Bhadrawahi Bible
यशायाह 9
शैन्तरे राजकुमारेरू ज़र्म
फिरी भी मुसीबती सेइं भेरतां अंधकार च़लो गालो। पेइलू त तैनी जबूलून ते नप्ताली प्रदेशां केरू अपमान कियूं, पन आखरी दिहाड़न मां भूमध्य सागरेरे पासे यरदन दरियारे पारेरे गैर कौमां केरे गलीले महिमा देलो।
ज़ैना लोक आंधरे मां च़ेलि राहोरे थिये तैनेईं बड़ो ट्लेकड़ार लाव; ते ज़ैना लोक बड़े आंधरे सेइं भरोरे मौतरे मुल्खे मां रहते थिये, तैन पुड़ बड़ी लौ चमकी।1 हे इश्शे यहोवा तीं इस्राएली कौम बधाई, तीं तैस बड़ो आनन्द दित्तो; तैना तेरे सामने फसल कटनेरो ज़ेरो आनन्द मनातन, तैना एत्रे खुश भोतन ज़ेन्च़रे लोक लूटरो माल बंटते वक्ते खुश भोतन। किजोकि तीं तैसेरे मेट्टू पुड़ां भारी जुऊं ते तैसेरे कंधे पुड़ लट्ठ, ते तैस पुड़ ज़ुलम केरनेबालो डण्डो, इन सब तीं एन्च़रे ट्लोड़ू ज़ेन्च़रे बड़े पेइले मिद्यानी केरे दिहाड़न मां कियोरू थियूं। किजोकि जंगी मां लड़नेबाले सिपाही केरे बूट ते खूने सेइं भरोरां लिगड़ां सब अग्गी मां फुकोई गालां। किजोकि इश्शे लेई अक मट्ठू पैदा भोल्हु, असन अक मट्ठू दित्तू गालू; ते राज़ तैसेरे कंधे पुड़ भोल्हु, ते तैसेरू नवं अद्भुत सलाहकार, सामर्थी परमेशर, हमेशारो बाजी, ते शैन्तरो राजकुमार रख्खू गालू। ते तैसेरू राज़ हमेशा बद्धतू रालू, ते तैसेरे शैन्तरो कोई अन्त न भोल्हो, एल्हेरेलेइ तैस दाऊदेरे तखते पुड़ अज़्ज़ेरां करां हमेशा तगर न्याय ते धर्मेरे ज़िरिये कायम केरतां सम्भैलतां रखेलो। सेना केरे यहोवारे धुनेरी वजाई सेइं इन भोइ गालू।2
इस्राएलेरे खलाफ परमेशरेरो क्रोध
प्रभु परमेशरे याकूबेरे खलाफ सन्देश भेज़ोरोए, ते तै इस्राएले पुड़ बांदो भोवरोए; ते सारे इस्राएली लोकन, एप्रैमी लोकन ते सामरियारे रानेबालन पतो लेग्गी गालो, ज़ैना बड़े घमण्डे ते बड़े सखत भोइतां ज़ोतन, “इट्टां केरि दिवारां त बिछ़ड़ी जेवरिन, पन अस घड़ाई कियोरे घोड़न सेइं घरां बनामेले; गूलरेरे बुट्टां केरे नग त कट्टे जेवरेन पन असां तैन केरे बदले गैइड़ेरे लेकड़ी सेइं कम केरमेले।” एल्हेरेलेइ यहोवा तैन पुड़ रसीनेरे दुश्मन इस्राएले पुड़ हावी केरेलो, तैन केरे दुश्मन मतलब पेइले अरामी लोकन ते फिरी पलिश्ती लोकन उभारेलो, ते तैना आशी घैड़तां इस्राएली लोकन निगली गाले। पन फिर भी तैसेरो क्रोध ठंडो न भोल्हो, ते तैसेरो हथ हेजू तगर तैन केरे खलाफे खड़ो राहोरोए।
फिरी भी एना लोक अपने सज़ाह देनेबालेरे यहोवारे पासे न फिरे ते न सेना केरे यहोवारी तलाश केरन। एस्से वजाई सेइं यहोवा इस्राएले मरां क्रोड़ी ते पौंछ़ड़, खजूरेरी डैलड़ी ते निरैठी, एक्सां केटतां छ़डेलो। बुज़ुर्ग ते इज़्ज़तदार लोक त क्रोड़ी आन, ते झूठी गल्लां शिखालनेबाले नबी पौंछ़ड़ आन; किजोकि ज़ैना लोक एन केरि अगवाई केरतन तैना तैन भटकातन, ते ज़ैन केरि अगवाई भोतीए तैना नाश भोइ गातन एल्हेरेलेइ प्रभु न त एन केरे जुवानन सेइं खुशी भोल्हो, ते न इन केरे अनाथ बच्चन ते न विधवा कौन्शन पुड़ रहम केरेलो। किजोकि हर अक भक्ति न केरनेबालो, ते बुरां कम्मां केरनेबालोए ते हर कोई बेवकूफरी गल्लां ज़ोते। एत्रे पुड़ भी तैसेरो क्रोध ठंडो न भोव, ते तैसेरो हथ तैन केरे खलाफे खड़ोए।
किजोकि लोकां केरि बुराई अग्गरी ज़ेरि फुकतीए, तै झ़ैल्लन ते कंटन भस्म केरतीए, बल्के तै घने जंगलेरे झ़ैल्लन मां अग लातीए ते तै तूए मां बेदलतां उब्री आसमाने जो घिन्नी गातीए। सेना केरे यहोवारे क्रोधे सेइं ऐह मुल्ख फुक्को जेवरोए, ते एना लोक अग्गरे कैड़ु केरे ज़ेरेन; एना एप्पु मांमेइं महरबैनरो बर्ताव न केरन। तैना देइने पासेरां खानेरी चीज़ां थुसोड़तां भी नियन्ने रहतन, ते बांए पासेरां खानेरी चीज़ां थुसोड़तां भी तैन केरू पेट न रज़्ज़े; तैन मरां हर अक मैन्हु अपने बच्चां केरू मास खाते,
मनश्शे एप्रैमेरे ते एप्रैम मनश्शेरे लोक एक्की होरेरे खलाफ भोइतां, ते तैना दूईये मिलतां यहूदारे खलाफ लड़ेले, एत्रे पुड़ भी यहोवारो क्रोध ठंडो न भोव, ते तैसेरो हथ तैन केरे खलाफ खड़ोए।
Source notes (2)
- Cross-reference मत. 4:15;लूक. 1:79.
- Cross-reference लूक. 1:32-33;यिर्म. 23:5.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.