Bhadrawahi Bible
यशायाह 33
बड़े मुसीबती मां प्राथना
अफ़सोस तीं नाश केरनेबाले पुड़ ज़ै नाश न थियो कियोरो; अफ़सोस तीं धोखे बाज़े पुड़, ज़ैस सेइं धोखो न कियो जेव! ज़ैखन तू नाश केरस, तैखन तू नाश कियो गालो; ते ज़ैखन तू धोखेबाज़ी केरि छ़डस, तैखन तीं सेइं साथी धोखो कियो गालो।
हे यहोवा, असन लोकन पुड़ अनुग्रह केर; असां तींए बलगतम। रोज़ इश्शी ताकत, मुसीबतरे मौके असन बच़ा। हे यहोवा तेरी गरज़ती आवाज़ शुनते मुल्खे-मुल्खेरे दुश्मन लोक नेश्शी जे, तेरे खड़े भोने पुड़ गैर कौमां तितर-बितर भोइ जेई। ते ज़ेन्च़रे टिट्टां उडारे चट केरतन तेन्च़रे अस तैन केरे लूटरो माल भी चट केरमेले, ते ज़ेन्च़रे टिट्टां ट्लुटतां पेतन, तेन्च़रे असां भी तैन पुड़ ट्लुटतां पेले।
यहोवा बड़ो महाने, तै सुर्गे मां रहते; तैनी सिय्योन न्याय ते धार्मिकताई सेइं भरपूर कियोरूए। ते मुक्ति, अक्ल ते ज्ञान बड़ू जादे तेरे दिहाड़ो केरो आधार भोल्हो; यहोवारो डर मन्नो तेरी दौलत भोल्ही।
पन हेरा, इश्शे शूरबीर1 चिन्डां लगोरेन मारने; ज़ैना शैन्तरो सन्देश आनतन तैना बेड़ी लेरां लगोरेन देने। सड़कां बेरान भोइ जेवरिन, तैन पुड़ मुसाफर हुनी न च़लन। तैनी करार टैली छ़डो, नगर घटिया समझ़ो, तैनी मैन्हु किछ भी न समझ़ो। धरती मातम केरती ते शुक्की जेवरीए, लबानोन शरमी सेइं शुक्की जेव; शारोन सुनसान ठारारो ज़ेरो भोइ जेवरोए; ते बाशान ते कर्मेल पहाड़े मां पट्लां झ़ड़नेरो मौसम भोइ राहोरोए।
सिय्योन नगरेरो न्याय
यहोवा ज़ोते, हुनी अवं खड़ो भोइलो, अवं अपनि शक्ति हिरेइलो, हुनी अवं महान ठहरेलो। हे अश्शूरी लोकव तुसन मां शुकोरे घासेरो गर्भ रालो, ते तुसन सेइं भूंस पैदा भोल्हो, तुश्शो शाह अग्गे, ज़ै तुसन भस्म केरेली। तुश्शे लोक फुकोरे चूनेरे ज़ेरे भोइ गाले, ते कट्टोरे झ़ैल्लां केरे ज़ेरे अग्गी मां फुक्के गाले।
हे दूरे-दूरेरे मुल्खां केरे लोकव, शुना, कि मीं कुन कियोरूए? ते तुसां भी ज़ैना नेड़े आथ, मेरि शक्ति ज़ाना। सिय्योनेरे पापी लोक डरे सेइं कम्बने लगोरेन; भक्ति न केरनेबालन थर्क लग्गोरीए: असन मरां कौन बेलति अग्गी मां रेई सखते? तैना ज़ोतन, असन मरां कौन बेलति अग्गी मां ज़ींतो रेई सखते ज़ै कधी न हिश्शेली?2 ज़ै धार्मिकताई सेइं च़लते ते सिद्धी गल्लां ज़ोते; ज़ै लूटरे माले सेइं नफरत केरते, ज़ै अपने हथ रिश्पती करां दूर रखते। ते ज़ै कत्लेरी खबर शुन्ने करां अपने कन बन्द केरते, ते एपनी एछ़्छ़ी बन्द रखते ताके बुराई न लेइहोए, तैए उच्चे ठैरन मां बस्सेलो। तै चट्टानां केरे क़िलन मां शरण घिन्तां रालो; तैस रोट्टी मैल्हेली ते पैनेरी कमी कधी न भोल्ही।
एजनेबालो रोड़ो वक्त
तुस यहूदारे लोक एपनी एछ़्छ़न सेइं यहोवा राज़े अपने शोभाई मां लाहेले; ते लम्मे चौड़े मुल्खे पुड़ नज़र केरेले।3 तैखन तुस डरेरे दिहाड़न याद केरेले; कि हिसाब घिन्ने बालो ते कर तुलतां नेनेबालो कोड़ि राव? गुम्मटां केरो गन्ने बालो कोड़ि राव।4 ज़ैन केरि सखत बोली तुस न समझ़थ, ज़ैन केरि बोली बखली आहे, तैना बेरहम लोक तुस फिरी न लाहेले। तैस वक्ते तुस सिय्योन नगरे लाहेले, तू अपने एछ़्छ़न सेइं यरूशलेम नगरे हेरेलो, ज़ैड़ी असां तिहार मनातम! तुस अपने एछ़्छ़न सेइं लाहेले तै सुरक्षित ठार, ते एरहो तेम्बु आहे ज़ै कधी न बिछ़ोड़ो गालो, ज़ेसेरो कोई भी खीलो कधे न पुटोलो, ते न कोई रस्सी कधे ट्लुटेली। तैड़ी महाप्रतापी यहोवा इश्शो परमेशर भोल्हो, तै बड़े-बड़े दरिया ते नहरां केरि ठार भोल्हो, तैड़ी च़ेप्पू बाली किश्ती न च़लेली, ते न रोड़ां-रोड़ां ज़िहाज़ां तैस मांमेइं च़लेलां। किजोकि यहोवा इश्शो न्याय केरनेबालो, यहोवा इश्शो हाकिम, यहोवा इश्शो राज़ो, ते तैए असन बच़ालो।
दुश्मना केरे ज़िहाज़ां केरि रेस्सी ढिल्ली भोइ जेई, तैना मस्तूलेरू ज़ील न मज़बूत न केरि सेकी, ते न बाद बाने फैलेईं सखे। तैखन बड़ो लूटरो माल थुसोड़तां बन्टो जेव, टोन्टे लोक भी लूटरे मालेरे हिस्सेदार भोइ जे।
कोई सिय्योने मां रानेबालो एन न ज़ोलो कि अवं बिमार आईं; ते ज़ैना लोक तैस मां बस्सेले, तैन केरो अधर्म माफ़ कियो गालो।
Source notes (4)
- Footnote शूरबीर यरूशलेम नगरेरे सिपाही
- Cross-reference इब्रा. 12:29.
- Cross-reference मत. 17:2;यूह. 1:14.
- Cross-reference 1 कुरि. 1:20.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.