Bhadrawahi Bible
यशायाह 61
छुटकारेरो सन्देश
यशायाह नबूवत केरते ज़ोते, प्रभु यहोवारो आत्मा मीं पुड़े; किजोकि यहोवा खुशखबरी शुनानेरे लेई मेरू अभिषेक कियोरूए ते अवं एल्हेरेलेइ भेज़ोरोईं कि दुखी लोकन शान्ति देईं, ते कैदी लोकां केरे लेई आज़ादी ते कैदी लोकां केरे लेई छुटकारेरो प्रचार केरि;1 कि यहोवारे खुश रानेरे सालेरो ते इश्शे परमेशरे बदलो घिन्नेरे दिहाड़ेरो प्रचार केरीं; कि सेभी मातम केरनेबालन शान्ति देईं।2 ते सिय्योनेरे मातम केरनेबालां केरे दोग्गे पुड़ेरां मांज़न दूर केरतां खूब रोड़ी पगड़ी बन्धेलो, कि तैन केरो मातम दूर केरतां तैन खुशरो तेल लेईं ते तैन केरि उदासी हटेइतां तैन यशेरां लिगड़ां लुवेइं; ज़ैस सेइं तैना धार्मिकतारे बंज़ेरे बुट्टे हैठ ते यहोवारे लेवरे ज़ोए गाले ते ज़ैस सेइं तैसेरी इज़्ज़त बांदी भोल्ही।3 तैखन तैना काही सालां केरि उज़ड़ोरी ठारां फिरी बसाले, पुराने ज़मानेरे खण्डरन मां तैना फिरी घरां बनाले; पीढ़ी-पीढ़ी केरां उज़ड़ोरां घरां तैना नंव्वे शिरे सेइं बनाले।
परदेशी एइतां खड़े भोल्हे ते तुश्शी भैड्डां-छ़ेल्ली च़ारेले ते विदेशी लोक एइतां तुश्शे उडारन मां दांत लाले ते दाछ़ां केरि बागां केरे माली भोल्हे; पन तुसन जो यहोवारे याजक ज़ोले तैना तुसन जो इश्शे यहोवा परमेशरेरे सेवक ज़ोले; ते तुसां कौमां-कौमां केरि धन-दौलत खाएले, ते तैन केरे कीमती चीज़न पुड़ घमण्ड केरेले।4 तुश्शी बदनैमरे बदले तुसन दुगनो हिस्सो मैल्हेलो, ते तुश्शी बेइज़्ज़तरे बदले तुसां अपने हिस्सेरी वजाई सेइं जयजयकार केरेले; तुसां अपने मुल्खे मां दुगने हिस्सेरे अधिकारी भोल्हे; ते हमेशा आनन्दे सेइं राले।
किजोकि अवं यहोवा न्याय सेइं प्यार रखताईं, अवं अन्याय ते डकैती सेइं नफरत केरताईं; एल्हेरेलेइ अवं तैन फल सच़्च़ैई सेइं देइलो, ते तैन सेइं हमेशारो करार केरेलो। तैन केरो वंश कौमी-कौमी मां ते तैन केरि औलाद मुल्खे-मुल्खेरे लोकन मां मुशूर भोल्ही; ज़ेत्रे तैन लाहेले, पिशानेले कि ऐह तै खानदाने ज़ैस परमेशरे बरकत दित्तोरीए।
अवं यहोवारे वजाई सेइं बड़ो खुशी रालो मेरे प्राण तैसेरे वजाई सेइं मघन रालो; किजोकि तैनी मीं छुटकारेरां लिगड़ां लुवेवरन, ते धार्मिकतारी च़ादर एन्च़रे लुवेवरीए ज़ेन्च़रे महराव फूड़ू केरि मालाई सेइं अपनो आप सज़ाते ते महारनी अपने गेहने सेइं शिंगार केरतीए।5 किजोकि ज़ेन्च़रे ज़मीन अपनि पैदावार उगातीए, ते बागी मां ज़ैन किछ बेवं गाते तैस तै उगातीए, तेन्च़रे प्रभु यहोवा सेभी कौमां केरे सामने धार्मिकता ते शुक्र बधालो।
Source notes (5)
- Cross-reference मत. 11:5;लूक. 4:18;प्रेरित. 10:38;26:18.
- Cross-reference लूक. 4:18-19.
- Cross-reference भज. 45:7;30:11;लूक. 6:21.
- Cross-reference 1 पत. 2:5,9;प्रका. 1:6;5:10.
- Cross-reference रोम. 5:11;इब्रा. 3:18;प्रका. 19:7-8.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.