Bhadrawahi Bible
यशायाह 21
बाबेलेरे बिछ़ड़नेरू दर्शन
समुन्दरेरे बन्नेबाले जंगलेरे बारे1 मां सन्देश। ज़ेन्च़रे दक्षिण पासेरां तेज़ बात च़लो एइते, तै जंगलेरे डराने बालो मुल्खेरे नेड़े एज्जी राहोरोए। तकलीफरी गल्लां केरू दर्शन मीं हिरेवरूए; धोखेबाज़ धोखो केरते, ते नाश केरनेबालो नाश केरते। हे एलाम मुल्ख, चढ़ाई केर, हे मादै मुल्ख, घेर; तैसेरू करलानू अवं बन्द केरताईं। एस्से वजाई सेइं मेरी कमरी मां बड़ी तकलीफ भोइ राहोरीए; अवं एरे दुखे मां पेवरोईं कि किछ शुनोए न, अवं एरहो डेरि जेवरोईं कि किछ लेइहोए न। मेरी धड़कन बद्धतीए ते अवं बड़ो डेरि जेवरोईं, ज़ैस ड्लवझ़रे लेई अवं तड़फतो थियो, तै मेरे लेई अक बड़ी घबराट बेनि जेई। दर्शने मां रोट्टी खानेरी तियारी भोइ राहोरीए, ते पंदां बछ़ेइतां छ़ेडोरी आन, तैना खातन ते पीतन। हे हाकिमव, उट्ठा, ते ढाली तेल मल्ला! किजोकि प्रभुए मीं सेइं ज़ोवरूए, “गेइतां अक पहरदार खड़ो केरा, ते तै ज़ैन किछ लाहेलो तै ज़ोलो। ज़ैखन तै रथ लाहेलो ज़ैस मां दूई-दूई एज्जेले, ते गधन ते ऊँटन पुड़ सुवार लाहे तैखन तै बड़े ध्याने सेइं शुने।” तैखन पहरदार शेरेरो ज़ेरो ज़ोने लगो, “हे प्रभु अवं सैरी दिहैड़ी खड़खड़ो पहरो देतो राव ते मीं पूरी रात पहेरे पुड़ कट्टी। ते कुन हेरताईं कि सिपेही केरि टोली ते दूई-दूई केरतां सुवार एज्जी राहोरेन!” ते तै ज़ोने लगो, “बाबेल बिछ़ड़ी जेवं; ते तैसेरे देबतां केरि बनेवरी मूरती सब तल्ले जो चकनाचूर की।”2 हे मेरे लोकव, ज़ैना खलाड़ी मां अन्नेरे ज़ेरे मढोरेथ, सेना केरे यहोवा इस्राएलेरे परमेशरे करां मीं शुनेरूए, अवं तुसन सेइं ज़ोताईं।
एदोम मुल्खेरे खलाफ एलान
दूमारे बारे मां भारी वचन। सेईरे3 मरां मींजो कोई आवाज़ देइ राहोरोए, “हे पहरदार रात किताली ट्लेकड़ोली? हे पहरदार, रात किताली बीतेली?” पहरदारे ज़ोवं, “झ़ेझ़ भोनेबालीए, ते फिरी रात फिरी भोल्ही। ते अगर तुस पुछ़नू चातथ त पुछ़ा; फिरी वापस एज्जथ।”
अरब मुल्खेरे खलाफ एलान
अरब मुल्खेरे खलाफ भारी वचन। हे ददानी केरे मुसाफरव, तुसन अरबेरे सुनसान ठैरी मां रात कटनी पेनीए। हे तेमा नगरेरे रानेबाले लोकव, ट्लिशोरो लोकां केरे लेई पानी आनां, ते नशने बालां केरे लेई रोट्टी आनां। किजोकि तैना नेग्गी तलवारां केरे सामनेरां ते तियार धनुषे ते बड़े जंगी करां नशतन।
किजोकि प्रभुए मीं सेइं एन ज़ोवरूए, “कि मज़दूरेरे सालां केरे मुताबिक एक्की साले मां केदारेरे गोट्लां केरि सारी शान-ओ-शोकत मिटाई गाली; ते केदारेरे तीर च़लानेबालन मरां ते शूरबीर बहादरन मरां थोड़े ज़ेरे रेई गाले; किजोकि इस्राएलेरे परमेशर यहोवा एन्च़रे ज़ोवरूए।”
Source notes (3)
- Footnote जंगलेरे बारे बाबेल
- Cross-reference प्रका. 14:8;18:2.
- Footnote सेईरे एदोमेरू दूइयोवं नवं
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.