लकड़ी कटोरीए, ज़ै कारीगिरे मैक्कु सेइं बनेवरीए। लोक तैस सोन्ने चैंदी सेइं सज़ान ते हथोड़े सेइं किल देइतां मज़बूत केरतन कि तै हिल्ले न। तैना मूरती कैकड़रे उडारे मां खड़े डरानेरी ज़ेरिन, पन तैना ज़ोई न बटन; तैना छ़ुइतां च़लैनी पेतिन, किजोकि तैना च़ेलि न सखन। तैन करां न डरा, किजोकि न तैना किछ बुरू केरि सखन ते न किछ भलू।”
हे यहोवा, तेरो ज़ेरो कोई नईं; तू महान आस, ते तेरू नवं शेक्ति सेइं भेरतां आहे। हे सब कौमां केरे राज़ा, तीं करां कौन न डरेलो? किजोकि तू इस काबल आस; गैर कौमां केरे सारे अक्लमन्दन मां, ते तैन केरे सारे रियासतन मां तेरो ज़ेरो कोई नईं।1 तैना बेवकूफ ते बेअक्ल आन; मूरती केरि कुन शिक्षा? तैना त लकड़ी आन! पतरे बनेइतां चाँदी तर्शीशेरां आनी गाचे, ते ऊफाजे मरां सोन्नू। तैना कारीगिर ते सुनारां केरे हथ्थां केरि कारीगिरी आन; तैन केरां लिगड़ां नीले ते बैंगनी रंगेरां आन; तैन मां ज़ैन किछ आहे तैन माहिर कारीगिरां केरि कारीगिरी आहे। पन यहोवा हकीकति मां परमेशरे; ज़ींतो परमेशर ते हमेशारे राज़ो तैए आहे। तैसेरे सरकी सेइं धरती थरकतीए, ते कौमां-कौमां केरे लोक तैसेरे सरकी झ़ेल्ली न बटन।2
तुस तैन सेइं इन ज़ोइयथ, “इना देबते ज़ैनेईं अम्बर ते धरती नईं बनेवरी तैना धरती पुड़ेरां ते अम्बरे हेठोरां नाश भोइ गाले।”
तारीफ़रू गीत
यहोवा धरती एपनी शेक्ति सेइं बनेवरीए, तैनी संसार अपने अक्ली सेइं कायम कियोरूए, ते अम्बर अपने अक्ली सेइं फैलावरूए। ज़ैखन तै ज़ोते त तैखन अम्बर गुड़ते, ते धेरतरे कूने-कूने पुड़ेरां निहार उठाते। तै झ़ेड़रे लेई बिजली चमकाते, ते अपने भण्डारे मरां हवा च़लाते। सब मैन्हु बेवकूफ ते अज्ञानी आन; एपनी बनेवरी मूरती केरे वजाई सेइं सुनारां केरि उमीद ट्लुटी गाचे; किजोकि तैन केरि बनेवरी मूरती झूठी आन, ते तैना बेजान आन।3 तैना मूरती फुज़ूल ते मज़ाकेरे काबलन; ज़ैखन तैन केरे सज़ारो वक्त एज्जेलो तैखन तैना भी नाश भोइ गैली। पन परमेशर ज़ै याकूबेरो हिस्सोए तैन मूरती केरो ज़ेरो नईं, किजोकि तै सेभी केरो पैदा केरनेबालोए, ते इस्राएल तैसेरे अपने हिस्सेरू गोट्ले; सेना केरो यहोवा तैसेरू नंव्वे।
एजनेबाली गुलामी
हे घेरोरी यरूशलेम नगरी, अपनु सामान सलह! किजोकि यहोवा इन ज़ोते, “अवं इस फेरे एस मुल्खेरे रानेबालन ज़ेन्च़रे गोफने मां रेखतां शारेलो, ते तैन एरे-एरे मुसीबती मां छ़डेलो कि तैन केरे समझ़ी मां भी न एज्जेलू।”
यरूशलेमेरे लोकेईं ज़ोवं, असन पुड़ अफ़सोस! इश्शो ज़खम ठीक भोनेरो नईं। फिरी असेईं सोचू, “ई त रोगे, एल्हेरेलेइ असेईं ई झ़ैलोरो लोड़े।” मेरो तेम्बु लुट्टो जेव, ते सब रेस्सी ट्लूटी जेई; मेरे बच्चे मीं करां च़ले जेवरेन, ते नईं; ते हुनी कोई न राव ज़ै मेरे तेम्बु खड़ो केरे ते तैसेरे पड़दे लाए। किजोकि पुहाल जानबरां केरे ज़ेरेन, ते तैना यहोवा न तोप्पन; एल्हेरेलेइ तैना अक्ली सेइं न च़लन, ते तैन केरि सब भैड्डां तितर-बितर भोइ जेवरिन।
शुन, अक आवाज़ शुनोतीए! हेर, तै एज्जी राहोरोए! उत्तरेरे पासे बड़ी शौर मच़ोरीए ताके यहूदारे नगरन उज़ैड़तां गिद्दां केरि ठार बनाए।
यिर्मयाहेरी प्राथना
हे यहोवा, मीं पतो च़लो, कि मैन्हेरी बत्तां तैसेरे बस्से मां नईं, मैन्हु च़लने त च़लते, पन तैसेरे कदम तैसेरे अधीन नईं। हे यहोवा, मीं सज़ाह देइतां सुधार, पन न्याय सेइं; क्रोधे मां एइतां नईं, कि एरू न भोए कि अवं नाश भोईं।
ज़ै कौम तीं न ज़ाने, ते ज़ैना तीं कां प्राथना न केरन, तैन्ने पुड़ अपनो क्रोध डोल; किजोकि तैनेईं याकूब निगली छ़डो, बल्के तै खेइतां खतम केरि छ़डोरोए, ते तैसेरे रानेरी ठार उज़ैड़ी छ़डोरीए।4
Source notes (4)
- Cross-reference प्रका. 15:4.
- Cross-reference नहू. 1:6.
- Cross-reference यिर्म. 51:17-18.
- Cross-reference भज. 79:6-7.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.