Bhadrawahi Bible
यशायाह 36
अश्शूर मुल्ख यहूदा प्रदेशे पुड़ हमलो केरते
यहूदा प्रदेशेरे राज़े हिजकिय्याहेरे हुकूमतरे च़ेवधोवं साले मां, अश्शूरेरे राज़े सन्हेरीबे यहूदारे सारे क़िले बाले नगरन पुड़ हमलो केरतां तैन पुड़ एन्च़रे कब्ज़ो कियो। ते अश्शूरेरे राज़े रबशाके अधिकारी बड़ी सेना देइतां लाकीश नगरे मरां यरूशलेम नगरे मां हिजकिय्याह राज़ेरे खलाफ भेज़ो। ते तै उत्तरी कुण्डेरे नाले कां धोबी केरे उडारे मां गेइतां खड़ो भोव। तैखन हिल्किय्याहेरू मट्ठू एलयाकीम ज़ै मेहलेरो अधिकारी थियो, ते शेबना सलाहकार ते आसापेरू मट्ठू योआह ज़ै इतिहास लिखने बालो थियो, एना ट्लाईए तैस सेइं मिलनेरे लेई नगरे मरां बेइर जे।
रबशाके तैन सेइं ज़ोवं, “हिजकिय्याह सेइं ज़ोथ, अश्शूरेरो महाराज़ो एन ज़ोते कि तू बच़नेरे लेई कैस पुड़ भरोसो लगोरोस केरने? मेरू ज़ोनू इन आहे, कि कुन गल्लां बनैनी जंग केरनेरे लेई ताकत ते योजना आहे, तू कैस पुड़ भरोसो केरतस कि तीं मीं सेइं बगावत की? शुन, तू मिस्रे पुड़ भरोसो केरतस ज़ै ढ्लेन्च़ोरे निरैठरे डालेरो ज़ेरोए। तैस पुड़ अगर कोई टेक लाए त तै तैसेरे हथ्थे मां डुबतां कोशेलो, मिस्रेरो राज़ो फ़िरौन तैन सेभन सेइं एन्च़रे केरते ज़ैना तैस पुड़ भरोसो केरतन। ते फिरी अगर तू मीं सेइं ज़ोस, कि इश्शो भरोसो अपने परमेशर यहोवाए पुड़े, त कुन तै तैए नईं ज़ेसेरी उच्ची ठारां बुछ़ोड़तां हिजकिय्याहे यहूदा ते यरूशलेमेरे लोकन सेइं ज़ोवं कि तुस इस वेदरे सामने झुका? एल्हेरेलेइ हुनी मेरे मालिक अश्शूरेरे राज़े सेइं करार केर तैखन अवं तीं 2000 घोड़े देइलो अगर तू तैन पुड़ सुवारां केरो इंतज़ाम केरि सकस। फिरी तू रथ्थन ते सुवारां केरे लेई मिस्रे पुड़ भरोसो रेखतां मेरे मालिकेरे निकड़े करां निकड़े अधिकैरी केन्च़रे हटेइ सकेलो? कुन मीं यहोवारे ज़ोवरे बगैरे इस मुल्खे उज़ाड़नेरे लेई चढ़ाई कियोरीए? यहोवाए मीं सेइं ज़ोवरूए, तैस मुल्खे पुड़ चढ़ाई केरतां तैस उज़ैड़ी दे।”
तैखन एलयाकीमे, शेबना ते योआहे रबशाके सेइं ज़ोवं, “अपने दासन सेइं अरामी भाषाई मां गल केर किजोकि असां तैस समझ़तम। असन सेइं यहूदी भाषाई मां शहरपनाही पुड़ बिश्शोरे लोकां केरे सामने गल्लां न केर।” रबशाके ज़ोवं, “कुन मेरे मालिके अवं तुश्शे मालिके या तुसने कां एना गल्लां ज़ोनेरे लेई भेज़ोरोईं? कुन तैनी अवं तैन लोकन कां नईं भेज़ोरो ज़ैना शहरपनाही पुड़ बिशोरेन ज़ैन तुसन सेइं साथी अपनु गू खानू पेलू ते मुट्ल पीनू पेलू?”
तैखन रबशाके खड़े भोइतां यहूदी भाषाई मां बड़े ज़ोरे सेइं ज़ोवं, “अश्शूरेरे महाराज़ेरी गल्लां शुना! अश्शूरी राज़ो एन ज़ोते, ‘हिजकिय्याह तुसन धोखो त नईं देइ राहोरोए, किजोकि तै तुसन बच़ेइ न बटेलो। एरू न भोए कि हिजकिय्याह तुसन एन ज़ोइतां यहोवारो भरोसो दे कि यहोवा सच़्च़े असन बच़ालो कि एन यरूशलेम नगर अश्शूरेरे राज़ेरे कब्ज़े मां न भोल्हु। हिजकिय्याहेरी न शुना; अश्शूरेरो राज़ो एन ज़ोते, तोफे भेज़तां मीं कां एज्जा ते मेरे अधीन भोथ; तैखन तुस एपनी-एपनी दाछ़री बागां ते फैगेरे बुट्टां केरो फल खेइ बटेले, ते अपने-अपने कुण्डेरू पानी पीते राले; ज़ांतगर अवं एइतां तुसन एरे मुल्खे मां न एन्हीं ज़ै तुश्शे मुल्खेरो ज़ेरो अन्न ते दाछ़रे रसेरो मुल्ख ते रोट्टी ते दाछ़री बागां केरो मुल्ख भोए। एरू न भोए कि हिजकिय्याह तुसन एन ज़ोइतां टपलालो कि यहोवा असन बच़ालो। कुन होरी कौमां केरे देबतेईं अपनो-अपनो मुल्ख अश्शूरेरे राज़ेरे हथ्थे करां बच़ावरोए? हमात ते अर्पाद नगरां केरे देबते कोड़ि राए? सपर्वैमेरे देबते कोड़ि राए? कुन तैनेईं सामरिया1 नगर मेरे हथ्थे करां बच़ाव? सैरी मुल्खां केरे देबतन मरां एरहो कौने ज़ैनी अपनो मुल्ख मेरे हथ्थे करां बच़ावरो भोए? फिरी कुन यहोवा यरूशलेमे मेरे हथ्थे करां बच़ालो?’”
पन तैना च़ुप राए ते तैसेरे जुवाबे मां अक गल भी न ज़ोई, किजोकि हिजकिय्याह राज़ेरो एरहो हुक्म थियो कि तैस जुवाब न देइयथ। तैखन हिल्किय्याहेरू मट्ठू एलयाकीम ज़ै मेहलेरो अधिकारी थियो, ते शेबना ज़ै सलाहकार थियो ते आसापेरू मट्ठू योआह ज़ै इतिहास लिखने बालो थियो, तैनेईं ट्लेइयेइं हिजकिय्याह कां गेइतां ते दुख बांदो केरनेरे लेई अपना लिगड़ां छ़िंदतां रबशाकेरी तैना सैरी गल्लां शुनेई।
Source notes (1)
- Footnote सामरिया उत्तरी इस्राएली राजधानी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.