यशायाह 43

यहोवा हमेशा अपने लोकन सेइं साथीए

1हे याकूब तेरो बनानेबालो यहोवा, ते हे इस्राएल तेरो रच़ने बालो हुनी इन ज़ोते, “डर न, किजोकि मीं तू छुटेवरोस; मीं तू नवं घिन्तां कुजावरोस, तू मेरो ही आस। 2ज़ैखन तू पैनी मांमेइं भोइतां गास, तैखन अवं तीं सेइं साथी-साथी रालो ते ज़ैखन तू दरिया पार लंघेलो त तैना तीं न रुड़ालो; ते ज़ैखन तू अग्गी मांमेइं च़लेलो त तू न फुकोलो, ते तैसेरी लप्पी सेइं भी तू न फुकोलो। 3किजोकि अवं यहोवा तेरो परमेशर आईं, इस्राएलेरो पवित्र यहोवा अवं तीं बच़ानेबालो आईं। मीं मिस्र तेरे हरज़ाने मां ते कूश ते सबा मुल्ख तेरे बदले मां दित्तोरेन। 4तू मेरी नज़री मां बड़ो कीमती ते ट्लारोस, ते अवं तीं सेइं प्यार केरताईं, एस वजाई सेइं अवं तेरे बदले मैन्हन ते तेरे प्राणा केरे बदले मुल्खां-मुल्खां केरे लोकन देइलो। 5डर न, किजोकि अवं तीं सेइं साथी आईं; अवं तेरे खानदाने पूर्वेरां आनेलो, ते पश्चिमेरां भी अकोट्ठे केरेलो।1 6अवं उत्तरेरे राज़न सेइं ज़ोइलो, ‘देइ देथ,’ ते दक्षिणे सेइं रोकतां न रख; मेरे मट्ठन दूरेरां ते मेरी कुइयन धेरतरे कूने-कूने पुड़ां आनां;2 7हर अक ज़ैस जो मेरो ज़ोतन, ज़ै मीं एपनी महिमारे लेई बनाव, ज़ेसेरी मीं रच़ना की ते बनाव।”

इस्राएल यहोवारो गवाह

8ज़ैना एछ़्छ़ी भोंते संते भी काने आन ते कन भोंते संते भी टोव्नन, तैन केढतां मेरे सामने आनां! 9सैरी कौमां केरे लोक अकोट्ठे किये गान ते रियासतां-रियासतां केरे लोक भी अकोट्ठे भोन। तैन मरां कौन ऐह गल ज़ोई सखते या बीतोरी गल्‍लां ज़ोई सखते? तैना अपने गवाह आन्न ज़ैस सेइं तैना सच़्च़े ठहरन; तैना शुन्न ते ज़ोन, इन सच़्च़े। 10यहोवा एन ज़ोते, “तुसां मेरे गवाह आथ ते मेरे दास आथ, ज़ैना मीं एल्हेरेलेइ च़ुनोरेथ कि सेमझ़तां मेरो विश्वास केरा ते एन समझ़ा कि अवं तैए आईं। मीं करां पेइले कोई परमेशर न भोव ते न बादे मां कोई भोल्हो।3 11अव्वें यहोवा आईं मीं शैरतां कोई मुक्ति देनेबालो नईं। 12मीएं खबर दित्ती ते मुक्ति दित्ती ते बियान भी कियूं, ज़ैखन कोई बखलो देबतो न थियो; एल्हेरेलेइ तुस्से मेरे गवाह आथ,” यहोवारू एन्ने ज़ोनू आहे। 13“अव्वें परमेशर आईं, हाँ एजने बाले वक्ते मां अव्वें आईं, मेरे हथ्थे मरां कोई छुटेई न बटेलो; ज़ैखन अवं कम केरनू चेहीं तैखन मीं कौन रोकी सकेलो।”4

बाबेले करां बच़नू

14तुश्शो छुटानेबालो ते इस्राएलेरो पवित्र यहोवा एन ज़ोते, “तुश्शे लेई मीं बाबेलेरे केरे खलाफ सेना भेज़ोरीए, ते तैट्ठेरे सारे रानेबालन नशने बालेरे हालती मां ते कसदी भी तैन केरे ज़िहाज़न पुड़ च़ेढ़तां आनेले ज़ैन केरे बारे मां तैना बड़ू घमण्ड केरतन। 15अवं यहोवा तुश्शो पवित्र यहोवा इस्राएलेरो बनानेबालो तुश्शो राज़ो आईं।” 16यहोवा समुन्दरे मां ते बड़े ऐंधी मां बत कढते। 17ज़ै रथ्थन ते घोड़न ते सेनारे बहादरन एप्पु केढतां आनते (तैना त साथी तैड़ी रेइजे ते फिरी न खड़े भोइ सके, तैना हिश्शी जे, तै सनेरी बेतरे ज़ेरे हिश्शी जेवरेन) तै यहोवा इन ज़ोते, 18हुनी बीतोरी घटना याद न केरा, न पुराने ज़मानेरी गल्‍लन याद केरा। 19हेरा, अवं अक नंव्वू कम केरि राहोरोईं, तैन हुन्ना बांदू भोल्हु, कुन तुस तैस न ज़ानेले अवं सुनसान ठारी मां अक बत बनेई राहोरोईं; ते गैर आबाद मुल्खे मां दरिया बगेइलो।5 20गिद्दां ते शुतुर्मुर्ग जंगली जानबर मेरी महिमा केरेले; किजोकि अवं अपने च़ुनोरे लोकां केरे लेई जंगले मां पानी ते गैर आबाद मुल्खे मां दरिया बगेइलो। 21इना इस्राएली लोक मीं अपने लेई बनेवरेन कि मेरी तारीफ़ केरन।6

इस्राएलेरो पाप

22यहोवा इन भी ज़ोते, “फिरी भी हे याकूब, तीं मीं कां प्राथना नईं कियोरी; बल्के हे इस्राएल तू मेरी आराधना केरने करां थकोरोस। 23तीं होमबलि देनेरे लेई मीं कां गबड़ां न आनां ते न होमबलि च़ैढ़तां मेरी महिमा की। हेर, मीं अन्नबलि च़ाढ़नेरे लेई मुश्किल सेवा तीं करां नईं करेवरी, ते न गुग्गल बैलतां तू थकावरोस। 24तीं मेरे लेई कोई खुशबूदार निरैठी कीमत देइतां न घिन्नी ते न मेलबलि केरि चर्भी करां अवं राहोरोइं, पन तीं अपने पापां केरे वजाई सेइं मीं पुड़ बोझ लद्दो, ते अपने अधर्मेरे कम्मन सेइं अवं थकोरोईं।

25“अवं तैए आईं ज़ै अपने नंव्वेरे खातर तेरे पापन माफ़ केरताईं; ते तेरे पाप फिरी कधी याद न केरेलो।7 26मीं याद केरा, एज्जा असां एप्पु मांमेइं बेंस केरम; ते तू अपने गल्‍लरे बारे मां बियान केर ज़ैस सेइं तू बेकसूर ठहरस। 27तेरे पूर्वजे पाप कियो; ते ज़ैना तेरे मेरे मझ़ाटे भी राए, तैना मेरी बगावत केरते राए। 28एल्हेरेलेइ मीं पवित्र ठारारे हाकिम अपवित्र ठहराए, मीं याकूब सत्यानाश ते इस्राएलेरी निन्दा भोने दित्तोरीए।”