Bhadrawahi Bible
यशायाह 63
परमेशरेरो न्याय ते छुटकारो
ऐह कौने ज़ै एदोम मुल्खेरे बोस्रा नगरे मरां एज्जी राहोरोए, ज़ैनी लाल रंगेरां लिगड़ां लेवरन, ज़ै बड़ो ताकतबर ते चमकतो चोगो लेइतां झुमतो च़लतो एइते?
“ऐह अवं यहोवा ज़ै धार्मिकताई सेइं ज़ोताईं ते पूरो छुटकारो केरनेरी शक्ति रखताईं।”
मीं पुछ़ू तेरो लबास किजो लाले? ते कुने कि तेरां लिगड़ां कुण्डे मां दाछ़ ढ्लन्च़नेरां ज़ेरां आन?
यहोवा जुवाब दित्तो, “मीं त अकैल्ले कुण्डे मां दाछ़ ढ्लन्च़ोरीए ते मुल्खेरे लोकन मरां केन्चे मेरू साथ नईं दित्तोरू; हाँ मीं अपने क्रोधे मां एइतां तै ढ्लन्च़ी ते सरकी सेइं ढ्लेन्च़े; ते तैन केरे खूनेरी छ़िड़की मेरे लिगड़न पुड़ पेई, ते एस सेइं मेरां सारां लिगड़ां छ़िड़केइं सेइं भेरोई जेआं।1 किजोकि बदलो नेनेरी दिहाड़ी मेरे मने मां थी, ते मेरे छुटेवरे लोकां केरो साल पुज़्ज़ी जेवरो थियो। मीं तलाश की पन कोई मद्दत केरनेबालो न मैल्हो; अवं हैरान भी भोव कि कोई सहारो देनेबालो न थियो; तैखन मीं अपने शेक्ति सेइं छुटकारो दित्तो, मीं एन एल्हेरेलेइ केरी बटु किजोकि अवं क्रोधे मां थियो। हाँ, मीं क्रोधे मां एइतां मुल्खे-मुल्खेरे लोक झ़िड़के, एपनी जलनी मां तैना मतवाले किये, ते तैन केरो खून ज़मीनी पुड़ बगाव।”
अनुग्रह याद करानो
ज़ेत्रो उपकार यहोवा असन इश्शे लोकां केरो कियो मतलब इस्राएलेरे घराने पुड़ दया ते बड़ी दया केरतां तैनी असन सेइं ज़ेत्री भलियाई की, तैन सेभी केरे मुताबिक अवं यहोवारे दयारे कम्मां केरू बियान ते तैसेरी तारीफ़ केरेलो। किजोकि यहोवा ज़ोवं, “सच़्च़े एना मेरी प्रजारे लोक आन, एरां मट्ठन ज़ैना धोखो न देले; ते तै तैन केरो छुटानेबालो भोव।” तैन केरि सैरी मुसीबतन मां भी तै तैन सेइं साथी राव, ते परमेशरेरे सामने रानेबाले दूते तैन केरो छुटकारो कियो; प्यारे ते नेरमी सेइं तैने एप्पु तैना छुटाए; तैने तैना उठाए ते पेइले ज़माने करां हमेशा तैना घिन्तां जे।
फिरी भी तैनेईं बगावत की ते तैसेरी पवित्र आत्माई सरक दुवाई; एल्हेरेलेइ तै बेदलोइतां तैन केरो दुश्मन बेनि जेव, ते तैन सेइं लड़ने लगो।2 फिरी तैसेरे लोकेईं पुराने दिहाड़े याद किये, मूसेरे ते तैसेरे लोकां केरे दिहाड़े, तै कोड़िए ज़ैनी अपनि भैड्डां तैन केरे पुहाले समेत समुन्दरे मांमेइं केढी? ज़ैनी तैन केरे दरमियान अपनो पवित्र आत्मा छ़डो, तै कोड़िए? केनी अपनि शक्ति मूसा नेबेरे देइने हथ्थे सेइं साथी रखी, ज़ैनी तैन केरे सामने समुन्दरेरे पैनेरे दूई हिस्से केरतां अपनु सदारू नवं केरेलो। ज़ैनी तैना डुग्घे समुन्दरे मांमेइं कढे, ज़ेन्च़रे घोड़ो खुल्ले जंगले मां, तेन्च़रे तैन ठोकर न लगी; तै कोड़िए? ज़ेन्च़रे पैलतू जानबर वैदी मां एइतन; तेन्च़रे यहोवारे आत्मा तैन आराम दित्तो। एन्च़रे सेइं तीं अपने लोकां केरि अगवाई की ताके अपने नंव्वे महिमा बखशे।
इस्राएलेरी प्राथना
हे यहोवा, सुर्गे मरां तक, ज़ै तेरो पवित्र ते महिमाई सेइं भेरतां रानेरी ठारे, नज़र केर। तेरी जलन ते तेरी कुदरत कोड़िए? तेरी दया ते तेरी करुणा मीं पुड़ेरां हेटी जेवरिन। सच़्च़े तू इश्शो बाजी आस, अगर अब्राहम असन न पिशानेथो, ते इस्राएल असन कबूल न केरेथो; फिरी भी, हे यहोवा तू इश्शो बाजी ते इश्शो छुटानेबालो आस; पुराने ज़माने करां लेइतां तेरू एन्ने नंव्वे।3 हे यहोवा तू किजो असन तेरे बत्ती करां टपलातस, ते इश्शे दिल सखत केरतस कि असां तेरो डर न मन्नम? अपने दासां केरे लेई ते अपने हिस्सेरे लेई अपने गोट्लां केरे लेई वापस एई। तेरी पवित्र प्रजा त थोड़े च़िरे तगर तेरे पवित्र ठारारी अधिकारी राई; इश्शे दुश्मनेईं तेरी पवित्र ठार बरबाद केरतां छ़डी।4 असां लोक त एरे भोवरेम, ज़ेन्च़रे कि तीं असन पुड़ कधे हुकूमत नईं कियोरी, ते तैन केरे बराबर ज़ैन जो कधी तेरे न ज़ोले।
Source notes (4)
- Cross-reference प्रका. 14:20;19:15.
- Cross-reference प्रेरित. 7:51;इफि. 4:30.
- Cross-reference यूह. 8:41.
- Cross-reference लूक. 21:24;प्रेरित. 11:2.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.