Bhadrawahi Bible
यशायाह 17
दमिश्क ते इस्राएलेरे खलाफ नबूवत
दमिश्क नगरेरे बारे मां भारी नबूवत: “हेरा, दमिश्क नगर सच़्च़े खतम भोइ गालू। दमिश्क नगर घरेण्ड भोइ गालू। अरोएरेरां नगरां गैर आबाद भोइ गालां, तैना जानबरां केरे च़ारनेरी ठारां बनेलां; जानबर तैन मां बिश्शेले ते तैन कोई कढने बालो न भोल्हो। एप्रैम प्रदेशेरे क़िले बाले नगर, ते दमिश्क नगरेरू राज़ ते बच़ोरे अरामी लोक, ट्लाईए एजने बाले वक्ते मां न राले; ते ज़ै हालत इस्राएली लोकां केरे महिमारी भोइ तैए तैन केरि भोल्ही।” सेना केरे यहोवारू एन ज़ोनूए।
यहोवा ज़ोते “तैस मौके याकूबेरी शान-ओ-शोकत घेटी गाली, ते तैसेरी मोट्टी जान कमज़ोर भोइ गाली। ते एरू भोल्हु ज़ेन्च़रे लुन्ने बालो गेहुं केरां शिल्लां अकोट्ठां केरते, ते रपाईम वैदी मां शिल्लां च़ुनतो भोए। फिरी भी ज़ेन्च़रे ज़ैतूनेरे बुट्टन पुड़ां फल कढते बार किछ दाने रेई गातन, मतलब डाले पुड़ दूई ट्लाई फल, ते फले बाले डाले पुड़ कोन्च-कोन्च च़ेवर-पंच़ दाने भी रेई गातन, तेन्च़रे तैन मरां शिल्लां च़ुना गालां।” इस्राएलेरे परमेशर यहोवारू एन्ने ज़ोनूए।
तैस मौके लोकां केरि एछ़्छ़ी अपने रच़ने बाले इस्राएलेरे पवित्र परमेशरेरे पासे मद्दतरे लेई लेगोरी रहेली; तैना अपने बनेवरी वेदी केरे पासे न तकेले, ते न एपनी बनेवरी अशेरा देबरी मूरती या दिहाड़ेरी मूरती केरे पासे तकेले।1 तैस मौके इस्राएली केरे क़िले बाले नगर घने जंगल, ते तैन केरि गैर आबाद ठारां पहाड़ां केरि च़ोटां केरि ज़ेरि भोल्ही ज़ैना इस्राएलेरे डरेरे वजाई सेइं शारे जेवरे थिये, ते तैना उज़ाड़ोरे पेवरे राले।
किजोकि तीं अपनो छुटकारो देनेबालो परमेशर बिसरी छ़डोरोए; ते तीं अपनि मज़बूत चट्टान याद न रखी; एल्हेरेलेइ चाए तू ज़ेत्रे रोड़े करां रोड़े पौदे कि न लास ते विदेशी कलम लास, चाए लानेरे दिहाड़े तू अपने च़ेवरे पासन बाड़ देस, ते झ़ेझ़ां तैन मां फूड़ू लग्गन, फिरी भी मुसीबत ते बड़े दुखेरे दिहाड़े तैसेरो फल नाश भोइ गालो।
दुश्मन राष्ट्रां केरि हार
हाय, हाय! मुल्खे-मुल्खेरे बड़े लोकां केरो हंगामो भोइ राहोरोए, तैन केरि शौर समुन्दरेरी छ़ेल्ही केरि ज़ेरि शुनोतीए। रियासतां-रियासतां केरे लोकां केरि शोर शुनोने लगोरीए, ज़ेन्च़रे बड़े पैनेरी ज़ेरि आवाज़ केरतन! रियासतां-रियासतां केरे लोक तूफानेरे बड़े पैनेरे ज़ेरे आवाज़ केरतन, पन यहोवा तैन झ़िड़केलो, ते तैना दूर नश्शेले, ते एरे उज़ाड़े गाले ज़ेन्च़रे पहाड़न पुड़ेरो भूंस हवाई सेइं, ते धूड़ बाते सेइं घुमतां उडारी गातीए। ड्लवझ़ी हेरा, घबराटे! तैना झ़ेझ़ भोने करां पेइले गाईब भोइ जेवरेन! इश्शे नाश केरनेबालां केरो हिस्सो ते इश्शे लुटने बालां केरि ईए हालत भोल्ही।
Source notes (1)
- Cross-reference मीक. 5:13-14.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.