Bhadrawahi Bible
यशायाह 59
पापेरे खलाफ खबरदारी
शुन, यहोवारो हथ एत्रो छोट्टो नईं भोवरो कि तै बच़ेइ न सखे, ते न तै एत्रो टोव्नो भोवरोए कि तै शुनी न सखे! पन तुश्शे अधर्मेरे कम्मेईं सेइं तुसां तुश्शे परमेशरे करां अलग कियोरेथ, ते तुश्शे पापां केरि वजाई सेइं तैसेरू तुत्तर तुसन करां एरू छ़पोरूए कि तै तुश्शी प्राथना न शुने। किजोकि तुश्शे हथ खूने सेइं ते तुश्शी एंगलोई अधर्मेरे कम्मे सेइं अपवित्र भोवरिन, तुसां ऐशी सेइं झूठ ज़ोतथ; ते तुश्शी ज़बान बुरी गल्लां केरतीए। कोई धर्मे सेइं दावो न केरे, ते न कोई सच़्च़ैई सेइं मुकदमो लड़े; ते तैना झूठे पुड़ भरोसो रखतन ते झूठी गल्लां ज़ोतन; तैना एरे आन ज़ेन्च़रे बुरे कम्मां केरो गर्भे, ते ज़ुलमे ज़र्म देतन। तैना सप्पेरे ठूलन ज़ाऊ देतन ते गरज़ारेरू ज़ाल बुनतन; ज़ै कोई तैन केरे ठूल खाते, तै मेरि गालो, ते ज़ैखन कोई ठूल भन्ते त तैस मरां सप निस्ते। तैन केरे जाले मां कपड़ो न बेनि सखे, ते ज़ैन किछ तैना बनातन तैस सेइं तैना अपनो अंग न ढेकी सखन, तैन केरां कम्मां बुरां भोतन ते अपने हथेइं सेइं ज़ुलम केरतन। तैना बुराई केरनेरे लेई दौड़तन; तैना बेकसूरां केरो खून बगाने मां तियार रहतन, तैन केरे खियाल बुरे भोतन; तैन केरि योजना बेकारन, उज़ाड़ ते विनाश ही तैन केरे बत्तन मांए। शैन्तरी बत तैना ज़ानन न; ते न तैन केरे बर्तावे मां न्याय; तैन केरि बत्तां टैरी आन, ज़ै कोई तैन पुड़ च़ले तैस शान्ति न मैल्हेली।1
इस्राएलन पुड़ मुसीबत
लोक ज़ोतन एल्हेरेलेइ परमेशरेरो न्याय असन करां बड़ो दूरे, ते धार्मिकता असन कां नेड़े नईं; असां लौअरो इंतज़ार केरतम, पन हेरा आंधरू बनोरू रहते; ते लौअरी उमीद लेइतां अहम, पन आंधरे मां च़लतम। असां कांना केरि ज़ेरि दिवार टटोलतम, एन्च़रे बत टटोलतम ज़ेन्च़रे असन एछ़्छ़ी नईं; असन दीसां एत्री ठोकर लगतीए ज़ेन्च़रे रात भोवरी भोए; ते सझ़र लोकन मां असां मुड़दां केरे ज़ेरे अहम। असां सब इछ़्छ़ां केरे ज़ेरे घुलतम ते कबूतरां केरे ज़ेरे गुर-गुर केरतम; असां न्याय त बलगतम पन न मैल्हे; ते छुटकारेरो इंतज़ार केरतम पन तै असन करां दूर रहते। किजोकि इश्शे पाप तेरे सामने बड़े आन, इश्शे पाप इश्शे खलाफ गवाही देतन; इश्शे पाप असन सेइं साथी आन ते अस अपने अधर्मेरे कम्मन ज़ानतम: असेईं यहोवारे खलाफ पाप कियोरोए, असां तैस कां मुकरी जे ते अपने परमेशरे पत्ती च़लनू छ़ेडी दित्तू, अस अंधेर केरने लगे ते उलटे फेरेरी गल्लां ज़ोने लगे, असेईं झूठी गल्लां मने मां बनेई ते ज़ोवरी भी आन। न्याय त पत्रोवं हटेइ दित्तो ते धर्म दूर खड़ो रेई जेव; सच़्च़ाई बज़ारे मां बिछ़ड़ी जेई, ते ईमानदारी दाखल न भोइ बटे। हाँ, सच़्च़ाई हेरोई जेई, ते ज़ै कोई बुरैई करां दूर नशते तैए शिकार भोइ गाते। एन लेइतां यहोवा बुरू बुझ़ू, किजोकि न्याय खतम भोइ जेव।
यहोवा अपने लोकन बच़ालो
तैनी हेरू की कोई मैन्हु नईं, तै हैरान भोइ जेव कि कोई बिनती केरनेबालो नईं, एल्हेरेलेइ तैनी एपनी शेक्ति सेइं छुटकारो दित्तो, ते अपने धर्मी भोनेरे वजाई सेइं तै सम्भालो।2 परमेशरे धार्मिकता झिलमेरी ज़ेरि लेवरीए, ते तैसेरे दोग्गे पुड़ छुटकारेरो टोप रखोरोए; तैनी बदलो घिन्नेरां लिगड़ां लआं, ते क्रोध चोगेरो ज़ेरो लेवरोए।3 तैन केरे कम्मां केरे मुताबिक तै तैन फल देलो, तैसेरे दुश्मन पुड़ अपनो क्रोध भड़कालो ते अपने दुश्मन तैन केरि कमाई देलो, तै जज़ीरन पुड़ रानेबाले लोकन भी तैन केरे कम्मां केरि सज़ाह देलो।4 तैखन पश्चिमेरे पासेरे लोक यहोवारे नंव्वेरो, ते पूरबेरे पासे तैसेरी महिमारो डर मन्नेले; किजोकि ज़ैखन दुश्मन समुन्दरे बराबर चढ़ाई केरेले तैखन यहोवारी आत्मा तैसेरे खलाफ झण्डो खड़ो केरेलो।5
यहोवा अपने लोकन सेइं ज़ोते, “याकूबेरे खानदाने मां ज़ैना पापन करां मन फिरातन तैन केरे लेई सिय्योने मरां अक छुटकारो देनेबालो एज्जेलो,” यहोवारू एन ज़ोनूए।6 यहोवा एन भी ज़ोते, “ज़ै करार मीं तैन सेइं कियोरोए तै ईहीए, कि मेरी आत्मा तीं पुड़ टिकोरीए, ते अपने वचन ज़ैना मीं तेरे ऐशी मां छ़डोरेन तैना अज़ करां लेइतां हमेशा तगर तेरे ऐशी मरां ते तेरे मट्ठां केरे ते पोट्लड़ां केरे ऐशी मरां कधी दूर न भोल्हे।”7
Source notes (7)
- Cross-reference रोम. 3:15-17.
- Cross-reference यहे. 22:30;इब्रा. 7:25;भज. 98:1.
- Cross-reference इफि. 6:14,17;1 थिस. 5:8.
- Cross-reference प्रका. 20:12-13;22:12;नहू. 1:2.
- Cross-reference मत. 8:11;लूक. 13:29;भज. 102:15-16;113:3.
- Cross-reference रोम. 11:26.
- Cross-reference इब्रा. 10:16;रोम. 11:27.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.